د امریکا ولسمشر ډونالډ ټرمپ په سپینه ماڼۍ کې د بېپیلوټه الوتکو د بریدونو په اړه وویل: «موږ به ایران ته ډېر سخت ګوزار ورکړو، ځکه اوس زموږ وار دی چې هغوی وځپو». هغه زیاته کړه چې ایران اخوندي رژیم یو ځل بیا د سېشنبې په ماښام د بریدونو هڅه کړې ده.
سعودي عربستان په سره بحیره کې د حوثي یاغیانو له بریدونو څخه د سوداګریزو بېړیو د خوندیتوب په موخه د یوه نړیوال ایتلاف د جوړولو هڅه کوي. سرچینو د چهارشنبې په ورځ رویټرز ته وویل چې ریاض په دې اړه له لسګونو هېوادونو سره خبرې اترې پیل کړي، ترڅو د دغه سمندري ایتلاف جوړښت وروستی کړي.
په هرات کې د ایران سرکونسل عليرضا مرحمتي ویلي، هېواد یې هڅه کوي چې افغانستان یوازې یو واردوونکی هېواد پاتې نه شي، بلکې داسې ظرفیت ومومي چې خپل تولیدات ایران او نورو هېوادونو ته هم صادر کړي.
د ناروې پولیسو یو ۳۴ کلن افغان د خپلې ناروېژۍ ملګرې د وژنې په تور نیولی دی. دغه ښځه تر سختو ټپونو وروسته روغتون ته ولېږدول شوه، خو هلته یې ساه ورکړه. تورن کس تر دې وړاندې هم د یوې بلې ښځې پر وړاندې د تاوتریخوالي له امله په یو کال او دوو میاشتو بند محکوم شوی و.
رویټرز اژانس د څلورو سرچینو له قوله راپور ورکړی چې د امریکا حکومت د فرانسې له خوا واشنګټن ته د وړاندیز شوي نوي سفیر د منلو د ځنډېدو، او یا هم د هغه د نه منلو امکان ارزوي. دا موضوع وروسته له هغې راپورته شوې چې فرانسې په ښکاره ډول د ټرمپ د حکومت د بشري حقونو پر کړنلارې نیوکه وکړه.
د افغانستان د کرېکټ ملي لوبډلې پخواني لوبغاړي او د ۱۹ کلنو څخه د کم عمره ملي لوبډلې مشر روزونکي رییس احمدزي د ننګرهار په بهسودو ولسوالۍ کې د سیند پر غاړه د خیرات غوښتونکو بېوزله ماشومانو پر سخت وضعیت او د هغوی پر راتلونکي جدي اندېښنه ښودلې ده.
د پروان ولایت لپاره د طالبانو د امنیه قومندانۍ مسوولین وايي، د هېواد له شمال څخه سویل ته یې د ۶۰۵ کیلوګرامه تریاکو له قاچاق کېدو مخنیوی کړی دی. دوی زیاتوي، دغه مواد د ګازو په ډبو کې ځای پر ځای شوي وو او د قاچاق په تړاو یې ۴ کسان هم نیولي دي.
د پروان ولایت لپاره د طالبانو د امنیه قومندانۍ مسوولین وايي، یو کس د چاریکار ښار په یوه کانال کې د خپل زوی د ژغورنې په هڅه کې خپل ژوند له لاسه ورکړ. د دوی په وینا، د هغه زوی د سیمې د اوسېدونکو په مرسته ژغورل شوی دی.
یو لوړپوړي اسراییلي چارواکي ویلي، د امریکا ولسمشر ډونالډ ټرمپ او د اسراییل لومړي وزیر بنیامین نتنیاهو په سپینه ماڼۍ کې د خپلې لیدنې پر مهال د ایران د اټومي پروګرام د مهار لپاره د ډیپلوماسۍ، اقتصادي فشارونو او پوځي اقدام په ګډون ټول ممکنه انتخابونه په تفصیل سره وڅېړل.
د ماینپاکۍ یوې موسسې د نږدې ۵ میلیونه ډالرو په ارزښت له طالبانو سره یوه هوکړه لاسلیک کړه. د دغې هوکړې لهمخې، یاده موسسه به په ۸ ولایتونو کې ۱۱ میلیونه متر مربع سیمه له ماینونو او ناچادو توکو پاکې کړي او څه باندې ۳۲ زره کسان به په مستقیم او غیر مستقیم ډول ترې ګټه واخلي.
د افغانستان پخواني ولسمشر محمد اشرف غني د زمري په اوومه نېټه د ټولنیزو رسنیو له لارې په یوه خپاره کړي پیغام کې هېوادوالو ته د ملي بېرغ د ورځې مبارکي ویلې ده. دا ملي توغ طالبانو په خپل حاکمیت کې لهمنځه وړی او د خپلې ډلې سپین بېرغ یې پر ځای ځړولی دی.
رویټرز خبري اژانس د درېیو باخبره سرچینو له قوله راپور ورکړی چې تمه ده ایران په راتلونکو څو اوونیو کې له چین څخه د اوږې پر سر وړل کېدونکو هوايي دفاعي توغندیزو سیسټمونو لومړۍ جوپه ترلاسه کړي.
د افغانستان کرېکټ بورډ اعلان کړی چې شېن مکډرمیټ د افغانستان د کرېکټ ملي لوبډلې د مرستیال روزونکي او نوي د فیلډینګ روزونکي په توګه د لوبډلې له روزنیز پلاوي سره یوځای شوی دی.
د افغانستان د مویتای غوره لوبغاړو د ټاکنې سیالۍ د هېواد د ۱۵ ولایتونو د ۲۴۵ ورزشکارانو په ګډون د بلخ ولایت د احمدي په ورزشي لوبغالي کې ترسره شوې.
د عراق ملي امنیت شورا د چهارشنبې په ورځ په بېړنۍ غونډه کې د امریکا او سعودي عربستان هغه هوايي بریدونه وغندل چې د عراقي وسلهوالو ډلو پر ضد ترسره شوي او لږ تر لږه ۲۰ کسان په کې وژل شوي دي. د ملي امنیت شورا زیاته کړې چې د امریکا او سعودي بریدونو ملي حاکمیت تر پوښتنې لاندې راوستی.
د تېر جمهوري نظام د اطلاعاتو او کلتور پخوانی وزیر عبدالباري جهاني وايي، طالبان د افغان ولس له زړونو او خاطراتو څخه «ملي بېرغ» نهشي اېستلی. د هغه په باور دغه بیرغ د خلکو په زړونو او له هېواده بهر په ښکاره ژوندی دی. جهاني همداراز خبرداری ورکړ، د طالبانو بقا په «خطر» ده.
باوري سرچینو د چهارشنبې په ورځ افغانستان انټرنشنل ته ویلي چې طالب استخباراتو د بدخشان ولایت په مرکز فیضاباد ښار کې د پخواني جمهوري نظام څلور پوځي منسوبین نیولي دي.
د طالبانو د بهرنیو چارو وزارت د عامه اړیکو مشر ضیاء احمد تکل ویلي، افغانستان د نړیوالو او سیمهییزو بدلونونو په حساس پړاو کې د امنیت، کورني ثبات او ملي حاکمیت له پلوه د باور وړ چاپېریال لري، دا ادعا په داسې حال کې ده چې طالبان له پنځو کلونو راهیسې په نړیواله سیاسي انزوا کې دي.
د خیبرپښتونخوا اعلی وزیر محمد سهیل اپریدي په هنګو ولسوالۍ کې د پولیسو پر یوې امنیتي پوستې د وسله والو برید په کلکه غندلی او د دغه ایالت د پولیسو له عمومي مشر څخه یې د پېښې په اړه د عاجل راپور غوښتنه کړې ده.
د طالبانو د سرحدونو وزیر وايي، طالبانو له بیا واکمنېدو وروسته هغه «ناخوالې» حل کړې، چې په ۲۰ کلنه دوره کې واکمنان یې په حلولو کې پاتې راغلي وو. هغه د دغو «ناخوالو» په تړاو نور جزییات ورنهکړل، خو په شل کلن جمهوري نظام کې ستره ننګونه امنیت وو او شنونکي یې عاملین همدا طالبان ګڼي.
د خېبر پښتونخوا د هنګو په خزینه بانډه سیمه کې پر یوې امنیتي پوستې د وسلهوالو په برید کې د یوه جګپوړي پولیس افسر ډيايسپي دیار خان په ګډون لږ تر لږه ۷ پولیس وژل شوي او ۲۲ نور ټپیان شوي دي.