د طالبانو امر بالمعروف نهې عن المنکر او شکایتونو اورېدو وزارت خبر ورکړی، چې په دایکنډي ولایت کې یې «د فرهنګي او دیني ارزښتونو» د ساتنې لپاره د سلمانیو له مسوولینو سره ناسته کړې ده.
د طالبانو د امر بالمعروف او نهې عن المنکر وزارت وزیر خالد حنفي وایي، چې په دین کې د چا پر شخصي حریم د تېري اجازه نشته. دغه وزارت پر اېکس پاڼه د ښاغلي حنفي په حواله لیکلي، چا ته هم اجازه نشته، چې د خلکو ګرځنده ټیلیفونو، جېبونو او کورنو کې د اجازې پرته لاسوهنه وکړي.
د افغانستان لپاره د پیوستون کمیټه چې پخوا یې د «د سویډن کمیټې» په نوم فعالیت کاوه وایي، چې نړۍوالو بندیزونو او د طالبانو محدودیتونو د افغانستان خلک اغېزمن کړي دي.
د ملګرو ملتونو امنیت شورا د راتلونکې میاشتې په لومړیو ورځو کې د افغانستان په اړه ناسته لري. دغه ناسته به د (چنګاښ میاشتې په ۲مه نېټه او د جون په ۲۳مه نېټه) جوړه شي.
د پاکستان ډان ورځپاڼې په یوې سرمقاله کې لیکلي، سیمهییز ادغام او سوداګري هغه وخت وده او پرمختګ کولای شي چې د افغانستان خاوره له ترهګرو ډلو څخه پاکه شي.
د طالبانو عامې روغتیا وزارت خبر ورکړی، چې چین ورسره ۳۳زره ډوزه د انفلونزا او ۳۳زره ډوزه د مننژیت واکسینو مرسته کړې ده. د طالبانو عامې روغتیا وزارت پر اېکس پاڼه د چینایي استازي په حواله لیکلي، چې دغه مرستې به لا پراخه شي او نورو برخو ته به هم وغځېږي.
الجزیرې په غزه کې د روغتیایي سرچینو په حواله خبر ورکړی، چې د اسراییل په تازه بریدونو کې لږ تر لږه ۴۵ کسان وژل شوي دي.
د خوړو نړۍوال پروګرام وایي، چې افغانستان د خپل تاریخ په اوږدو کې د تغذیې تر ټولو بد ناورین سره مخ دی. په افغانستان کې د خوړو نړۍوال پروګرام استازي او مشر جان ایلیف په وینا؛ په دغه هېواد کې ماشومان تر ټولو ډېر له دغه ناورین څخه اغېزمن دي.
د امریکا ولسمشر ډونالډ ټرمپ له ایران سره د احتمالي هوکړې په اړه ویلي:« موږ به د یورانیمو غني کولو اجازه ورنهکړو.»
د پاکستان د خلکو ګوند مشر او د بهرنیو چارو پخوانی وزیر بلاول بوټو زرداري په ملګرو ملتونو کې د امریکا استازې ډوروتي شیا سره په ليدنه کې ویلي، چې پاکستان د ترهګرۍ سره د جګړې په لومړۍ کرښه کې و او ډېرې قربانۍ یې ورکړې دي.
د ۲۰۲۵ کال د غوره ورزشي کتابونو د پېژندنې په رسمي غونډه کې چې په لندن کې جوړه شوې وه؛ د افغانستان د ښځینهو فوټبال ملي لوبډلې د پخوانۍ لوبغاړې خالده پوپل کتاب «زما ښکلې خویندې» د کال د غوره ورزشي کتاب جایزه وګټله.
د سند ایالت د کراچۍ ښار له «ملیر» بندخونې څخه څه باندې ۲۰۰ بندیان تښتېدلي دي. د جیونیوز په ګډون یو شمېر پاکستاني رسنیو راپور ورکړی، چې دغه پېښه د دوشنبې په ورځ د زلزلې د ټکانونو پر مهال شوې ده.
العربیه د یوه امریکايي چارواکي له قوله راپور ورکړی، چې ۵۰۰ امریکايي سرتېري به له سوریې ووځي او په دغه هېواد کې به دوه پوځي اډې وتړل شي. د راپور له مخې، یوه پوځي اډه به د سوریې ډېموکراتیکو ځواکونو ته ورکړل شي.
د افغانستان د فوټبال پنځه داوران وتوانېدل، چې د نړۍوال فوټبال فدراسیون (فیفا) د نړۍوالو داورانو رسمي نوملړ ته لار پیدا کړي.
د واینټ وېبپاڼې راپور ورکړی، چې د امریکا د بهرنیو چارو وزیر مارکو روبیو هغه درې لوړپوړي چارواکي له دندو لرې کړي، چې له اسراییل سره یې نږدې اړیکې لرلې.
د پاکستان په پلازمېنې اسلاماباد کې پېژندل شوې ۱۷ کلنه ټیک ټاکره او یوټیوبره ثناء یوسف د ناپېژندو کسانو له خوا وژل شوې ده. جیونیوز د پولیسو د سرچینو له قوله ویلي، چې دا پېښه د اسلاماباد په تهانه سنبل سیمه کې رامنځته شوې ده.
د برېتانیا حکومت وایي، چې د عصري ګواښونو لکه د روسیې د زیاتېدونکي نفوذ، اټومي ګواښونو او سایبري بریدونو پر وړاندې به خپل دفاعي سیاست په بنسټیز ډول بدل کړي. د دغه نوي پلان له مخې، پر دودیز پوځ د تکیې پر ځای به پر ډرونونو، ټېکنالوژۍ او ډیجیټل جګړې پانګونه وشي.
دوو باخبرو سرچینو د دوشنبې په ورځ افغانستان انټرنشنل ته وویل، چې د بدخشان ولایت د یمګان ولسوالۍ اوسېدونکی سېد قیامالدین په جلالاباد ښار کې د خپلې دندې پر ځای ووژل شو.
د ۲۰۲۵ کال د هند غوره لیګ کرېکټ سیالیو پایلوبه نن سې شنبه د احمداباد ښار په نرېندرا مودي لوبغالي کې تر سره کېږي او پنجاب کینګز او رویال چلنجر لوبډلې د جام ګټلو لپاره خپل بخت ازمايي.
د متحده ایالاتو په کلوراډو ایالت کې له پروني خونړي برید وروسته د امریکا حکومت ټولو هغو ترهګرو، د هغوی د کورنیو غړو او ملاتړو ته چې په دې هېواد کې په ویزه مېشت دي، د اېستلو سخت خبرداری ورکړی دی.
د جرمني د بهرنیو چارو پخوانۍ وزیره انالنا بربوک د دوشنبې په ورځ د ملګرو ملتونو د عمومي اسمبلۍ د نوې مشرې په توګه وټاکل شوه. نوموړې د دې ۸۰ کلنې نړۍوالې ادارې په تاریخ کې لومړنۍ اروپایي او په ټوله کې پنځمه ښځه ده، چې دې مقام ته رسېږي.