باوري سرچینو افغانستان انټرنشنل ته ویلي، د هرات د طالبانو د امر بالمعروف ادارې د شکایتونو د ارزونې مسوول مولوي بایزید یون د نامشروع اړیکو په تور نیول شوی دی. د سرچینو په وینا، نوموړی د روانې اوونۍ په لړ کې له یوې ښځې او څلورو نورو کسانو سره یوځای نیول شوی.
د خېبر پښتونخوا اعلی وزیر سهېل افريدي په پېښور کې د امنیتي وضعیت په اړه د یوې مهمې غونډې مشري کړې او ویلي یې دي چې حکومت به د ناامنۍ او وسلهوالو بریدونو د پای ته رسولو او د سولې د ټینګښت لپاره له ټولو شته امکاناتو کار واخلي.
د بښنې نړیوال سازمان له اروپايي ټولنې او غړو هېوادونو غوښتي چې افغانستان ته د افغانانو د جبري ستنولو او له طالبانو سره د بېرته منلو په اړه هر ډول همکاري او هڅې سمدستي ودروي. دغه سازمان ټینګار کړی چې افغانستان لا هم د کډوالو د جبري ستنولو لپاره خوندي هېواد نه دی.
ناپېژاندو وسله والو د چارشنبې په شپه د خیبر پښتونخوا په باجوړ کې د هلکانو یو دولتي ښوونځی په بمونو الوځولی دی. پولیسو وايي، د پېښې له ځایه یې شواهد راټول کړي او په سیمه کې یې د عاملانو د لټون عملیات پیل کړي دي.
د ایران د بهرنیو چارو وزیر عباس عراقچي له بلغاریا او قبرس غوښتي چې خپلې پوځي اډې د ایران پر ضد د امریکا د پوځي عملیاتو لپاره ونه کاروي. هغه خبرداری ورکړی چې د داسې اسانتیاوو برابرول د ایران پر ضد د «تیري» ملاتړ ګڼل کېږي.
په کابل کې د ایران د سفارت مرستیال سیدحسن مرتضوي ویلي، ایران د طالبانو پر ضد له هېڅ سیاسي او پوځي مخالف جریان څخه ملاتړ نه کوي او د دغې ډلې پر ضد وسلهواله مبارزه «مقاومت» نه ګڼي. هغه ټینګار کړی چې د افغانستان کړکېچ باید د خبرو له لارې حل شي.
سګریټ څکول په نړۍ کې د مړینې او جدي ناروغیو له مهمو لاملونو څخه ګڼل کېږي. روغتیايي متخصصین وایي، د سګریټ لوګی زرګونه زیانمن کیمیاوي مواد لري چې د سږو، زړه، دماغ او د بدن د نورو غړو د ناروغیو خطر زیاتوي.
د کندهار اوسېدونکي وایي، د ښار په بېلابېلو سیمو کې د سړک جوړونې پروژو ورو پرمختګ د چاپېریال ککړتیا او ترافیکي ګڼې ګوڼې یې ورځنۍ چارې له ستونزو سره مخ کړي. بلخوا، قراردادي شرکتونه وایي، د طالبانو له لوري د مالي ژمنو پر وخت نه پوره کېدل د دغو پروژو د ځنډ اصلي لامل دی.
د طالبانو تر واک لاندې د افغاني سرې میاشتې ټولنې مسولینو ویلي، چې په تېرو درېیو میاشتو کې یوازې د تورخم له لارې څه کم ۶۰ زره کونۍ هېواد ته راستنې شوې دي.
د روسي توغندي له خوا د پولنډ د هوايي حریم له نقض وروسته د دغه هېواد لومړي وزیر ډونالډ توسک د دفاع وزیر او امنیتي چارواکو په ګډون بېړنۍ ناسته کړې. چارواکي وایي لومړني شواهد ښيي چې توغندی د روسیې Kh-101 ډوله کروز و چې د اوکراین پر ضد د برید پر مهال د پولنډ هوايي حریم ته داخل شوی.
د پاکستان د بهرنیو چارو وزارت ویاند طاهر اندرابي ویلي چې د بشري خواخوږۍ له مخې په دغه هېواد کې د شاوخوا ۱۶ زره افغان ښځو، ماشومانو او سپین ږیرو د اوسېدو موده غځوی. نوموړي ویلي چې له دغه هېواد څخه هېڅ قانوني اسناد لرونکي افغان کډوال نه دې ایستل شوي.
د خیبر پښتونخوا ایالت ځینې سیمې په تېره یوه اوونۍ کې د خونړو بریدونو شاهده وه او په دغه موده کې د ملکي وګړو په ګډون ۳۰ نظامیان وژل شوي او یو شمېر نور ټپیان دي. پر پاکستاني نظامیانو د بریدونو مسولیت تحریک طالبان پاکستان ډلې په غاړه اخیستی دی.
په مالیزیا کې د طالبانو سفیر نقیب الله احمدي د مالیزیا د مذهبي چارو وزارت له مرستیالې مرحمه بنت روسلي سره په لیدنه کې د حج، وقف او زکات د سیستمونو او اسلامي بانکدارۍ په برخه کې د همکاریو غوښتنه کړې ده.
په بدخشان کې ځايي سرچینې افغانستان انټرنشنل ته ويلي، طالبانو د یفتل پاین ولسوالۍ اووه اوسېدونکي د سپاهی میهن سره د همکارۍ او د هغوی د حرکتونو په اړه د پوهېدو ا په تور نیولي دي.
د طالبانو د کورنیو چارو وزارت وايي، د انساني قاچاق پر ضد مبارزه روانه ده او هېچا ته به اجازه ورنه کړي چې افغان وګړي د قاچاق ښکار کړي. د دغه وزارت ویاند عبدالمتین قانع ویلي، د ګاونډیو هېوادونو له لوري د افغانانو د قاچاق د مخنیوي لپاره هم عملي اقدامات شوي دي.
د اوکراین ولسمشر ولادیمیر زېلېنسکي ویلي، روسیې تېره شپه پر اوکراین له ۷۰ ډېر د توغندیو او شاوخوا ۲۸۰ ډرون بریدونه کړي، چې د ماشومانو په ګډون ۸ کسان یې وژلي او لسګونه نور یې ټپیان کړي دي.
د پاکستان د بلوچستان ایالت د تمپ ولسوالۍ په ناصراباد سیمه کې د شپږو کارګرو مړي موندل شوي دي. د ځایي چارواکو په وینا؛ په وژل شویو کسانو کې څلور د پنجاب او دوه نور د خیبر پښتونخوا اوسېدونکي وو.
بلوچستان چې د پاکستان له تر ټولو لوی ایالت دی، د افغانستان او ایران ترڅنګ پروت دی او شاوخوا ۷۵۰ کیلومتره سمندري ساحل لري. د همدې جغرافیایي موقعیت له امله دغه ایالت له کلونو راهیسې د انساني قاچاق یوه مهمه لار بلل کېږي.
د طالبانو د ریاست الوزرا د دفتر رییس عبدالواسع د افغانستان لپاره د برېتانیا ځانګړي استازي له مرستیال ایډ هډلي سره په لیدنه کې ویلي، چې د هېوادونو ترمنځ اړیکې او تعلقات په تګراتګ لا پیاوړي کېږي. نوموړي زیاته کړې: «په تېزه لهجه او دښمنۍ ستونزې نه حل کېږي».
د طالبانو مشر ملاهبت الله په تازه ټاکنو کې د کندهار د استخباراتو د فرمانونو او حکمونو د څار او نظارت رییس روزي خان شیباني د پکتیکا پوهنتون مشر ټاکلی دی. طالبانو د خپلې ادارې د معینیتونو او ولایتي ادارو په برخو کې ۲۱ نوې ټاکنې اعلان کړې او ټول یې خپل پخواني ملګري ادل بدل کړي دي.
د روغتیا نړۍوال سازمان د افغانستان په اړه په خپل کلني راپور کې خبرداری ورکړی، چې پر ښځینه کارکوونکو سخت محدودیتونه، د بودجې کمښت او د هممهاله ناورینونو فشار د افغان مېرمنو او ماشومانو لپاره د روغتیایي خدمتونو په وړاندې کولو کې جدي ننګونې رامنځته کړې دي.