د طالبانو د امر بالمعروف، نهې عن المنکر او د شکایتونو اورېدو وزارت خبر ورکړی، چې په بامیان او دایکنډي ولایتونو کې یې ۲۳۵ رواني ناروغان ټول کړي او د درملنې لپاره یې د افغاني سرې میاشتې ټولنې ته سپارلي دي.
په بلخ ولایت کې د طالبانو د اطلاعاتو او کلتور ریاست خبر ورکړی، چې په مزارشریف ښار کې د روضې ودانۍ يو شمېر برخې چې د وروستۍ زلزلې له امله ویجاړې شوې وې؛ د بیارغونې چارې يې پيل شوې دي.
د پاکستان په پلازمینه اسلاماباد کې د سېشنبې په ورځ تر ځانمرګي برید وروسته پولیسو د افغان کډوالو د نیولو او چاپو کمپاین چټک کړی، چې ګڼې کورنۍ یې له وېرې د خپلو کورونو پرېښودو ته اړې شوې دي.
د ملي مقاومت جبهې په نوم د طالبانو وسلهوالې مخالفې ډلې ادعا کړې، چې د کندوز ولایت د خاناباد بندر په «زنجیر چرخاب» سیمه کې یې دوه طالبان وژلي او یو بل ټپي دی. د یادې جبهې لهخوا په خپرې شوې خبرپاڼه کې راغلي، چې په دغه عملیاتو کې ملکي خلکو او د دوی ځواکونو ته زیان نهدی رسېدلی.
د کولمبیا ولسمشر ګوستاو پیټرو امر کړی، تر هغې چې امریکا په کارابین سمندر کې پر کښتیو خپلو بریدونو ته دوام ورکوي؛ د امریکا له استخباراتي ادارو سره دې د همکارۍ او معلوماتو تبادله وځنډول شي.
پاکستاني رسنیو خبر ورکړی، چې د سویلي وزیرستان په مرکز واڼه کې د پوځي کالج د برید ټول بریدګر وژل شوي او هیڅ زدهکوونکي یا ښوونکي ته پهکې زیان نهدی رسېدلی. ورته مهال په بنو کې هم د ترهګرۍ ضد څانګې (CTD) د دوو وسلهوالو له وژلو خبر ورکړی.
د عراق پارلماني ټاکنې د خلکو په پېکه ګډون او د بېباورۍ په فضا کې ترسره شوې. ګڼ ځوان رای ورکوونکي دغه ټاکنې د «پیاوړو ګوندونو ترمنځ د تېلو شتمنۍ د بیا وېش لپاره د یوې وسیلې» په توګه ګڼي.
د طالبانو د فراه والي محمد حافظ مجاهد د ایران د سویلي خراسان له والي سره د ماهیرود بندر څخه د لیدنې پر مهال د افغانستان او ایران ترمنځ د اقتصادي، فرهنګي او بنسټیزو اړیکو پر پراختیا ټینګار کړی. دواړه خواوو د ګډو پروژو، سوداګریزې ودې او د سرحدي اړیکو د لا پیاوړتیا ژمنه وکړه.
د افغانستان د ښځینهو والیبال ملي لوبډلې د اسلامي هېوادونو ترمنځ د یووالي سیالیو په لړ کې په خپله درېیمه لوبه کې هم ماتې وخوړه. افغان لوبډلې دغه لوبه د ۲۵-۹، ۲۵-۱۰ او ۲۵-۸ نمرو په توپیر وبایلوده.
د «میلون بلو» په نوم یو لس قیراطه نیلي رنګی الماس د سېشنبې په ورځ د سویس په جینیوا کې شاوخوا په ۲۵ مېلیونه ډالر وپلورل شو. د میلون بلو الماس د رېچل میلون په نامه د یوې شتمنې امریکایي مېرمنې و، چې په ۲۰۱۴کال کې د نوموړې تر مړینې وروسته په ۳۲.۶ مېلیونه دالر وپلورل شو.
په کندهار کې د طالبانو د کرنې، اوبو لګولو او مالدارۍ ریاست مسوولین وايي، په دې ولایت کې د یوه ملي سوداګر له لوري د ۱۵۰ میلیونه ډالرو په ارزښت د چرګانو یو شرکت فعال شوی دی. طالبانو ویلي، یاد شرکت چې د چرګانو هر اړخیز فعالیتونه ترسره کوي، د کندهار ښار ۵۰ سلنه اړتیاوې پوره کړې دي.
د طالبانو د کډوالو او بېرته راستنېدونکو چارو وزارت ویاند وایي، چې په تېرو ۱۹ ورځو کې له پاکستان، ایران او ترکیې څخه د بندیانو په ګډون ۲ لکه او ۱۸۳۴ افغان کډوال هېواد ته ستانه شوي. عبدالمطلب حقاني زیاته کړې، چې له دې کډوالو سره یې نغدي، خوراکي او روغیتايي مرستې هم کړي دي.
رویټرز د اروپايي او امریکايي سرچینو په حواله راپور ورکړی، چې په دوو برخو د غزې تړانګې د وېش احتمال زیات شوی، یوه برخه به د اسراییل تر کنټرول لاندې وي او بله برخه به د حماس تر ادارې لاندې وي.
د کاناډا د بهرنیو چارو وزیرې انیتا انند د سېشنبې په ورځ په کاناډا کې د جي ۷ د بهرنیو چارو وزیرانو د دوه ورځنۍ غونډې د پیل په درشل کې وویل، چې د بحث اصلي موضوعات به د شمالي قطب امنیت، د اوکراین جګړه او په منځني ختیځ کې د سولې ټینګښت وي.
د اسراییل د دفاع وزارت د ۲۰۲۶ کال لپاره د ۴۴.۵ میلیارده ډالرو بودیجې غوښتنه کړې ده. له دې بودیجې څخه شاوخوا ۲.۱۷ میلیارده ډالره د امنیتي چمتووالي د پیاوړتیا لپاره په ځانګړي ډول د ایران د ګواښونو پر وړاندې ځانګړې شوې ده.
د امریکا د مرستو له بندېدو وروسته درې افغانې ښځې چې په قطر کې د اېستلو له ګواښ سره مخ وې، اوس یې د کاناډا د رېجاینا پوهنتون کې پناه اخيستې. په پلان کې ده، چې شاوخوا ۳۰ افغانې زدهکړیانې رېجاینا ته ولېږدول شي، خو اداري خنډونو او اوږدو پروسو د دې کار بهیر ځنډولی.
د پاکستان د علماوو شورا مشر محمدطاهر اشرفي د وزیرستان او بلوچستان په سیمو کې د وروستیو بریدونو په غبرګون کې ویلي: «د پاکستان پر وړاندې فتنه د افغانستان له خاورې څخه پیلېږي.» نوموړي له پاکستان څخه غوښتي، چې د ځان پر وړاندې د افغان خاورې د کارونې مخه ونیسي.
د هندوستان ټایمز ورځپاڼې د سې شنبې په ورځ راپور ورکړی، چې هندي پولیسو په نوي ډیلي کې د «سره کلا» د برید په تړاو شپږ کسان نیولي دي. په دې پیښه کې تر اوسه پورې لږ تر لږه ۱۳ کسان وژل شوي او له ۲۰ څخه ډېر ټپیان شوي دي.
پاکستاني سیاستوال او د ملي ډېموکراټیک غورځنګ مشر افراسیاب خټک د اسلاماباد وروستي ځانمرګي برید ته په غبرګون کې ویلي، چې که څه هم هر ترهګریز فعالیت جرم دی، خو د اندېښنې وړ خبره دا ده چې پولیس هر پښتون ته د «مظنون »په سترګه ګوري.
په پاکستان کې د روسیې سفارت د سې شنبې په ورځ په یوې خبرپاڼه کې په اسلاماباد کې د «جي ۱۱» په سیمه کې وروستی ځانمرګی برید غندلی دی. د روسیې سفارت د پېښې د عاملینو د پېژندلو او عدالت ته د سپارلو هیله ښودلې ده.
د طالبانو د بهرنیو چارو وزارت د سې شنبې په ورځ په یوه خبرپاڼه کې د جورجیا او اذربایجان پولې ته نېږدې د ترکیې د پوځي الوتکې د لوېدو پېښه غندلې او په دې اړه یې خواشیني څرګنده کړې ده. طالبانو د پېښې د قربانیانو کورنیو ته تسلیت هم ویلی دی.