د طالبانو د ریاست الوزرا اداري مرستیال عبدالسلام حنفي ویلي، چې دوی به د روغتیايي سکتور د پیاوړتیا او پراختیا لپاره له هېڅ ډول هڅو ډډه ونه کړي. هغه له ډاکټرانو وغوښتل چې خپل مسلکي ظرفیت لوړ کړي او له ناروغانو سره ښه چلند او د دقیق تشخیص پر بنسټ درملنه وکړي.
د طالبانو ویاند ذبیح الله مجاهد په اسلام اباد کې د اسلامي همکاریو سازمان د ښځو کنفرانس په غبرګون کې ویلي چې د شریعت لهمخې په افغانستان کې د ښځو حقونه خوندي دي. په کنفرانس کې د پاکستان د بهرنیو چارو وزیر له طالبانو وغوښتل چې د ښځو حقونه ور کړي.
د بدخشان ولایت په مایمي ولسوالۍ کې په سیند کې د ډوبو شویو پنځو طالبانو له ډلې د یوه تن مړی په تاجکستان کې موندل شوی. د چنګاښ پر ۱۴مه افغانستان انټرنشنل د خپلو سرچینو له قوله راپور ور کړی و، چې په مایمي ولسوالۍ کې د طالبانو د ذوالفقار قطعې موټر اوبو ته لوېدلی او ۵ تنه اوبو وړي.
د تایلنډ په پلازمېنه بنکاک کې د یوه کلب د اور لګېدنې په پېښه کې لږ تر لږه ۲۷ کسان مړه او ۷۳ نور ټپیان شوي دي. پولیسو ویلي چې د پېښې اصلي لامل د برښنا شارټي کېدای شي خو دوی د کلب د مالک د غفلت په اړه څېړنې پیل کړې دي.
په افغانستان کې د ښځو پر زده کړو او کار محدودیتونو زرګونه ښځې غالۍ اوبدنې ته اړ اېستې دي. د غالۍ صنعت یو شمېر فعالانو افغانستان انټرنشنل ته ویلي چې د راستنو شویو کډوالو په زیاتېدو د غالیو کاروبار غوړېدلی خو ښځې لا هم له کمې لاسباړې او د اومو توکو د لوړو بیو له ستونزو سره مخ دي.
د طالبانو تر واک لاندي د افغانستان بانک اعلان کړی چې د سې شنبې په ورځ به تر ۱۶ میلیونه امریکايي ډالرو پورې اسعار د داوطلبۍ له لارې لیلام کړي. بانک له سوداګریزو بانکونو او شرایطو پوره کوونکو شرکتونو غوښتي چې په دې داوطلبۍ کې ګډون وکړي.
د ایران د بهرنیو چارو وزارت د کونسلي چارو مرستیال وحید جلالزاده د یوه پلاوي په مشرۍ نن دوشنبه د چنګاښ پر ۲۲مه کابل ته ورسېد. د دغه سفر اصلي موخه د ایران او افغانستان ترمنځ د ګډ کونسلي کمیسیون په پنځمه ناسته کې ګډون کول دي.
د کندهار ښار اوسېدونکي وايي، د تېرې یوې اونۍ په ترڅ کې د ګازو بیې له ۱۰ تر ۱۲ افغانیو لوړې شوې دي. د کندهار ترڅنګ په کابل، هرات، پکتیکا او نورو ولایتونو کې هم د ګازو او تېلو بیې لوړې شوې دي.
د سوداګریزو لارو د تړل کېدو له امله افغانستان ته د پاکستان د امو صادرات په روان کال کې صفر شوي دي. پاکستان په ۲۰۲۵ کال کې افغانستان ته ۲۲ زره او ۵۰۰ او په ۲۰۲۴ کال کې ۲۸ زره او ۷۰۰ ټنه ام صادر کړي وو، چې د پاکستان د ټولو امو څه باندې ۲۰ سلنه برخه جوړوي.
د ایران په اوین زندان کې افغانې سیاسي زندانۍ حمیرا شریفي د جولای پر ۱۰مه د صفايي اړوند یوې مایع په څښلو سره د شپږم ځل لپاره د ځان وژنې هڅه کړې ده. دغه افغانه په تهران کې د ۲۰۲۶ کال د جنورۍ د اعتراضونو پر مهال نیول شوې ده.
د طالبانو مرستیال ویاند حمدالله فطرت وایي، د بېرته ستنېدونکو کډوالو د دایمي مېشتېدو لپاره په ټول هېواد کې ۵۸ د کډوالو ښارګوټي په پام کې نیول شوي چې دامهال په ۳۰ ښارګوټو کې د ځمکو د وېش بهیر روان دی.
د احمد جلال جرم، د هغه په وینا، نه غلا وه او نه تاوتریخوالی. هغه په دې نیول شوی و، چې درې کاله وړاندې یې د کندهار ښاروالۍ د فیسبوک پرپاڼه تر یوه پوسټ لاندې ولیکل، « سړکونه مه جوړوئ، د ښوونځیو دروازې د خویندو او لوڼو پر مخ پرانیزئ». په همدې تبصره «درې کاله» په زندان کې و.
د پاکستان حکومت لهخوا د ټاکل شوي ضربالاجل له پای ته رسېدو وروسته د خیبر بښتونخوا په کوهاټ ولسوالۍ کې د افغان کډوالو د بېرته ستنېدو بهیر چټک شوی. د ځایي چارواکو په وینا؛ د ولسوالۍ له بېلابېلو پنډغالو مېشت ۱۲زره او ۲۰۸ افغان کډوال افغانستان ته بېرته ستانه شوي دي.
د ایران د بهرنیو چارو وزارت ویاند اسماعیل بقايي د طالبانو د رسمیت پېژندنې په اړه ویلي چې دا یوه سیاسي او حقوقي پروسه ده او هر وخت چې ډلبندۍ ته ورسېږي، دا به ترسره کړي. هغه زیاته کړه چې تهران د خپلو ګټو لپاره له کابل سره اړیکې نه ځنډوي.
د طالبانو د امر بالمعروف وزیر خالد حنفي په هرات ولایت کې د ښځو د نیولو راپورونه رد کړل او هغه یې تبلیغات وبلل. هغه هرات ته د سفر په ترڅ کې له دیني عالمانو او قومي مشرانو سره په ناسته کې ویلي: «استخباراتي کړیو افواهاتو ته مخه کړې او وایي، چې امر بالمعروف ښځې بندیانوي».
په کاناډا کې مېشتو افغانانو د شاپور ځدراڼ او عبدالاحد مومند فاتحه او د ګېلهمن وزیر او مولانا خانزېب د لومړي تلین مراسم ترسره کړل. په یادو مراسمو کې د دغه څلورو شخصیتونو پر مبارزو، شخصي ژوند، د ټولنې پر وېښتیا، لاسته راوړونو او خدمتونو خبرې شوې دي.
په ملګرو ملتونو کې د افغانستان د دایمي استازولۍ سرپرست نصیراحمد فایق وایي، په افغانستان کې د جنایي جرمونو وروستی زیاتوالی د قانون حاکمیت نشتوالي، د عدلي او قضایي نظام کمزورتیا او د طالبانو تر واکمنۍ لاندې د معافیت فرهنګ پراخېدو پایله ده.
د طالبانو لوی درستیز فصیحالدین فطرت وایي، د یادې ډلې ناراضي قوماندان جمعه خان فاتح د نظام پر وړاندې نهدی درېدلی او د طالبانو حکومت هم د هغه د نیولو هڅه نهده کړې.
د روسیې دفاع وزارت اعلان کړی، چې د دغه هېواد پوځ د دوشنبې په سهار د اوکراین د اودېسا ښار بندري تاسیسات په نښه کړي دي. دغه وزارت ویلي، په بریدونو کې لرې واټن وېشتونکې وسلې او بېپیلوته الوتکې کارول شوې دي.
وروسته له هغې چې د ملګرو ملتونو د بشري چارو د همغږۍ دفتر (اوچا) د روان کال لپاره د افغانستان نفوس ۴۸،۶ مېلیونه اټکل کړ، د طالبانو د احصایې او معلوماتو اداره وایي چې نړۍوال بنسټونه د بهرنیو مرستو د جذب په موخه د افغانستان د وګړو شمېر لوړ ښيي.
په ویرجینیا کې د افغان ټولنې غړو او د کرېکټ مینهوالو د افغانستان د کرېکټ ملي لوبډلې د پخواني لوبغاړي شاپور ځدراڼ د فاتحې مراسم او د هغه یاد غونډه ترسره کړه. په غونډه کې د ځدراڼ لوبیز ژوند، خاطرې، د هغه یادونه او پر شخصي ژوند خبرې وشوې.