د افغانستان کرېکټ ملي لوبډلې لوبډلمشر راشد خان د «خان فاونډېشن» په نوم بنسټ پرانېست چې موخه یې د بېوزلو افغانانو لپاره د روغتیايي خدمتونو پراختیا او عاجل ملاتړ دی. نوموړی وایي، له دې بنسټه یې موخه د بې وزلو لاسنېوی، روغتیايي فعالیتونه،د زده کړو ملاتړ او مرستندویه کارونه دي.
د جمهور نظام پر مهال د ولسمشر لومړي مرستیال امرالله صالح ویلي، په ترکیه کې د پاکستان او طالبانو مذاکرات ناکام شوي. هغه وايي، د پخوانۍ کوټې شورا استازي د خبرو د بنبست پړه پر پاکستان اچوي، خو اسلاماباد طالبان «ناشکره» بولي او د خپلې پخوانۍ انډیوالۍ له مخې یې په خیانت تورنوي.
یوه امریکایي چارواکي د جمعې په ورځ (د لړم ۱۶مه) ویلي، د ایران سپاه پاسداران تېر کال هڅه کړې وه، چې په مکسیکو کې د اسراییل سفیره عینات کرانز نایګر ووژني، خو دا پلان شنډ شوی او اوس داسې ګواښ نهشته.
د امریکا ولسمشر ډونالډ ټرمپ وایي، چې د امریکا هېڅ حکومتي چارواکی به د شلو سترو صنعتي هېوادونو (جي۲۰) سرمشریزې غونډې ته، چې د روانې میاشتې په وروستیو کې سویلي افریقا کې جوړېږي، ګډون ونه کړي. ترمپ د دغې پرېکړې دلیل په دغه هېواد کې د بشري حقونو روانې سرغړونې یادې کړي دي.
د افغانستان لپاره د پاکستان پخواني ځانګړي استازي اصف دراني د استانبول د خبرو د بندېدو په تړاو ویلي: «داسې ښکاري طالبانو پرېکړه کړې چې له اسلاماباد سره مقابلې ته دوام ورکړي. ویل کیږي، چې د پاکستان پلاوي تېر ماښام (جمعه د لړم ۱۶مه) د مذاکراتو ځای پرېښی دی.
د اذربایجان ولسمشر الهام علياف د پاکستان له لومړي وزیر شهباز شریف سره په کتنه کې د دواړو هېوادونو تر منځ د اقتصادي، سوداګرۍ او نظامي همکاریو په تړاو خبرې کړې دي. دواړو لورو په یادو برخو کې د اړیکو پر لا پراختیا ټینګار کړی دی.
د افغان کرېکټ د شل اوریزو ملي لوبډلې لوبډلمشر راشد خان په هالنډ کې د جمعې په ماښام (د لړم ۱۶مه) د «خان فاونډېشن» په پرانیست غونډه کې وویل،له نړۍ سره د سیال کېدو یوازنۍ لاره زده کړې دي او زياته کړه، د همدې فاونډېشن له لارې به د هېواد په بېلابېلو برخو کې ښوونیز مرکزونه هم جوړ کړي.
د امریکا ولسمشر ډونالډ ټرمپ د جمعې په ورځ (د لړم ۱۶مه) وویل، بهرني شرکتونه چې د غوښې د بستهبندۍ کار کوي باید د دې لپاره وڅارل شي چې دوی په امریکا کې د غوښې بیې قصداً لوړې کړي دي. ټرمپ عدلیې وزارت ته امر کړی، چې سمدستي د دغو شرکتونو پلټنه پیل کړي.
د افغانستان د ښځو تاریخ د تحول په نوم د ښځو د حقونو مدافع غورځنګ د طالبانو له لوري په هرات کې د ښځو لپاره د برقع د اجباري کولو پرېکړه په سختو ټکو غندلې او دا یې «غیرانساني او د ښځو ضد اقدام» بللی دی. یو شمېر ښځو په هرات کې د برقع د جبري کېدو په غبرګون کې برقع ته اور هم اچولی دی.
په جنیوا کې د افغانستان استازی نصیر احمد اندېشه وايي، د طالبانو او پاکستان د خبرو بندېدل د «هویت، مشروعیت او تاريخي حساب ورکولو» بحران ښکارندويي کوي. هغه زیاته کړې:«د طالبانو مشر له مذهبي اړخه د داسي صلاحیت ادعا کوي چې یوازې په افغانانو محدود نه دی.»
پاکستان ته د طالبانو د سرحدونو، قومونو او قبايلو چارو وزیر له ګواښ وروسته د دې ډلې د ملي راډیو ټلویزیون مرستیال هدایتالله هدایت هم پاکستان ګواښلی دی. هغه ویلي، که جګړه پیل شي نو د پاکستان وروستۍ جګړه به وي.
د پاکستان د بهرنيو چارو وزارت وياند ویلي، هند د امريکا د ولسمشر ډونالډ ټرمپ د اټومي ازمېښتونو اړوند څرګندونې تحريف کړي او د پاکستان د اټومي تاريخ په اړه ناسم تصوير وړاندې کوي. د امریکا ولسمشر ویلي، پاکستان د هغو هېوادونو له ډلې دی چې لا هم د اټومي وسلو ازمېښتونه ترسره کوي.
د پاکستان دفاع وزیر خواجه اصف ویلي، دا مهال د ترکیې په استانبول کې د پاکستان او افغانستان ترمنځ خبرې په بشپړ ډول بندې دي او په وینا یې، د خبرو اترو بل پړاو نشته. طالبانو لا تر اوسه په دې تړاو څه نه دي ویلي.
د طالبانو د کابل ولایت مطبوعاتي دفتر د یوې اعلامیې په خپرولو سره ویلي، چې د کابل ښار په تاریخي او ستر عيدګاه جامع جومات کې نن په رسمي توګه په جماعت سره د پنځه وخت لمونځ د ترسره کولو بهیر پیل شو.
د طالبانو د سرحدونو چارو وزیر نورالله نوري د پاکستان دفاع وزیر خواجه اصف ته خطاب کې ویلي: «ستا رواني حالت بد ښکاري، مریض یې، خپل رواني حالت کابو کړه.» نوموړي زياته کړې، چې د هند او بنګلهدېش پر وړاندې د پاکستان او د امریکا، روس او بریتانیا پر وړاندې د افغانستان تاریخ معلوم دی.
پاکستاني رسنیو راپور ورکړی، چې په استانبول کې د طالبانو او پاکستان ترمنځ مذاکرات کومې پایلې ته له رسېدو پرته درول شوي دي.
د ایسلېنډ د بهرنیو چارو مرستیال وزیرې په افغانستان کې د مېرمنو او نجونو د وضعیت په اړه اندیښنه څرګنده کړې او ویلي یې دی چې دوی له ښکاره جنسیتي ځورونې او تبعیض سره مخ دي.
د پاکستان د اطلاعاتو وزیر عطاالله تارړ د پاکستان او طالبانو ترمنځ د قطر او ترکیې له منځګړیتوب څخه مننه کړې، خو وايي، افغانستان د ترهګرۍ په کنټرول کې د اوږدمهاله نړیوالو، سیمه ییزو او دوه اړخیزو ژمنو پوره کولو کې پاتې راغلی دی.
د بلغاریا د کورنیو چارو وزارت چارواکي وايي، چې بېګاه ناوخته شپږ پناه غوښتونکي د پولیسو له تعقیب وروسته د موټر د ټکر له امله وژل شوي او څلور تنه نور ټپیان شوي دي. راپورونه وایي چې په دغه پناه غوښتونکو کې د افغانستان وګړي هم شامل دي.
د ایران د بشري حقونو سامان په خپل میاشتنې راپور کې ویلي، چې تېر اکټوبر میاشت کې په ایران کې د ۱۱ افغانانو په ګډون ۲۱۷ کسان اعدام شوي دي. د یاد سازمان د موندونو له مخې، په دغه هېواد کې په هرو درېیو ساعتونو کې یو کس اعدام شوی دی.
د طالبانو د بهرنیو چارو وزارت مالي او دارې مرستیال محمد نعیم وردګ وایي، طالبان پوهیږي چې د پاکستاني نظام دننه ځینې کړۍ هڅه کوي چې د کابل او اسلام اباد ترمنځ ترینګلتیا زیاته کړي او د استانبول خبرې اغېزمنې کړي.