ترکي رسنیو راپور ورکړی، چې د دې هېواد پولیسو په سیواس ښار کې نهه افغان کډوال نیولي دي. نیول شوي پناه غوښتونکي د بهرنیانو د اخراج مرکز ته لیږدول شوي دي. په راپور کې راغلي چې دوه نور کسان هم د انساني قاچاق په تور نیول شوي دي.
د طالبانو د لوړو زده کړو وزارت ویلي، چې د دغه وزارت مالي او اداري معین محمد حامد حسیب د کازان ۱۶م نړیوال اقتصادي فورم په څنډه کې د اسلامي هېوادونو ترمنخ د علمي او تحصیلي همکاریو شریکولو غوښتنه وکړه.
د پاکستان د پوځ د عامه اړیکو مشر جنرال احمد شریف چوهدري د ایران ایرنا خبري اژانس راپور ته د مرکې پرمهال د پاکستان او هند په وروستیو شخړو کې د ایران د سولې د هڅو ستاینه وکړه. هغه خبرداری ورکړی، چې ځیني "قوتونه" هڅه کوي د وروڼو هېوادونو ترمنځ درز یا اختلاف رامنځته کړي.
غزه کې روغتیايي چارواکو ویلي، د اسراییل په هوايي بمباریو کې په تېرو ۲۴ ساعتونو کې لږ تر لږه ۱۴۶ فلسطینیان وژل شوي او لسګونه نور ټپيان شوي دي.
د امریکا ولسمشر دونالد ټرمپ له فاکس نیوز سره په یوې تازه مرکه کې ویلي، چې ایران باید هېڅکله اټومي وسلې ترلاسه نهکړي او دا د امریکا لپاره سره کرښه ده. ټرمپ وویل، ایران باید د سولېپالې اټومي انرژۍ پر ځای د خپلو پراخو د نفتو زېرمې وکاروي، ځکه دا زېرمې د ۳۰۰ کلونو لپاره بسنه کوي.
ایراني رسنیو د دغه هېواد د پوځ په حواله راپور ورکړی، چې له افغانستان سره د سرحدي دېوال جوړولو چارې تر اوسه ۸۱ کیلومترو ته رسېدلې دي. دغه دیوال څلور متره لوړوالی لري او پر سر یې اغزن تار هم نصب شوی دی.
په کندهار کې د دولتي روغتونونو یو شمېر ښځینه روغتیاپالو افغانستان انټرنشنل ته داسې اسناد وړاندې کړي، چې پکې څرګندېږي طالبانو ټولو ښځینه روغتیايي کارکوونکو ته امر کړی چې د دندې له پیل څخه تر پای پورې باید محرم ورسره مل وي. دوی شکایت کوي چې "پر یو معاش دوه کسان کار کوو."
پاکستاني رسنیو راپور ورکړی، چې د افغانستان او پاکستان ترمنځ سوداګریزه راکړه ورکړه په مارچ میاشت کې له ۱۰۰ میلیونو ډالرو څخه کمه وه، خو په اپریل میاشت کې ۱۱۹ میلیونو ډالرو ته لوړه شوې ده.دغه رسنۍ زیاتوي، چې د افغانستان او پاکستان ترمنځ په تېره یوه میاشت کې سوداګري ۲۳سلنه ډېره شوې.
د روسیې ولسمشر ولادیمیر پوتین د شنبې په ورځ وویل، چې د روسیې او عربو هیوادونو ترمنځ لومړۍ سرمشریزه به د روان کال د تلې په ۲۳مه (د اکتوبر ۱۵مه) جوړه شي. د منځني ختیځ کړکېچونه، اقتصادي همکارۍ او نړیوال بدلونونه به د دې ناستې مهم بحثونه وي.
د طالبانو د کورنیو چارو وزارت ځینو کارمندانو افغانستان انټرنشنل ته وویل، چې د روان کال د وري میاشتې معاش یې نهدی اخیستی. هغوی زیاته کړه چې معاشونه هره میاشت په ۲۵مه نېټه ورکول کېږي، خو د غويي میاشتې له پای ته رسېدو سره هم، دوی ته معاش نهدی ورکړل شوی.
د طالبانو د عدلیې وزیر مولوي عبدالحکیم شرعي په سینټ پیټرزبورک کې د نړیوال حقوقي فورم په ۱۳مه غونډه کې د ګډون په موخه روسیې ته روان شو. د دغې ډلې د عدلیې وزارت په خپره شوې خبرپاڼه کې راغلي، چې عبدالحکیم شرعي به په نړیوال حقوقي فورم کې د طالبانو د دریځ په اړه وینا وکړي.
د پاکستان ډان ورځپاڼې خبر ورکړی، چې د دغه هیواد د بهرنیو چارو پر پخوانی وزیر او د تحریک انصاف ګوند پر مخکښ غړي شاه محمود قریشي د لاهور په یوه زندان کې د زړه حمله راغلې ده. خبر زیاتوي، هغه له زندان څخه په بیړه روغتون ته لېږدول شوی.
د امريکا د پخواني ولسمشر جو بايډن په يوه تازه افشا شوي غږیز کليپ کې، چې له ځانګړي څېړونکي رابرټ هور سره يې کړې، اعتراف کړی چې د افغانستان په تړاو یې یو مهم او محرم سند د «تاریخ لپاره» ساتلی دی.
د ګارډین ورځپاڼې د خبر له مخې، د اوکراین په شمال ختیځ کې پر یوه مساپر وړونکي بس د روسیې د هوايي برید له امله نهه ملکي وګړي وژل شوي او څلور نور ټپیان دي. ویل کیږي، پېښه هغه مهال رامنځته شوه، چې د روسیې یوې بې پیلوټه الوتکې د اوکراین په شمال ختیځ «سوم» سیمه کې یو موټر په نښه کړ.
د پښتونخوا ایالت د نوښار ولسوالۍ ځايي پولیسو ویلي، چې د جمعې په ورځ له غرمې وروسته د امان ګړ په سیمه کې پنځو کسانو د مدرسې پر یوې زدهکوونکې نجلۍ «ډله ییز جنسي تېری» کړی دی. پولیس وايي، په دغې پېښه کې ښکېل پنځه کسان یې نیولي دي.
د طالبانو بهرنیو چارو وزارت په یوه خبرپاڼه کې ویلي، چې د دغې ډلې د بهرنیو چارو وزیر امیر خان متقي د یوه پلاوي په مشرۍ د ایران د بهرنیو چارو وزیر سید عباس عراقچي په بلنه دغه هېواد ته روان شو.
امریکایي رسنۍ (اې بي سي نیوز) وایي، چې د متحده ایالاتو د کورني امنیت وزارت په شمالي کلیفورینا کې افغان کډوالو ته خبرداری ورکړی، چې له امریکا څخه ووځي.
د امریکا د استازو جرګې دوو غړو جیسن کرو او زیک نون په یوه لیک کې د افغان کډوالو لپاره د ۲۰۰۰۰ ویزو د تصویب غوښتنه کړې ده.
هند غواړي چې د اندوس سیند له سیستم څخه د اوبو اخیستل ډېر کړي، ترڅو د پاکستان کرنیزو سیمو ته د بهیدونکو اوبو بهیر ته جدي ګواښ پېښ کړي. د رویټرز د راپور له مخې، هند په دې کار سره غواړي پر پاکستان اوبه کمې کړي.
د انډیا ډاټ کام په نوم یوې هندي رسنۍ ویلي، د طالبانو او پاکستان ترمنځ اړیکې نورې د پخوا په څېر خوږې نه دي پاتې او وايي، هند په دې هڅه کې دی، چې له طالبانو سره اړیکې نږدې او پاکستان څنډې ته کړي. دغه رسنۍ باور لري، چې هند د دغې نوې سیاسي لوبې پر مټ غواړي پاکستان منزوي کړي.
پښتون سیاستوال او د ملي ډیموکراتیک غورځنګ مشر محسن داوړ په خپله ایکس پاڼه یوه ویډیو خپره کړې او ویلي یې دي، چې تحریک طالبان پاکستان د وزیرستان په شیوا سیمه کې دولتي ښوونځي تړلي دي. په ویډیو کې د وسله والو یو ډلمشر زدهکوونکو او ښوونکو ته وايي، چې نور دې ښوونځي ته نه راځي.