د طالبانو د کار او ټولنیزو چارو وزیر عبدالمنان عمري د کار عالي شورا په څلورمه نوبتي غونډه کې وویل، په هېواد کې به د بېکارۍ کچې د راټیټولو او د کارموندنې په موخه د درېیو وزارتونو او خصوصي سکټور ترمنځ په ګډه یوه تخنیکي کمېټه رامنځته شي.
رویټرز په ایران کې د شپږو اوسنیو او پخوانیو چارواکو له قوله راپور ورکړی، چې د اسلامي جمهوریت چارواکي اندېښمن دي، چې د امریکا هر ډول احتمالي برید ښايي پر واک د دوی کنټرول کمزوری کړي او اعتراض کوونکي به یو ځل بیا واټونو ته راوباسي.
طالبان وايي، په بدخشان کې یې د یوې ښځې په ګډون د غلو یوه ۳ کسیزه ډله نیولې ده. د مسوولانو په وینا، دغه ډله د دوشنبې په ورځ (د سلواغې ۱۳مه) په کشم ولسوالۍ کې له یوه صراف څخه د پیسو د غلا پر مهال لاس په لاس نیول شوې ده.
رویټرز د یوه لوړپوړي ایراني چارواکي له قوله راپور ورکړی، چې تهران له واشنګټن سره د احتمالي خبرو اترو لپاره د «انعطاف» ښودلو ته چمتو دی.
په هرات کې د طالبانو رسنیز دفتر خبر ورکړی، چې په دغه ولایت کې له ګاونډیو هېوادونو څخه ۱۲۰۰ راستنو شویو کورنیو سره د خوراکي توکو ترڅنګ نغدي مرسته شوې ده. د خبرپاڼې لهمخې، هرې کورنۍ ته ۲۵۰ کیلوګرامه غنم او ۵ زره افغانۍ ورکړل شوې دي.
روسیې د خپل هېواد د کاري ځواک د سخت کمښت د جبران په موخه له افغانستان سره د افغان کارګرو د جذب په اړه خبرې اترې پیل کړې دي. مسکو ټایمز ورځپاڼې د فبرورۍ په ۲مه په یوه راپور کې د مسکو لپاره د افغانستان د سفیر له قوله لیکلي، چې د دواړو لوریو ترمنځ په دې تړاو خبرې روانې دي.
د امریکا ولسمشر ډونالډ ټرمپ وايي، د هند له لومړي وزیر نرېندرا مودي سره یې د سوداګرۍ او همداراز د روسیې او اوکراین د جګړې د پای ته رسېدو په تړاو خبرې کړې دي. ټرمپ ویلي، هند موافقه کړې، چې تر دې وروسته به د روسیې پر ځای له امریکا او احتمالاً له ونزوېلا نفت وپېري.
د هند او طالبانو ادارې ترمنځ د اړیکو له تودېدو سره هممهاله، هند په خپله نوې مالي بودیجه کې له افغانستان سره یو اعشاریه پنځه میلیارده هندي روپۍ چې شاوخوا ۱۶ نیم میلیونه امریکايي ډالره کېږي، د مرستې په توګه ځانګړې کړې دي.
د پېښو پر وړاندې د طالبانو د چمتووالي ادارې مشر ویلي، د بېړنیو مرستو د دوام تر څنګ د دې ادارې اساسي لومړیتوب د بنسټیزو وقایوي پروژو پلي کول دي، څو د طبیعي پېښو ګواښونه راکم او د انساني تلفاتو او مالي زیانونو مخه ونیول شي.
د ایران د بهرنیو چارو وزارت اعلان کړی، چې د دغه هېواد د بهرنیو چارو وزیر سید عباس عراقچي د دوشنبې په ماښام د اردن د بهرنیو چارو له وزیر اېمن الصفدي سره په ټلیفوني اړیکه کې د سیمې د وروستیو سیاسي او امنیتي بدلونونو په اړه د نظر تبادله کړې ده.
د افغانستان بانک، چې دا مهال د طالبانو تر کنټرول لاندې دی، اعلان کړی چې ۵۸۸میلیونه او ۱۴۰زره افغانۍ زاړه او مندرس بانکنوټونه یې په کابل کې سوځولي دي.
د امریکا ځانګړی استازی سټیو ویټکاف او د ایران د بهرنیو چارو وزیر عباس عراقچي د جمعې په ورځ په استانبول کې سره ګوري. یو امریکایي چارواکي ویلي، « ټرمپ غواړي دواړې خواوې موافقه وکړي. دا لیدنه د دې لپاره ده چې واوري هغوی څه وایي».
د افغانستان کرکټ ملي لوبډلې د۲۰۲۶کال نړیوال جام تر پیل وړاندې په خپله لومړۍ تمریناتي لوبه کې د سکاټلنډ ملي لوبډلې ته د ۶۱منډو په توپیر ماته ورکړه.
د سولې نوبل جایزې ګټونکې ملاله یوسفزۍ وایي چې د طالبانو نوې جزایي اصولنامه په افغانستان کې د ښځو او نجونو پر وړاندې سیستماتیک تاوتریخوالی لا ډېروي.
د پاکستان دفاع وزیر خواجه اصف ویلي چې د بلوچستان پراخ جغرافیایي جوړښت، ناسم امنیتي وضعیت او وروستیو بریدونو ته په کتو، هلته د لوی شمېر پوځیانو ځای پر ځای کول اړین دي. هغه وویل چې په بلوچستان کې د قومي مشرانو، بیوروکراسۍ او بېلتونپالو خوځښتونو ترمنځ اړیکې موجودې دي.
د طالبانو مخالفه وسله واله او سیاسي ډله «مقاومت جبهه» ادعا کوي چې تېر ماښام یې د کندز ولایت په شپږمه امنیتي حوزه کې برید کړې، دوه طالب وسله وال یې وژلي او ۳ نور یې شدید ټپیان کړي دي.
برېټانیايۍ جوړې پیټر او باربي رینالډز د طالبانو له زندان نه تر خلاصون وروسته په لومړي ځل د کابل د څرخي پله زندان د شرایطو په اړه څرګندونې کړې دي. ۷۶ کلنې باربي ویلي، له هغو میرمنو سره ساتل کیده چې ویل یې دوی د موټر چلولو یا د خپلو مېړونو د جرمونو له امله بندیانې شوې دي.
په بلوچستان کې وروستۍ وسله والې حملې د سیمې د اوږدمهاله شخړې د نوي او پېچلي پړاو څرګندونه کوي. دغه بریدونه په لسګونو ښارونو کې په یو وخت ترسره شول، چې هم د تاوتریخوالي د شدت، هم د بېلتونپالو ډلو د وړتیا او هم د سیمهییزو امنیتي جوړښتونو د کمزورتیا یو مهم پیغام لري.
د شمالي وزیرستان په شیوه کې د کابلخېل قوم ګډې جرګېپرېکړه کړې، چې دوی د پوځ په غوښتنه له خپلو سیمو څخه نه وځي او که څوک وځي، هغوی به ناغه کیږي. پاکستاني پوځ له خلکو غوښتي چې یا دې خپله له سیمې ووځي او یا دې طالبان له سیمې وباسي.
د ننګرهار مقام ولایت رسنیز دفتر وايي، چې په دغه ولایت کې یوې مور څلور ماشومان زېږولي چې درې هلکان او یوه نجلۍ دي. د روغتیا پالانو په وینا ، د مور او ماشومانو روغتیايي وضعیت د ډاډ وړ دی.
د طالبانو ستره محکمه وایي چې نن دوشنبه د سلواغې په ۱۳ مه نېټه یې په کابل او فاریاب ولایتونو کې د بېلابېلو جرمونو په تور پر ۴۰ کسانو په عام محضر کې د دُرو وهلو سزاوې عملي کړې دي.