د هرات، بلخ،، کندهار، ننګرهار، کندوز، کابل او پکتیا لپاره د طالبانو والیانو په کندهار کې د همغږۍ ناسته کړې ده. په کندهار کې د طالبانو رسنیز دفتر ویلي، په ناسته کې د امنیت ټینګښت ترڅنګ د طالبانو د مشر ملا هبتالله د فرمانونو د پلي کولو او جینايي پېښو د مخینوي په اړه خبرې شوې دي.
د ایران رسنیو راپور ورکړی، لږ تر لږه شپږو وسلهوالو چې غوښتل یې دغه هېواد ته ننوځي او په زابل ولسوالۍ کې پر یوې پوځي اډې برید وکړي، له امنیتي ځواکونو سره په نښته کې وژل شوي دي. د ایران د پولهساتو ځواکونو قوماندانۍ ویلي، دغې وسلهوالې ډلې هڅه کوله د ایران خاورې ته ننوځي.
د افغانستان د ډیپلوماټانو د همغږۍ ټولنې په بروکسل کې د کډوالۍ په پلمه له طالبانو سره د اروپايي ټولنې د ځینو بنسټونو د تعامل هڅې غندلي دي. دغې ټولنې خبرداری ورکړی چې دا ډول ناستې د طالبانو استبدادي رژیم ته مشروعیت ورکوي او د اروپا ارزښتونه تر پښو لاندې کوي.
د هرات یو شمېر اوسېدونکو د شنبې په ورځ افغانستان انټرنشنل ته وویل چې طالبانو د دغه ښار په بېلابېلو برخو کې د حجاب په پلمه د ښځو د نیولو لپاره پراخ عملیات پیل کړي دي. د سرچینو په وینا، طالبانو یوازې د دې ښار د نخودبریزۍ په سړک کې تر ۲۰ ډېرې ښځې نیولې دي.
د افغانستان انټرنشنل د موندنو له مخې، په لویو ښارونو کې جنايي او سازمان شوي جرمونه په بېساري ډول زیات شوي دي. د طالبانو د کورنیو چارو وزارت په یوه میاشت کې د هېواد په کچه د بېلابېلو جرمونو په تور د ۱ زره او ۸۷۸ کسانو د نیولو خبر ورکړی دی.
د پولیو له منځه وړلو ملي بېړني عملیاتي مرکز ویلي، چې د کندهار په معروف ولسوالۍ کې د یو میلیون ډالرو په لګښت یو ۳۰ بستریز روغتون جوړوي. د دغه مرکز مسولینو ویلي، د یاد روغتون په جوړیدو سره به په معروف ولسوالۍ کې روغتیايي خدماتو ته د خلکو لاسرسی زیات شي.
د طالبانو تر واک لاندې د ملي پراختیا شرکت وایي، د بزګرانو او کرنیزو شرکتونو د ملاتړ په موخه یې بېلابېل کرنیز ماشینونه تولید او د پلور لپاره بازار ته وړاندې کړي دي. په دغو تولیداتو کې ترېشرونه، لیزر لیولونه، د نیالګیو اېښودلو ماشینونه او بېلابېلې قلبې شاملې دي.
طالبانو د هرات ولایت په انجیل ولسوالۍ کې په څلور نیم جریبه ځمکه کې د ۲۵ میلیونه افغانیو په لګښت یو جومات جوړ کړی دی. دا په داسې حال کې ده چې افغانستان له سخت اقتصادي بحران سره مخ دی او د ملګرو ملتونو د نوي راپور له مخې، له هرو څلورو افغانانو څخه درې یې بشپړ خواړه نلري.
د هرات ولایت لپاره د طالبانو د والي رسنیز دفتر وايي، چې په وروستیو کلونو کې په هرات کې د الوبالو کښت په بې ساري ډول زیات شوی دی. دا مېوه د خپل وختي رسېدو او په بازار کې د ښه بیې له امله د باغ لرونکو لپاره په یو ښه عایداتي محصول بدله شوې ده.
افغانستان انټرنشنل داسې سندونو ترلاسه کړي، چې د طالبانو د کونړ ښاري محکمې رییس ظاهر الله مروان د مدني دیوان رییس محمد اسلام عارفي او مفتي احسان الله د ۳۵ زره امریکایي ډالرو په بدل کې په شهادت پاڼو کې جعلکاري کړې ده. جنجال په اسعداباد کې د یوې څو پوړیز مارګېټ پر ځمکه پیل شوی دی.
د طالبانو د معیار او کیفیت ادارې ویلي، چې لسګونه زره کیلوګرامه ودانیز او برېښنايي توکي یې له کورنیو معیارونو سره د سمون نه درلودو له امله له ارزونې او د کیفیت تر کنټرول وروسته د اسلام کلا له لارې بیرته ایران وګرځول
په مشهد کې د طالبانو کونسل نور محمد متوکل د ایران د خراسان رضوي ولایت له عمومي څارنوال حسن همتيفر سره په لیدنه کې د افغان بندیانو د لېږد پر اسانتیا او د پروسې پر چټکتیا خبرې کړې دي.
د طالبانو د عدلیې وزارت اعلان کړی، چې د جوزجان په مرکز کې یې ۱۴،۵ جریبه ځمکه د دولتي ملکیت په توګه ثبت کړې ده. یاد وزارت زیاته کړې، چې دغه ځمکه به د غصب شویو ځمکو د استرداد کمېسیون ته وسپاري.
په مسکو کې د طالبانو سفارت وایي، د دوی سفیر ګل حسن حسن د سنټ پیټرزبورګ نړیوال اقتصادي فورم په څنډه کې له یو شمېر روسي لوړپوړو چارواکو سره د افغانستان او روسیې ترمنځ د اقتصادي او سوداګریزو اړیکو د پراختیا او د افغان سوداګرو لپاره د نویو فرصتونو د رامنځته کېدو په اړه خبرې کړې دي.
د افغانستان پخواني ولسمشر حامد کرزي د قطر «غوره روزنې بنسټ» له لوري د امریکا له پوهنتونونو څخه د۷۴ افغانو نجونو د فراغت مبارکي ویلي او له یاد بنسټ څخه یې افغان نجونو ته د تحصیلي بورسونو د برابرولو هرکلی او مننه کړی.
د اوکراین ولسمشر ولادیمیر زیلنسکي وایي، د اوکراین ځواکونو د روسیې پر ضد د خپلو وروستیو بریدونو په ترڅ کې د سنټ پیټرزبورګ په سیمه کې د روسیې د سمندري ځواکونو وسلو زېرمې او د کرونشتات پوځي اډه، او همداراز د کراسنودار په سیمه کې د تېلو یوه زېرمه په نښه کړې ده.
هرات کې د طالبانو د بدني روزنې، ورزش او المپیک ریاست وایي چې د اوړي د لامبو جام سیالۍ د دغه ولایت په مرکز هرات ښار کې د ۶۰ ورزشکارانو په ګډون ترسره شوې.
د طالبانو کورنیو چارو وزارت وایي چې د نشهیي توکو پر وړاندې د مبارزې ځواکونو یې د هېواد په بېلابېلو ولایتونو کې د ځانګړو عملیاتو پر مهال ۶۸ کسان د نشهیي توکو د قاچاق او پلور په تړاو نیولي دي.
اروپايي ټولنه په داسې حال کې بروکسل ته د طالبانو د یوه پلاوي د ورتګ او خبرو اترو چمتووالی نیسي چې تر دې وړاندې یې د ښځو او نجونو پر حقونو د طالبانو محدودیتونه غندلي وو او خبرداری یې ورکړی و چې دغه کړنې ښايي د جنسیت پر بنسټ ځورونې تر کچې ورسېږي.
د افغانستان د پخواني جمهوري نظام د دفاع وزارت د پالیسۍ او ستراتېژۍ مرستیال تمیم عاصي ادعا کړې چې یو شمېر «لوېدیځپال افراطي فیمینستان» د افغان ښځو د درد، ځورونې او بشري حقونو د سرغړونو پېښې د شخصي شهرت، مالي ګټو او د لوېدیځو بنسټونو د جایزو د ترلاسه کولو لپاره کاروي.
د خیبر پښتونخوا په خېبر ولسوالۍ د تکیې سیمې د نیکي خېلو، سلطان خېلو او نورو اپرېدي ټبرونو په ګډه جرګه کې د سیمې د وروستۍ ناامنۍ په تړاو پرېکړه کړې چې د واکسین په تطبیق کې به همکاري نه کوي اوښوونځي به تر امن راتلو پورې تړلي وي.