په ملګرو ملتونو کې د امریکا استازولۍ ویلي، د ډونالډ ټرمپ په لارښوونه یې د ملګرو ملتونو په بودجه کې تاریخي بدلونونه راوستي چې د لګښتونو د کمولو، اداري اصلاحاتو او د سولې او امنیت د پیاوړتیا په موخه یې ۵۷۰ مېلیون ډالره کموالی راوستی دی.
د افغانستان لپاره د برېتانیا ځانګړي استازي ریچارډ لېنډسي د کابل د وروستۍ چاودنې له امله د اوښتې مرګژوبلې په اړه خواشیني ښودلې او ټینګار یې کړی، چې برېتانیا «ترهګري» غندي او د افغانستان د خلکو ترڅنګ ولاړه ده.
د افغانستان د ازاده سیالیو او ووشو پخوانی ملي لوبغاړی عطاءالله قاضي تر شپږ میاشتني بند وروسته د پولنډ له یوه زندانه خوشې شو. د هغه ورور عزیز قاضي د دغه خبرې پخلی کړی او ویلي یې دي، چې نوموړی د یوه وکیل له ګومارلو وروسته خوشې شوی دی.
د طالبانو د دفاع وزارت وایي، د یادې ډلې د وسلهوال پوځ لوی درستیز قاري محمد فصیحالدین «فطرت» په قطر کې د دغه هېواد د وسلهوال پوځ له لوی درستیز جاسم بن محمد «المناعي» سره لیدلي او د دواړو لورو ترمنځ د دوهاړخیزو اړیکو او پوځي همکاریو د پراختیا پر موضوعاتو خبرې شوې دي.
د امریکا ولسمشر ډونالډ ټرمپ ویلي، چې په پاریس کې د جي۷ هېوادونو په سرمشریزه کې به ګډون ونهکړي. دغه څرګندونې په داسې حال کې کېږي، چې د امریکا او اروپا ترمنځ د ګرینلنډ د نیولو په اړه د ټرمپ د ګواښ له امله ترینګتیاوې زیاتې شوې دي.
د افغانستان د کرېکټ ملي لوبډلې چټک توپاچوونکی نوینالحق له انګلیسي کلپ یورکشایر سره تړون لاسلیک کړ. دا ۲۶ کلن توپاچوونکی لومړنی افغان لوبغاړی شو، چې په تاریخي ډول د دغه مشهور کلپ په ګټه د ۲۰۲۶ کال په بلاسټ شل اوریزو سیالیو کې لوبېږي.
د پاکستان دولتي راډیو خبر ورکړی، چې د طبیعي افتونو د ګواښونو راکمولو په اړه د اقتصادي همکاریو سازمان (ECO) د وزیرانو لسمه غونډه به نن چهارشنبه د (سلواغې لومړۍ) نېټه په اسلاماباد کې پیل شي.
د ۲۰۲۶ کال د نولس کلنو د پنځوس اوریز کرېکټ نړۍوال جام د ګروپي پړاو د سیالیو پر دوام، د افغانستان د کرېکټ ملي لوبډله سبا له تانزانیا سره مخامخ کېږي. دا لوبه د کابل پر وخت د غرمې په ۱۲:۰۰ بجو په نامیبیا کې ترسره کېږي.
د افغانستان لپاره د برېټانیا ځانګړي استازي ریچارډ لینزي د سېشنبې په ورځ د (مرغومې ۳۰مه) اسلاماباد کې د طالبانو له سفیر سردار احمد شکېب سره لیدلي دي. لینزي ویلي، په دې ناسته کې یې د سیمې پر امنیتي مسایلو او پر افغان ښځو او نجونو د طالبانو د تګلارو پر اغېزو خبرې کړې دي.
طالبانو د سېشنبې په ورځ په کابل کې د هغه چینایي وګړي د جنازې لمونځ ادا کړ، چې پر یوه رسټورانټ د داعش ډلې د ځانمرګي برید پر مهال وژل شوی و. دا جنازه د وزیر محمد اکبرخان په جومات کې ترسره شوې ده.
د افغانستان د کرېکټ ملي لوبډله سبا ماښام په اوو بجو د شل اوریزو نړۍوالو سیالیو پر دوام میدان ته ځي. د هېواد ملي لوبغاړو د دغو سیالیو په لومړۍ لوبه کې په غوره ځلېدو سره ویسټانډیز ته د ۳۸ منډو په توپیر ماتې ورکړه او دا لړۍ یې په بریا سره پیل کړه.
د مخکېني جمهوري نظام پر مهال د پکتیا والي محمد حلیم فدایي ویلي، د ځانمرګو بریدونو مفکوره لومړی ځل د «اشتهادي» تر نوم لاندې د طالبانو د واکمنۍ پر مهال په افغانستان کې دود شوه. هغه وایي، اوس که دا ډول بریدونه کېږي طالبان یې له اخلاقي او فکري مسوولیت څخه نهشي خلاصېدای.
د اټومي انرژۍ د نړۍوال اژانس عمومي مشر رافایل ګروسي خبرداری ورکړ، چې د ایران د لوړې کچې غني شویو یورانیمو د زېرمو نامعلوم وضعیت او پر بمبار شويو اټومي تاسیساتو د پلټنو پر سر رامنځته شوی بندیز نهشي کولی د تل لپاره دوام وکړي.
د هالنډ د بهرنیو چارو وزیر ډېوېډ فانویل له خپل سعودي سیال فیصل بن فرحان سره د کتنې خبر ورکړ او پر اېکس شبکه یې ولیکل: «د داووس په ناسته کې مو د ایران، غزې، سوډان او اوکراین د بدلونونو په اړه خبرې وکړې».
د امریکا ولسمشر ډونالډ ټرمپ د یوه خبریال پوښتنې ته په ځواب کې د ایران پروړاندې د پوځي اقدام احتمال رد نهکړ او ویې ویل، چې د راتلونکي په اړه غوڅ نظر نهشي څرګندولی.
د قطر دولت د سېشنبې په ورځ د (مرغومې ۳۰مه) په یوې خبرپاڼه کې د کابل وروستی برید غندلی او د قربانیانو له کورنیو سره یې خواخوږي څرګنده کړې. قطر وایي، دوی د هر ډول تاوتریخوالي، ترهګرۍ او جنایي کړنو سره سخت مخالف دي او په کلکه یې ردوي.
ځايي سرچینو د سېشنبې په ورځ افغانستان انټرنشنل ته ویلي، چې د طالبانو د امر بالمعروف او شکایتونو اورېدو ادارې د هرات ښار کې په جوماتونو کې د فاتحې د مراسمو پر مهال د مېلمنو د هرکلي لپاره درېدل منع کړي دي.
د افغانستان د ملي امنیت پخوانی رییس احمدضیا سراج وایي، ترهګرې ډلې په افغانستان کې له «خوندي ځایونو» په ګټنې، خپلې سیمهییزې موخې ګام په ګام تعقیبوي. هغه خبرداری ورکړ، چې د دغو ډلو د فعالیتونو پر وړاندې بېغوري او سرسري چلند به د هېڅ هېواد په ګټه نه وي.
د افغانستان د ازادۍ جبهې په یوې اعلامیه کې ويلي، په کابل کې د دوشنبې مازدیګر د یو چینایي رسټورانټ دننه ځانمرګي برید روښانه کړه، چې طالبان د افغانستان د امنیتي وضعیت په کنټرول کې ناتوانه دي او د دې ډلې هغه ادعاوې ناسمې دي، چې ګواکي په ټول هېواد کې بشپړ امن ټینګ شوی دی.
په ملګرو ملتونو کې د افغانستان د دایمي استازولۍ سرپرست نصیر احمد فایق ویلي، افغانان دا مهال د طالبانو له لوري له سیستماتیکو بشري سرغړونو سره مخ دي؛ خپلسرې نیونې، د خلکو اجباري بېدرکه کول او شکنجه لا هم دوام لري.
د کاناډا لومړي وزیر مارک کارني د سېشنبې په ورځ وویل، چې هېواد یې د امریکا لهخوا د هر ډول تعرفو لګولو سخت مخالف دی، هغه تعرفې چې ولسمشر ټرمپ یې د ګرینلنډ د کنټرول لاندې راوستلو لپاره وضع کوي.