فیاض احمد ابراهیمي او احمد قیومي د (MMA) رزمي لوبو دوه افغان لوبغاړي په بحرین کې د ۲۰۲۵کال د ځوانانو اسیایي لوبو په درېیم پړاو کې ښه وځلېدل. فیاض احمد ابراهیمي د ۷۵کیلو ګرامه وزن په کټګورۍ کې په لومړۍ لوبه کې خپل قرغزي سیال ته او په دویمه لوبه کې خپل هندي سیال ته ماتې ورکړه.
د طالبانو او پاکستاني ځواکونو ترمنځ له وروستیو نښتو او له هغې راوروسته د ډیورنډ کرښې په اوږدو کې د ټولو لارو تړل کېدو له کبله په افغانستان او پاکستان کې د خوراکي توکو بیې خورا لوړې شوې دي.
ملګرو ملتونو په تازه خپور شوي راپور کې ویلي، چې په تېرو دوو کالو کې په سوډان کې د جګړې له کبله ګڼې ننګونې رامنځته شوې او دا مهال په یاد هېواد کې تر ۳۰ مېلیونه ډېر کسان بشري مرستو ته اړ دي.
نن د ملګرو ملتونو د جوړېدو ۸۰مه کلیزه ده. د ملګرو ملتونو سازمان په ۱۹۴۵کال کې تر دویمې نړۍوالې جګړې وروسته رامنځته شو، چې د نړۍوالو کړکېچونو په حل کې مرسته وکړي.
د روان ۲۰۲۵کال له پیل راهیسې په خیبر پښتونخوا کې په وسلهوالو پېښو کې ۲۹۸ پولیس او ملکي وګړي وژل شوي دي. د پاکستان د ترهګرۍ ضد ادارې د راپور له مخې؛ روان کال په بېلابېلو وسلهوالو پېښو کې ۱۱۷ پولیس او ۱۸۱ ملکي وګړي وژل شوي او ۴۸۶ نور ټپیان شوي دي.
په کابل کې د ایران سفیر، علي رضا بیکدلي، ویلي چې د افغانستان او ایران ترمنځ د اوبو د شخړو موضوع باید له پامه ونه غورځول شي، او دواړه هېوادونه باید د «هرېرود سیند»په اړه یوې نوې هوګړې ته ورسېږي.
د طالبانو سرې میاشتې ادارې د پنجشنبه په ورځ (د لړم لومړۍ) نېټه په یوه خبرپاڼه کې ویلي، چې د لغمان په مرکز مهترلام او علینګار ولسوالۍ کې له ۲۵۰ زلزله ځپلو کورنیو سره د غیري خوراکي توکو مرسته کړې. طالبانو ویلي، چې دغه مرسته یې د ملک سلمان د بشري مرستو د مرکز له لورې چمتو شوې.
د ملګرو ملتونو پرمختیايي پروګرام (یو این ډي پي) وایي، چې د افغانستان ۵ خصوصي شرکتونو خپل کرنیز محصولات د سعودي عربستان په ۲۴۲م نړیوال کرنیز نندارتون کې نندارې ته وړاندې کړي دي.
ډونالډ ټرمپ د پنجشنبې په ورځ د کریپټو شرکت «بینانس» پخوانی اجراییوي مشر «چانګپينګ ژاو» بښلی دی. هغه د ۲۰۲۳ کال په نومبر کې د د پیسو سپينولو په تور مجرم پېژندل شو، چې د ده په مشری د ایران سره د سلګونو میلیونه ډالرو ناقانونه مالي راکړه ورکړه ترسره شوې وه.
په پاکستان کې د کډوالې افغانې سندرغاړې «اسما وصال» خور خوشي مهتاب، افغانستان انټرنشنل – پښتو ته تایید کړې چې خور یې(اسما وصال) پاکستاني پولیسو تېره ورځ په اسلام اباد کې د ویزې د اعتبار نېټې د پای ته رسېدلو له امله نیولې ده.
د روسیې د ملي امنیت د شورا مرستیال او پخواني ولسمشر دیمیتري مدودف ویلي، د امریکا وروستي بندیزونه ښکاره کوي چې واشنګټن اوس د مسکو «ښکاره دښمن» ګرځېدلی او د ډونالډ ترمپ وروستي ګامونه د روسیې پر ضد د «جګړې عمل» بلل کېږي.
د افغانستان د مدني ټولنې یو شمېر بنسټونو او په پاکستان کې مېشتو افغانانو له اسلاماباد څخه غوښتنه کړې چې د افغان پناهغوښتونکو د جبري ایستلو لړۍ دې سمدستي دروي.
د پاکستان لومړي وزیر شهباز شریف په مشرۍ د کابینې غونډې د دغه هېواد د ترهګرۍ د قانون له مخې د «تحریک لبیک» په نوم ډله د یوې ترهګرې ډلې په توګه اعلان کړه. په غونډه کې ویل شوې، چې دغه ډلې د ۲۰۱۶ کال راهیسې په پرله پسې ډول په پاکستان کې ناامني جوړه کړې او د تاوتریخوالي لامل ده.
د بشري حقونو څار بنسټ په افغانستان کې د رسنیو او خبریالانو د وضعیت په اړه په یوه نوي راپور کې ویلي، طالبان د قومي لږکیو، په ځانګړې توګه د هزاره خبریالانو سره ډیر بد چلند کوي. په دې راپور د یوه خبریال له قوله ویل شوي «طالبان هزاره خبریالان خپل دښمنان ګڼي.»
د روسیې ولسمشر ولادیمیر پوتین ویلي، مسکو به هېڅکله د امریکا یا بل بهرني ځواک تر فشار لاندې سر ټیټ نکړي. نوموړي د امریکا د نوو بندیزونو او د اوکراین د وسلې غوښتنې په اړه وویل، «که هر هېواد د روسیې پر خاوره برید وکړي، سخت ځواب به ترلاسه کړي».
په کابل کې د ایران سفیر علي رضا بیکدلي، ویلي چې د نوي طرحې له مخې به د کار ویزې یوازې هغو افغان وګړو ته ورکړل شي، چې له ایراني کارورکونکي رسمي بلنه یا اجازنامه ولري.
د ازادو لوبو افغان اتل احمدولي هوتک په بیلاروس کې خپل روسي سیال ته په ماتې ورکولو سره اتلولي تر لاسه کړه. د هوتک د لوبیز ژوند په نړیوالو سیالیو کې دا ۱۲مه بریا وه چې تر لاسه کوي یې.
د بلخ لپاره د طالبانو د والي ویاند وايي، د دغه ولایت والي تاجکستان ته د خپل سفر پر مهال یو شمېر دیني علماو د طالبانو د مشر هبتالله اخوندزاده د ویناو او پالیسیو کتابونه او د طالبانو منشور په دې موخه ورکړي چې د دوی د مفکورې په تړاو معلومات تر لاسه کړي.
د افغانستان ازادۍ جبهې ادعا کړې، چې تېره شپه ناوخته یې د کندهار میوند ولسوالۍ اړوند د لشکرګاه دوراهې سره په یوه برید کې دوه سیمه ییز طالبان وژلي او یو بل یې ټپي کړې. دوی ویلي، چې په دې برید کې د طالبانو یو نظامي موټر هم تخریب کړی دی.
د طالبانو د اطلاعاتو او فرهنګ وزارت مرستیال مهاجر فراهي پر خپلې اېکس پاڼې لیکلي چې د طالبانو د اوبو او انرژۍ وزیر ته ملا هبت الله اخوند زاده امر کړی چې د کونړ پر سیند د بندونو د جوړولو چارې چې هر څومره ژر ممکن وي، پیل کړي.
د جنوبي اسیا لپاره د بښنې نړیوال سازمان د پاکستان له خوا د ترهګرو په نوملړ کې د ۲۳ بلوچ فعالانو خپل سري شاملولو په اړه غبرګون ښودلی. د دغه سازمان مرستیال ویلي، چې دا محدودیتونه او بې ځایه بندیزونه د قانوني بهیر، د هغوی د ازادۍ او بشري حقونو سپکاوی دی.