آرشیف

د طالبانو د بهرنیو چارو وزارت مرستیال محمد نعیم وردګ په کابل کې د ازبکستان له سفیر عثمان اویبېک سره د سوداګریز راکړو وکړو او اقتصادي اړیکو پر پراختیا خبرې کړې دي.

کویټ د ۲۰۲۴ کال د اګسټ له میاشتې راهیسې د څه باندې ۳۷ زره کسانو تابعیت لغوه کړی، چې لږ تر لږه ۲۶ زره یې ښځې دي.

د ایران د خراسان رضوي ولایت امنیتي چارواکي وایي، چې له افغانستان سره د دوغارون ـ تایباد له پولې څخه د افغانانو تګ راتګ په بې‌سارې توګه زیات شوی، چې له امله یې د کورنیو چارو او کډوالو په برخو کې نوي تدابیر نیول شوي دي.

اسراییل د یکشنبې په شپه په غزه کې د هوایي بریدونو په ترڅ کې ۲۰ کسان وژلي دي. رویټرز د غزې د روغتیایي چارواکو له قوله ویلي، چې دغه بریدونه پر هغې مدرسې شوي چې پکې بې ځایه شوي فلسطینیان مېشت و.

ټاکل شوې ده، چې د هېواد په ختیځ زون کې به له يو مېليون او ۳۰۰ زرو څخه ډېر ماشومان د ګوزڼ ضد واکسين شي. د واکسین کولو دغه بهیر د دوشنبې په ورځ پیلېږي، چې پکې به د څلورو ختیځو ولایتونو ماشومان واکسین شي.

د پخواني حکومت د بدخشان د ولایتي شورا غړي احمد جاوېد مجددي له افغانستان انترنشنل سره په مرکه کې ویلي، طالبان د کوکنارو د کر او له منځه وړلو په برخه کې دوه‌ګونی چلند کوي.

طالبانو پر روزنیزو او فرهنګي برخو له پراخو بندیزونو سره-سره په کابل کې د نقاشۍ، خطاطۍ، کتاب او لاسي صنایعو نندارتون جوړ کړ. دغه دوه ورځنی نندارتون د طالبانو د اطلاعاتو او فرهنګ وزارت د کلتور او هنر معینیت د هنرستان ریاست له لوري د رسیس فرهنګي بنسټ په همکارۍ جوړ شوی دی.

د مالتا لومړي وزیر رابرت ابیلا د یکشنبې په ورځ اعلان وکړ، چې هېواد به یې د جون په میاشت کې د فلسطین دولت په رسميت وپېژني.

د جاپان لومړي وزیر شیګرو ایشیبا د یکشنبې په ورځ اعلان وکړ، چې هېواد به یې له امریکا سره د ګمرکي تعرفو خبرو ته دوام ورکړي، څو د جون په میاشت کې د کاناډا په کوربتوب د "اووه سترو هېوادونو" یا G7 غونډې پر مهال یوه موافقه ترلاسه شي.

د اوکراین ولسمشر ولادیمیر زېلېنسکي د مې میاشتې په ۲۵مه اعلان وکړ، چې د کییف او مسکو ترمنځ د بندیانو د تبادلې په وروستي پړاو کې روسیې د دوی ۳۰۳ بندیان ور وسپارل.

جروزالم پوسټ ورځپاڼې د څو باوري سرچینو په حواله خبر ورکړی، چې د برېتانیا، فرانسې او المان لوړپوړو چارواکو د ټرمپ حکومت ته خبرداری ورکړی، چې ایران په قصدي توګه د اټومي خبرواترو د اوږدېدو هڅه کوي.

جرمني د یکشنبې په ورځ اعلان وکړ، چې د اوکراین متحدین باید د روسیې له لوري د بې‌ساري بریدونو په غبرګون کې پرېکنده عمل وکړي. دا په داسې حال کې ده، چې روسیې تېره ورځ په اوکراین تر ټولو زیات د بې پیلوټه الوتکو بریدونه وکړل، چې دولس کسان پکې ووژل شول.

د ترکيې ولسمشر رجب طيب اردوغان د پاکستان له لومړي وزیر شهباز شريف سره د استانبول په سوداګریز مرکز کې ولیدل. دواړو لوریو له ترهګرۍ سره د مبارزې په برخه کې پر همغږۍ ټينګار کړی.

د طالبانو د لوړو زده کړو وزیر هرات ولایت ته د سفر په ترڅ کې د هرات پوهنتون د علمي شورا غړو سره ناسته کې پر دیني او عصري علومو ټينګار کړی او زیاته کړې یې ده، چې افغانستان په ټولو برخو کې متخصصینو ته اړتیا لري.

د امریکا د لنډمهالي خوندیتوب پروګرام (ټي پي اېس) د لغوه کېدو له امله هغه پخواني امریکایي سرتېري سخت غوسه شوي، چې د افغانستان په ۲۰ کلنه جګړه کې ښکېل و.

د سره صلیب نړۍوالې کمېټې (ICRC) د یکشنبې په ورځ وویل، چې د غزې په خان یونس ښار کې د یوه هوايي برید پر مهال د دوی دوه کارکوونکي وژل شوي دي. دغه برید د دوی د کارکوونکو د اوسېدو په ځای ترسره شوی او یادې کمېټې د جګړو د ژر پای ته رسېدو غوښتنه کړې.

د تهران د پولیسو قوماندان وایي، چې په تېر یوه کال کې له دغه هېواد څخه څه باندې یو مېلیون او ۲۰۰ زره غیر قانوني کډوال اېستل شوي دي. ایراني رسنیو د تهران د پولیسو د قوماندان له قوله راپور ورکړی، چې یوازې له تهران څخه ۲۷۰ زره کسان اېستل شوي دي.

د پښتون ژغورنې غورځنګ غړو او د میرعلي پرلت ګډونوالو ګواښ کړی، که تر سبا دوشنبې (د غبرګولي ۵مې) پورې یې غوښتنې ونه منل شي، نو د راتلونکي لپاره به خپله پرېکړه اعلان کړي.

د می پر شلمه کورسک سیمې ته د سفر پرمهال د روسیې د ولسمشر ولادیمیر پوتین چورلکه نږدې وه چې د اوکراین د ډرون یا بې‌پیلوټه الوتکو د یوه لوی برید په مرکز کې واقع شي. د روسیې د هوايي دفاع قوماندان یوري داشکین وايي، د ولسمشر چورلکه د برید پر مهال د عملیاتو مرکز ته ډېره نږدې وه.

د افغانستان لپاره د بښنې نړیوال سازمان استازې سمیرا حمیدي وايي، نړیواله ټولنه باید د طالبانو «رژیم» هیڅکله مشروع ونه ګڼي او د افغان ښځو د حقونو لپاره دې مبارزه وشي.

د ځايي سرچینو په وینا، د شنبې شپې ناوخته د هرات ولایت په ادرسکن ولسوالۍ کې د ګله‌توت کلي یوه اوسېدونکي د خپلې مېرمنې سر پرې کړی او خپل پلار او مور یې هم د مداخلې او د مخنیوي هڅې له امله په چاقو وژلي دي.