د طالبانو د صنعت او سوداګرۍ وزیر نورالدین عزیزي ویلي، چې په افغانستان کې استبداد، سیاسي ظلمونه، بېوزلي او بېکاري د کډوالۍ اصلي لاملونه دي. هغه دغه څرګندونې په کابل کې د افغانانو د کډوالۍ اړوند مسایلو د څېړنې په یوه کنفرانس کې کړې دي.
په هرات کې د طالبانو والي مولانا اسلام جار ویلي، چې د تازه مېوو د صادراتو په برخه کې یو شمېر جدي اسانتیاوې رامنځته کوي؛ څو اداري چارې چټکې شي او د هر ډول ځنډ و خنډ مخه یې ونیول شي.
د امریکا د فېډ پر خپلواکۍ د ټرمپ نیوکو او د فېډ مشر جیروم پاول د بدلون ګونګوسو؛ په نړۍوالو بازارونو کې د ډالرو پر ارزښت اغېز کړی دی.
د طالبانو د امربالمعروف، نهې عن المنکر او شکایتونو اورېدو وزیر خالد حنفي د عصري زدهکړو ارزښت په تړاو ویلي، مسلمانانو لومړی ساعت او کاغذ جوړ کړی چې دا یې د نوښتونو بېلګه ده.
د لوګر ولایت لپاره د طالبانو سیمهییزو چارواکو ویلي، چې په دغه ولایت کې یې ۴۵ زره جریبه غصب شوې ځمکه راګرځولې ده.
په بلخ کې د طالبانو ولایت مقام رسنیز دفتر د (چنګاښ ۵مه) نېټه خبر ورکړی، چې چین غواړي په دغه ولایت کې د ۲۳۰ مېلیونه افغانیو په لګښت د میوو او سبزیجاتو لپاره یوه معیاري سړه خونه جوړه کړي.
د اسراییل د استخباراتو یا "موساد" رييس ډېوېډ بارنیا په یوې ټلوېزیوني وینا کې د ایران پر وړاندې د "موساد" له عملیاتو ستاینه وکړه او د ایران پر فعالیتونو د کره څارنې پر دوام یې له ټينګار سربېره په یادو عملیاتو کې د امریکا د استخبارتي ادارې له کلیدي رول څخه هم مننه وکړه.
د امریکا ولسمشر ډونالډ ټرمپ د اسراییل د لومړي وزیر بنیامین نتنیاهو محاکمه یوه "شرموونکې ننداره" بللې او د هغې د سمدستي لغوه کولو یا د بشپړې بخښنې غوښتنه یې کړې ده.
په لندن کې د ایران سفیر علي موسوي د برېتانیا د پارلمان په یوې غونډه کې په برېتانیا کې د مېشتو ایراني خبریالانو په ګواښولو کې د تهران دخالت رد کړ.
هندي رسنۍ «ټایمز اف انډیا» راپور ورکړی، هغه پاکستاني پوځي افسر چې د هند د هوایي ځواک د پيلوټ «ابینندن ورتهمان» د نیولو ادعا یې کړې وه، د سوېلي وزیرستان سراروغه سیمه کې د پاکستاني طالبانو (ټي ټي پي) سره د نښتې پر مهال وژل شوی دی.
د افغانستان د اسلامي وحدت ګوند مشر محمد محقق د امریکا د هغې پرېکړې هرکلی کړی، چې له مخې یې طالبانو ته مرستې بندوي. نوموړی وایي، چې طالبان له څلورو کلونو راهیسې د امریکایی مالیه ورکوونکو له پیسو څخه ځان تغذیه کوي او پر افغانانو ظلم کوي.
د ترکیې ولسمشر د ناټو د غړو هېوادونو د مشرانو غونډه کې چې د هالنډ په هاګ کې جوړه شوې وه، د اسراییل او ایران ترمنځ د جګړې په اړه وویل چې دا نښتې پر ایران د اسراییل له برید وروسته پیل شوې. رجب طیب اردوغان هیله وښوده، چې د اسراییل او ایران ترمنځ اوربند به په دايمي سولې بدل شي.
د هرات سیمهییزو طالب چارواکو ویلي، چې ایران یوازې د چهارشنبې په ورځ له خپلې خاورې تر ۳۰ زرو ډېر افغان کډوال د اسلامکلا له لارې اېستلي دي.
د بلخ ولایت پخواني والي عطا محمد نور د خپلې اېکس پاڼې له لارې د ایران او اسراییل ترمنځ د اوربند په تړاو د مبارکۍ یو اوږد پیغام او تحلیل خپور کړی او په دغه پیغام کې یې ایران د دې جګړې ګټونکی بللی دی.
د ښځو او ماشومانو لپاره د عدالت غوښتنې د یوې څېړنیزې شبکې د راپور پر بنسټ، په افغانستان کې د طالبانو له بیا واکمنېدو راهیسې څه باندې ۹۰ سلنه ښځې له خپلو دندو ګوښه کړای شوې دي.
په روسیه کې د ایران سفیر کاظم جلالي د یوې افغان ماشومې پر وړاندې د "غېر انساني او کرکجن" برید په غبرګون کې له طالبانو غوښتي، چې د دې پېښې په اړه ژر تر ژره اقدام وکړي او خپل رسمي غبرګون وښيي.
د افغانستان د موی ټای ملي لوبغاړي "سید روح الله موسوي" په تاریخ کې د لومړي ځل لپاره د اسیا له موی ټای سیالیو د سرو زرو مډال وګاټه.
د برېتانیا، کاناډا او سویس مشرانو په هالنډ کې د ناټو د غړو هېوادونو په سرمشریزه کې اعلان کړی، چې دوی غواړي هغه امریکايي «F-35» جنګي جېټ الوتکې وپېري چې د اټومي بمونو د لېږد وړتیا لري.
د افغانستان لپاره د ملګرو ملتونو استازولۍ (یوناما) خبرداری ورکړی، چې اقلیمي بدلونونو د سوېلي او مرکزي اسیا د تودوخې څپې زیاتې کړې دي. یوناما ویلي، چې د چنګاښ له ۱۰ تر ۱۲ نېټې پورې افغانستان به د یوې سختې تودې څپې شاهد وي، چې د هوا تودوخه به د معمول په پرتله لوړه وي.
د طالبانو د کډوالو او بېرته راستنېدونکو چارو وزارت په یوه اعلامیه کې د ملګرو ملتونو د کډوالو عالي کمیشنرۍ هغه وروستی راپور په کلکه رد کړی، چې پکې ویل شوي ګواکې په تېرو پنځو میاشتو کې ۱.۲ میلیونه افغانان له هېواده وتلي او نورو هېوادونو ته کډوال شوي دي.
د طالبانو د لوړو زده کړو مالي او اداري مرستیال وایي: «په ځينو شرایطو کې کډوالي روا، واجب او ان د الله له لوري فرض کېږي.» نوموړي ویلي، چې اوس وطن امن دی او له دلیل پرته کډوالي له هېواد سره جفا ده.