ترکي چارواکو خبر ورکړی، چې د اغدیر ولایت په ارلیک ولسوالۍ کې د یو لړ عملیاتو پرمهال ۱۱ بېاسناده افغان پناهغوښتونکي او پنځه نور کسان د انساني قاچاق په تور نیول شوي دي. د ترکیې امنیتي ځواکونو د دغه عملیاتو پرمهال د ښکار دوه بېجوازه ټوپکونه هم کشف کړي دي.
د بهرنیو چارو پخواني وزیر محمد حنیف اتمر، د چارو ادارې پخواني مشر فضل محمود فضلي او پښتون سیاستوال افراسیاب خټک د افغان ستورمزلي عبدالاحد مومند د مړینې په اړه خواشیني څرګنده کړې او په وینا یې، هغه په لومړي ځل قرانکریم او ملي بیرغ فضا ته یووړل او له هغه ځایه یې په پښتو خبرې وکړې.
د ملګرو ملتونو د وګړو صندوق (یو این ایف پي ای) وايي، په افغانستان کې د امیندوارو ښځو لپاره روغتیايي پوهاوی او لومړنیو روغتیايي خدماتو ته لاسرسی د مېندو او ماشومانو د مړینې د ګواښ په کمولو کې مهم رول او اغېز لري.
د ایران د سپاه پاسداران اړوند تسنیم خبري اژانس د یوې باخبره سرچینې په حواله راپور ورکړی، چې په سویس کې د ایران او امریکا ترمنځ د څلور اړخیزو خبرو ځنډ لا هم دوام لري او د دواړو لورو ترمنځ پیغامونه د منځګړو له لارې تبادله کېږي.
د افغانستان د تېر جمهوري نظام د ملي دفاع وزارت پخوانی سرپرست شاه محمود میاخېل وايي، د امریکا د ولسمشر مرستیال جيدي وېنس د سویس غونډې په څنډه کې په خپلو خبرو کې د پاکستان د پوځ مشر عاصم منیر له خپلې ښځې سره مقایسه کړی دی. د میاخېل په باور، دا په شرقي کلتور کې «سپکاوی» دی.
د طالبانو د عامې روغتیا وزیر نور جلال جلالي په افغانستان کې د ملګرو ملتونو د ماشومانو د ملاتړ صندوق (یونیسف) له استازي تاجالدین اویوواله سره په لیدنه کې د روغتیايي خدماتو د کیفیت د ښهوالي او د روغتیايي پروګرامونو د اغېزمنتیا په اړه خبرې کړې دي.
د ترکیې د بهرنیو چارو وزیر هاکان فیدان خبرداری ورکړی، چې اسراییل ښايي د واشنګټن او تهران ترمنځ د وروستي لاسلیک شوي هوکړهلیک د بهیر د ګډوډولو او سبوتاژ هڅه وکړي.
باوري سرچینو افغانستان انټرنشنل ته ویلي، طالبانو د هرات په اسلامکلا کې د شپږو نړیوالو بنسټونو او د ملګرو ملتونو د یوه همکار سازمان ۲۰ نیول شوي کارکوونکي خوشې کړي. د سرچینو په وینا، دغه کسان تېره ورځ سهار د طالبانو د امربالمعروف محتسبانو له خوا د «لنډې ږیرې» په تور نیول شوي وو.
د بشري حقونو څار بنسټ د افغانستان د برخې څېړونکې فرشته عباسي ویلي، افغان ښځې له خپلو بنسټیزو حقونو، په ځانګړې توګه د ازاد تګ راتګ له حق څخه محرومې دي، خو طالبان کولای شي په نړیواله کچه سفرونه وکړي.
نیویارک ټایمز د افغان ښځو او په ځانګړې توګه د متشبثو ښځو د وضعیت په تړاو په یوه راپور کې ویلي، طالبانو سره له دې چې پر ښځو ګڼ محدودیتونه لګولي، خو د اقتصادي سقوط مخنیوي لپاره یې ځينو ښځو ته د سوداګرۍ پيلولو اجازه ورکړې. دوی هم مکلفې دي چې طالباني قوانین په جدي توګه رعایت کړي.
د پښتونخوا نشنل عوامي ګوند شريک مشر مختار خان يوسفزي ويلي، نن ازاد افغانستان په داسې یوه حالت کې دی چې هلته توره تياره ده، د هېواد نيمه برخه وګړي (مېرمنې) په کورونو کې بند کړل شوي دي او دا هېواد د پنجابي استعمار د مستقل ګواښ سره مخ دی.
د افغانستان د پخواني جمهوري نظام د لوګر ولایتي شورا پخوانۍ غړې نفیسه هجران وايي، په هېواد کې د پخوانیو امنیتي ځواکونو او دولتي کارکوونکو پر وړاندې هدفي وژنې او تعقیب د بشري او مسلکي پانګې له منځه وړل دي. هغې زیاته کړې چې سیاسي بدلونونه باید د پخوانیو سرتېرو د ژوند په بیه نه وي.
د امریکا ولسمشر ډونالډ ټرمپ د ناټو پر یو شمېر متحدینو نیوکه کړې او ویلي یې دي چې د ایران د اټومي ګواښ پر وړاندې لازم اقدام نه کوي.
د طالبانو د امربالمعروف وزارت ویاند سیفالاسلام خیبر په هرات کې له یو شمېر ښځو سره د حجاب په پلمه د دوه اونۍ مخکې زورزیاتیو د توجیه لپاره ویلي: «په نړۍ کې هر دولت پر وګړو محدودیتونه لګوي» او زیاتوي یې، که نړیواله ټولنه د تنوع خبره کوي، نو باید دا اصل د اسلامي ټولنو لپاره هم ومني.
د ملګرو ملتونو د ماشومانو د ملاتړ صندوق (یونیسف) ویلي، په افغانستان کې د خوارځواکۍ له امله زیانمن شوي ماشومان د ځانګړو درملیزو خوړو په ترلاسه کولو سره د روغتیا پر لور بېرته ستنېږي. دغه بنسټ زیاتوي، چې د خوارځواکۍ له ستونزې سره د مخ ماشومانو درملنې او ملاتړ ته به دوام ورکړي.
د پاکستان د پارلمان غړی عادل خان بازی وایي، چې بلوچستان ايالت ته تلونکې لارې د پاکستاني طالبانو تحریک (ټي ټي پي) او د بلوڅ ازادۍ غوښتونکې ډلې (بي اي اې) نیولي او تړلي دي.
د طالبانو د کډوالو کمېسیون وايي، پاکستان او ایران یوازې د یکشنبې په ورځ له بېلابېلو لارو ۴۷۷ کډوالې کورنۍ چې شمېر یې ۲۵۷۹ تنه کېږي، په جبري ډول افغانستان ته ستانه کړي. د دغه کمېسیون په وینا، په همدې ورځ ۷۵۷ کورنۍ خپلو سیمو ته لېږدول شوي او له ۷۰۳ کورنیو سره مرستې هم شوې دي.
د افغانستان پخواني ولسمشر محمد اشرف غني، د یوازیني او لومړني افغان ستورمزلي عبدالاحد مومند پر مړینه خوشیني ښودلې او ویلي یې دي چې د هغه ناڅاپي مړینې دردولی دی.
د جرمني د دفاع وزیر بوریس پیستوریوس، د امریکا ولسمشر ډونالډ ټرمپ د هُرمز تنګي د تړل کېدو مسوول بللی او د دې مهمې سمندري لارې د بېرته پرانیستل کېدو غوښتنه یې کړې ده.
د پروان د کوه صافي ولسوالۍ د لارې په اوږدو کې د یوې ټرافيکې پېښې له امله ۵ کسان مړه او ۷ نور ټپيان شوي دي. د پروان ولایت لپاره د طالبانو د امنیه قومندانۍ مسوولین وايي، په مړه او ټپيانو کې ښځې او ماشومان هم شامل دي.
یو شمېر افغان معترضانو د جرمني په مونيخ ښار کې د یوې غونډې پر مهال د هرات د جبرییل سیمې د لاریونونو د ځپلو او پر لاریونوالو د ډزو د پېښې د خپلواکو او نړیوالو څېړنو غوښتنه کړې او له نړیوالو بنسټونو یې غوښتي چې په افغانستان کې د بشري حقونو وضعیت ته لا ډېره پاملرنه وکړي.