د طالبانو تر واک لاندې د افغانستان بانک له خصوصي سوداګریزو بانکونو غوښتي چې په بهرنیو هېوادونو کې پانګونې کمې کړي او په کور دننه په ټولګټو پروژو کې پانګونې وکړي. یاد بانک دغه راز د بانکي پروسو پر ساده کولو او ډیجیټلي معاملاتو هم ټینګار کړی دی.
د ایران د بشري حقونو څارونکې ډلې «هه نګاو» راپور ورکړی، چې د ایران په بېلابېلو ښارونو کې د یوې اونۍ دوامدارو لاریونونو په ترڅ کې تر دې مهاله لږ تر لږه ۱۶کسان وژل شوي دي.
د عوامي نشنل ګوند مرکزي کمیټې ویلي، چې له افغانستان سره دې ټول مسایل د جګړې پرځای د خبرو او ترو له لارې حل شي او ژر تر ژره دې تړل شوې سوداګریزې لارې بېرته پرانېستل شي.
د نایجیریا د نایجر ایالت پر یوه بازار د وسلهوالو د برید له امله لږ تر لږه ۳۰ کسان وژل شوي او څو نور تښتول شوي دي. بریدګرو د بازار غرفې سوځولې او خوراکي توکي یې لوټ کړي دي.
پاکستاني رسنیو راپور ورکړی، چې د خیبر پښتونخوا په بېلابېلو سیمو کې د دوو جلا وسله والو بریدونو په پایله کې څلور پاکستاني پولیس وژل شوي دي.
له افغان شخصیتونو سره د طالبانو د تماس کمېسیون وايي، چې د تېر حکومت دوو پوځي پیلوټانو ته د «مصئونیت» کارتونه ورکړل شول. د یاد کمیسیون په وینا، دغه پيلوټان له اړیکې نیولو وروسته هېواد ته راستانه شوي دي.
د طالبانو سترې محکمې ویلي، چې په خوست، غزني او بلخ ولایتونو کې یې د غلا په تور پر څلورو کسانو د بدني جزا حکم عملي کړی او هغوی یې په عام محضر کې په دُرو وهلي دي.
د ایران د کار، تعاون او ټولنیزې هوساینې مرستیال وزیر سید مالک حسیني په کابل کې د طالبانو د کار او ټولنیزو چارو وزیر عبدالمنان عمري سره لیدلي او هغه ته یې د تهران د سفر بلنه ور کړې ده. دواړو لوریو د مسلکي کارګرو د ظرفیتونو لوړولو په برخه کې پر همکاریو خبرې کړې دي.
د طالبانو د ریاستالوزرا مرستیال ملا برادر په کندهار کې یوې غونډې ته ویلي، چې دوی په «سیاسي او اقتصادي مشارکت» باور لري. برادر وايي، «اوسنی سیاسي قدرت د ټولو په نسبت ثابت او متعادل» ساتل شوی او موازي سیاسي جریانونه، مخالف جهتونه او د ملي پرېکړو تهدیدوونکي اعمال له منځه تللي.
جرمني د شنبې په ورځ کابل ته یو بل « مجرم» افغان اخراج کړی دی. دغه افغان د مالک ز په نامه یاد شوی او ویل کیږي د طالبانو د تعقیب له ویرې یې جرمني ته پناه وړې وه، خو هغه په جرمني کې له ورکړل شوې مېلمهپالنې ناوړه ګټه واخېسته. په ۲۰۲۵ کال کې جرمني۸۳ مجرمان افغانستان ته ستانه کړي.
د طالبانو د هلمند ولایت د استخباراتو ریاست یو مکتوب د افغانستان انټرنشنل راپور تایید کړی، چې د هلمند یو اوسیدونکی فلک ناز د استخباراتو په نظارت خونه کې تر شکنجو لاندې وژل شوی دی. د وژل شوي کس فلک ناز کورنۍ نیوکه کوي، چې د طالبانو نظامي محکمه یې د رڼو څیړنو لپاره عریضه نه اخلي.
د افغانستان او پاکستان ترمنځ د سوداګریزو راکړو ورکړو د بیا فعالولو لپاره د دواړو هېوادونو سوداګریزو مشرانو په یوې انلاین غونډه کې د دوه اړخیزې سوداګرۍ د پراختیا او د لارو د بیا پرانېستل کېدو په تړاو خبرې کړې دي.
د طالبانو د پوهنې وزارت د ودانیو او املاکو د ساتنې رییس سمیع الحق حماس ویلي، چې د ۱۴۰۴ لمریز کال له پیل راهیسې د عادي بودیجې څخه د ۲۰۵ میلیونو افغانیو په لګښت ۴۳۰ مدرسې، تعلیمي او اداري مرکزونه بیارغول کېږي. له دې ډلې ۲۰۳ پروژې بشپړې شوې او پاتې ۲۲۷ پروژې د جوړېدو په حال کې دي.
د ملګرو ملتونو د خوړو نړیوال پروګرام (WFP)، خبرداری ورکړی چې اټکل کېږي په ۲۰۲۶ کال کې په ټوله نړۍ کې شاوخوا ۳۱۸ میلیونه کسان له شدیدې لوږې سره مخ شي.
د ایران اسلامي جمهوریت د کار، تعاون او ټولنیزې هوساینې وزارت مرستیال وزیر سید مالک حسینی د یوه لوړپوړي پلاوي په مشرۍ کابل ته سفر کړی، څو له طالب چارواکو سره د کاري اړیکو، د کار ځواک د تبادلې او د افغان کارګرانو د حقونو پر خوندیتوب خبرې وکړي.
د ملګرو ملتونو د ماشومانو صندوق(یونیسف) خبرداری ورکړی چې په کونړ ولایت کې د شپې تودوخې درجه تر صفر لاندې راټیټه شوې، او هغه کورنۍ چې د وروستیو زلزلو له امله بېکوره شوې دي، له سختې یخنۍ سره مخ دي.
د جمهوري نظام پر مهال د افغانستان د اطلاعاتو او کلتور وزیر عبدالکریم خرم، د امریکا له لوري پر ونزویلا برید ته په غبرګون کې ویلي، چې دا وضعیت ښيي چې ۲۰۲۶ کال به د جګړو کال وي او افغانستان ته به هم بدې پایلې ولري.
د طالبانو تر واک لاندې د کډوالو او راستنېدونکو چارو مسوولانو خبر ورکړی، چې پرون له ایران او پاکستان څخه ۳۹۰ افغان کورنۍ چې ټول ۲۰۹۶تنه کیږي د هېواد بېلابېلو لارو افغانستان ته جبري ستنې شوې دي.
د هرات ولایت طالب چارواکي وايي، په تېرو ۹ میاشتو کې له دغه ولایت څخه ۲۲٬۰۲۴ټنه تازه مېوې بهر ته صادر شوې چې ارزښت یې تر ۱۶ میلیونو ډالرو ډېر دی، دچارواکو په وینا، دې صادراتو د سیمې د اقتصاد او د بزګرانو عوایدو په زیاتولو کې مهم رول لوبولی دی.
د طالبانو امربالمعروف وزارت وایي، محتسبینو یې په خوست ولایت کې، په بېلابېلو اقداماتو کې شپږ مېرمنې د کورني ظلم، فزیکي او رواني ځورونې او غیر شرعي نکاح له ګواښونو څخه ژغورلي دي.
د ملګرو ملتونو د ښاري پراختیا اداره (UN-Habitat) وایي په کابل کې یې د جاپان د نړیوالې همکارۍ ادارې (JICA) له خوا پیل شوي «د پېسو په بدل کې کار» پروګرام خلکو ته د عاید فرصتونه برابر کړي، ترڅو د بېوزلۍ او اقتصادي ستونزو سره مبارزه وکړي او خپل ښاري چاپېریال ښه کړي.