د ننګرهار ولایت لپاره د طالبانو د امنیه قومندانۍ مسوولین وايي، دغه کس یې د یکشنبې په ورځ (د مرغومي ۲۸مه) د جلالاباد ښار له اوومې امنیتي حوزې له شاوخوا سیمو له ۴۱۲۳ زیکب تابلیتونو سره نیولی دی.
د افغانستان د کرېکټ ملي لوبډله د ۲۰ اوریزو نړۍوالو سیالیو په ترڅ کې د ویسټانډیز لوبډلې پر وړاندې میدان ته ځي. د دغه سریز لومړۍ لوبه سبا د دوبۍ په نړۍوال کرېکټ لوبغالي کې ترسره کېږي. د افغانستان کرېکټ بورډ اعلان کړی، چې دا لوبه به د کابل پر وخت ماښام اووه بجې پیل شي.
د فراه ولایت لپاره د طالبانو له پېښو سره د مبارزې چمتووالي ریاست په بکواه او ګلستان ولسوالیو کې د وروستیو سېلابونو له امله د یکشنبې په ورځ (د مرغومي ۲۸مه) پر ۷۰۹ زیانمنو کورنیو له سروې وروسته یو شمېر خوراکي او غېرخوراکي توکي ووېشل.
د جرمني د بهرنیو چارو وزیر یوهان وادیفول وایي، د ترهګریزې ډلې په توګه د سپاه پاسداران د اعلانولو وخت رسېدلی دی.
د طالبانو د چاپېریال ساتنې ادارې او اکسس پواینټ (Access Point) مشورتي او مالي شرکت ترمنځ د ۱۵۰ زره ډالرو په ارزښت د چاپېریالي او اقلیمي بدلون اړوند پروژې د تطبیق په موخه یوه هوکړه لاسلیک شوه. دا پروژه د یواېنډيپي له لوري تمویلېږي او د ۶ میاشتو موده کې به په کونړ کې تطبیق شي.
د هسپانیا دولتي رسنۍ وايي، نن مازدیګر (یکشنبه د مرغومي ۲۸مه) په ادموز سیمه کې د دوو چټک اورګاډو د ټکر له امله لږ تر لږه ۲۱ کسان مړه شوي، لسګونه نور ټپیان دي او ښایي یو زیات شمېر نور لا هم په اورګاډو کې بند پاتې وي.
جمهوري غوښتونکي سناتور ټېډ کروز یو ځل بیا په دې ټینګار سره چې «امریکا د ایران د خلکو ترڅنګ ولاړه ده»، فاکسنیوز شبکې ته وویل: «زه له ډونالډ ټرمپ سره موافق یم؛ ایران نوي مشرتابه ته اړتیا لري».
شهزاده رضا پهلوي په داووس کې د نړۍوالې اقتصادي ټولنې د ویناوالو په نوملړ کې په پټ ډول د عباس عراقچي د شاملېدو په غبرګون کې پر اېکسپاڼې لیکلي: «په دغه ټولنه کې د جنایتکار عراقچي د شتون پر وړاندې اعتراض کول د هر شریف انسان دنده ده».
د افغانستان د کورنیو چارو پخوانی وزیر علي احمد جلالي وایي، دا مهال په افغانستان کې یو ټولواک حکومت واکمن دی، چې خپل مشروعیت له خلکو څخه نه اخلي او هر څه د خپل قرائت او تعریف پر بنسټ ټاکي.
د غور په دولتیار ولسوالۍ کې د یکشنبې په ورځ (د مرغومي ۲۸مه) د فوټبال لپاره د مصنوعي چمن لوبغالی پرانېستل شو. دغه لوبغالی د یادې ولسوالۍ د یوه اوسېدونکي په شخصي لګښت جوړ شوی دی.
عوامي نشنل ګوند په لندن کې د خان عبدالغفار خان د ۳۸م تلین په مناسبت او د هغه د زوی عبدالولي خان یاد غونډه جوړه کړه. د دغې غونډې ګډونوالو خان عبدالغفار خان ستر مبارز او د پښتنې ټولنې اصلاحګر وباله. د جنورۍ ۲۰مه د خان له ۳۸م تلین سره برابره ده.
د پاکستان په کراچۍ کې د مرګونې اورلګېدنې په دوام، اور وژونکو لا هم د یکشنبې په ورځ د لسګونو کسانو د لټون عملیاتو ته دوام ورکړی. په دغه اورلګېدنه کې چې د شپږو کسانو مړینه تایید شوې، تر ۶۵ ډېر کسان لا هم لادرکه دي.
د جوزجان لپاره د طالبانو والي عبدالله سرحدي د دغه ولایت له ډلګي مشرانو او سرګروپانو سره په کتنه کې ویلي، د هبتالله اخوندزاده له فرامینو اطاعت کول پر ټولو مسوولینو او خلکو واجب دی. په دې وروستیو کې طالب چارواکي په وار وار له خپل مشر څخه پر اطاعت کولو ټینګار کوي.
د «ایران د اټومي کېدو پر ضد د اتحاد» سازمان اعلان وکړ، چې د ایران د بهرنیو چارو وزیر عباس عراقچي په یو پټ اقدام او پرته له عامه خبرتیا د نړۍوالې اقتصادي ټولنې په ویناوالو کې شامل شوی دی. دا غونډه روانه اوونۍ ترسره کېږي.
په پاریس کې مېشتو یو شمېر ایرانیانو د یوې راټولېدنې او د یوه سمبولیک حرکت په ترسره کولو سره، د ایران د وروستي ازادي غوښتونکي غورځنګ د قربانیانو یاد تازه کړ.
د ننګرهار ولایت لپاره د طالبانو د امنیه قومندانۍ مسوولین وايي، د دغه ولایت په حصارک ولسوالۍ کې یې یوه ۵ کسیزه ډله نیولې، چې په دې ولسوالۍ کې په ګڼو تخریبي او ورانکاره فعالیتونو کې ښکېل و. د دوی په وینا، یادو کسانو به د خلکو کورونو او نورو شتمنیو ته اور ورته کولو.
د پښتون ژغورنې غورځنګ مشر وايي، د دغه غورځنګ له لوري د نومبر د دولسمې له جرګې وروسته یو شمېر کسان د پاکستان پوځ له لوري بندیان او له شاوخوا ۷۰ ورځو وروسته ۵ کسان خوشې شول. په همدې نېټه د پښتون ژغورنې دوه نور غړي نورالله ترین او حنیف پښتین هم نیول شوي او لا هم بندیان دي.
د برېتانیا پخواني دفاع وزیر سِر لیام فاکس په ایران کې د ملايانو نسکورېدل د ایران د خلکو او د ازادې نړۍ لپاره ستره لاستهراوړنه بللې ده.
په ملګرو ملتونو کې د افغانستان د استازولۍ سرپرست د طالبانو له لوري د ۶ ښځو بندي کول غندلي او په بېړه او همداراز یې له قید و شرط پرته د یادو ښځو د ازادېدو غوښتنه کړې ده. طالبانو په تېرو ۱۲ ورځو کې یوه خبریاله په کندوز کې له څلورو نورو ښځو او یوه ټکواندو کاره په هرات کې نیولي دي.
نړیوالو مشرانو د امریکا د ولسمشر ډونالډ ټرمپ د «سولې بورډ» نوښت ته له احتیاطه ډک غبرګون ښودلی، ځکه دا د ملګلو ملتونو رول اغیزمنولای شي. دې طرحې ټرمپ د «سولې بورډ» دایمي مشر وړاندیز کړی چې د کار پیل به یې له غزې وي او وروسته به نورې نړیوالې شخړې هم په اجنډا کې راولي.
د طالبانو د میدان وردګ ولایت امنیه قومانداني وایي چې د دغه ولایت د مرکز میدان ښار اړوند پولاد خانې سیمه کې د یوې ناچاودې مرمۍ د چاودنې له امله یوه نجلۍ مړه شوې او درې نورې نجونې ټپي شوې دي.