د پاکستان امنیتي سرچینو افغانستان انټرنشنل ته ویلي، چې د یوې ځايي جرګې په منځګړیتوب د پاکستان پوځ او پاکستاني طالبانو تر منځ د وژل شویو جنګیالیو مړي سره تبادله شوي دي. په دې لړ کې ۷ مړي د پاکستاني پوځ او ۱۱ یې د ټيټيپي جنګاليو وو. دغه جنګیالي په پښتونخوا کې وژل شوي وو.
فلسطیني چارواکي وايي، اسراییلي ځواکونو لږ تر لږه ۳۰ استوګنیزې ودانۍ په غزې ښار کې ویجاړې کړې او زرګونه خلک یې له خپلو کورونو نه وتلو ته اړ کړل. دا په داسې حال کې ده، چې د امریکا د بهرنیو چارو وزیر مارکو روبیو د شنبې په ورځ د جګړې د راتلونکي په اړه د خبرو لپاره اسراییل ته تللی و.
د امریکا ولسمشر ډونالډ ټرمپ د خبریالانو د پوښتنو په ځواب کې د یوه خبریال د غوښتنې پر اساس د قطر پر ضد د اسراییل د برید په تړاو د اسراییل لومړي وزیر بنیامین نتنیاهو ته په خپل پیغام کې وویل: «زما پیغام دا دی چې هغوی باید ډېر، ډېر احتیاط وکړي.»
د افغانستان له رسنیو د ملاتړ سازمان د تېرې یوې اوونۍ په لړ کې په هېواد کې د رسنیو او خبریالانو د فعالیتونو پر وړاندې د وروستیو محدودیتونو په تړاو ژوره اندېښنه څرګنده کړې او له نړۍوالو یې غوښتي، چې د طالبانو له لوري پر رسنیو د محدودیتونو پر وړاندې جدي دریځ غوره کړي.
د خامنهیي د استازي تر مدیریت لاندې کیهان ورځپاڼې پر دوحې د اسراییل برید ته په اشارې ویلي: «د سیمې پر هېوادونو د اسراییل د برید لپاره د عربي هېوادونو هوايي حریم کارول کېږي، خو کله چې ایران د ۱۲ ورځنۍ جګړې پر مهال پر اسراییل برید ته چمتو شو، د هغه توغندي او ډرونونه وځپل شول.»
د «زموږ تر منځ سړک، وروستۍ ژغورنه» په نوم مستند د یوه تقاعد شوي اسراییلي جنرال د هڅو په تړاو دی، چې غواړي د اکټوبر پر اوومه د حماس د برید پر مهال خپله کورنۍ وژغوري. دغه مستند د ټورنټو فلم په فیسټيوال کې د نندارچینانو د جایزې ګټونکی شو.
د ترکیې په انقره کې لسګونه زره کسانو د خلق جمهوري پال ګوند د قضايي څار پر ضد لاریون وکړ. دغه قضايي څار به د دې لامل شي، چې د رجب طیب اردوغان د دولت د مخالف ګوند مشر ګوښه شي. پر دغه ګوند له شاوخوا یوه کال راهیسې دغه ډول فشارونه دوام لري.
د تاجکستان د بشري مرستو لومړۍ کڅوړه د زلزلهځپلو لپاره ننګرهار ته ورسېده. دغه درې زره ټُنه مرستې چې خوراکي او غېرخوراکي توکي پکې شامل دي، په ۹ لاریو کې جلالاباد ته لېږدول شوې دي. طالبان وايي، د تاجکستان د مرستو څه باندې ۱۰۰ نورې لارۍ به هم افغانستان ته داخل شي.
د قطر لومړی وزیر او د بهرنیو چارو وزیر شېخ محمد بن عبدالرحمان بن جاسم ال ثاني وايي، له امریکا او مصر سره به په ګډه په غزه کې د اوربند لپاره په مذاکراتو کې منځګړیتوب ته دوام ورکړي.
د اسراییل پوځ وایي، چې د حماس مشران په داسې حال کې د دې ښار له اوسېدونکو غواړي چې له سیمې ونه وځي، چې دوی خپله د ژوند د له لاسه ورکولو له وېرې د غزې د پرېښودو هڅه کوي. پوځ زیاتوي، د حماس ځینې مشران پخپله هم د غزې د پرېښودو غوښتونکي دي.
د ایران د صنعت، کانونو او سوداګرۍ وزیر سید محمد تابک به سبا (دوشنبه د وږي ۲۴مه) د یوه پلاوي په مشرۍ کابل ته سفر وکړي. سید محمد اتابک به په دې سفر کې له طالب چارواکو سره د سوداګریزو او اقتصادي اړیکو د پراختیا په تړاو خبرې وکړي.
د هند کرېکټ ملي لوبډلې د اسیا جام په روانو سیالیو کې پاکستان ته د ۷ وېکټو په توپیر ماتې ورکړه. دغه سیالي نن ماښام (یکشنبه د وږي ۲۳مه) د پاکستان په توپ وهنې سره پیل شوه او په شلو اورونو کې د خپلو نهو لوبغاړو په سوځېدو ۱۲۷ منډې جوړې او هند ته یې د ۱۲۸ منډې هدف ورکړ.
په ایران کې د افغانستان د سفارت لپاره د طالبانو سرپرست فضل محمد حقاني د یکشنبې په ورځ (د وږي ۲۳مه) د ایران د علومو، څېړنو او ټکنالوژۍ له مرستیال وزیر سعید حبیبا سره په کتنه کې په دغه هېواد کې د افغان زده کړیالانو د ستونزو په تړاو خبرې کړې دي.
د طالبانو د امر بالمعروف او نهی عن المنکر وزارت وايي، چې د فاریاب ولایت په پښتونکوټ او بلڅراغ ولسوالیو کې هغه درې نجونې چې له سپینږیرو سره نکاح کولو ته اړ اېستل شوې وې، د دغه وزارت د محتسبینو لهخوا یې مخنیوی وشو.
په بامیان ولایت کې د دوو جلا-جلا ټرافیکي پېښو په پایله کې ۳ کسان مړه شوي او ۲ نور ټپیان دي. د دغه ولایت د طالبانو مسوولین وايي، دغه پېښې د یکشنبې په ورځ (د وږي ۲۳مه) په مرکز بامیان او ورس ولسوالۍ کې رامنځته شوې دي.
د مقاومت په نوم د طالبانو مخالفه جبهه ادعا کوي، چې تېره شپه (د وږي ۲۲مه) شاوخوا ۸ نیمې بجې یې په ګذرې ولسوالۍ کې د پولیسو د روزنې مرکز ته نږدې په یوه وسله وال برید کې ۳ طالبان وژلي او وسلې یې هم ترې غنیمت کړي دي.
په افغانستان کې د ملګرو ملتونو ځانګړې استازې روزا اوتنبایېوا د افغانستان په ختیځ کې د وروستۍ زلزلې له امله اغېزمنو کورنیو ته د مرستو برابرولو کې د سیمې د خلکو زړورتیا ستایلې ده او د مرستو په رسولو کې یې د ښځو رول مهم بللی دی.
په کابل کې ځینو سرچینو افغانستان انټرنشنل - پښتو ته ویلي، چې د طالبانو د امر بالمعروف محتسبین په بازارونو کې د ښځو د حجاب د څرنګوالي د معلومولو لپاره، له کوچنیو ماشومانو د پیسو په بدل کې د جاسوسۍ کار اخلي.
د ایران د بشري حقونو سازمانونو راپور ورکړی چې په قزوین مرکزي زندان کې یوه افغانه ښځه او د هغې خاوند اعدام شوي دي. د راپورونو له مخې، دا جوړه د نشه يي توکو د قاچاق په تور نیول شوې وه او له دریو ماشومانو سره په زندان کې وه، خو وروسته یې ماشومان خوشې او افغانستان ته واستول شول.
د قطر لومړي وزیر محمد بن عبدالرحمن ال ثاني په دوحه کې د عربي ـ اسلامي هېوادونو د بیړنۍ سرمشریزې لپاره د چمتووالي په غونډه کې ویلي، چې په قطر کې د حماس پر مشرانو د اسراییل برېد به یې د منځګړیتوب له هڅې پر شا نه کړي.
انس حقاني چې د حقاني شبکې له جګپوړو غړو شمېرل کیږي، وايي، واک ته رسېدل اسان وو، خو د حکومت چلول سخت کار دی. نوموړي له یوه هندي یوټیوبر سره مرکه کې له هند سره د ښو اړیکو غوښتنه وکړه او ویې ویل چې ټول مسایل باید د خبرو اترو له لارې حل شي.