آرشیف

د طالبانو د اطلاعاتو او کلتور وزارت د خپرونو چارو مرستیال مهاجر فراهي په قطر کې د طالب چارواکو او پاکستان پوځ تر منځ کېدونکو خبرو ته په اشارې وايي، طالب مرکچي پلاوی به په قطر کې د امریکا په نیابت پر جنګېدونکې پوځ هم بریالی کېږي.

د طالبانو مشر د ۲۱۵م العزم قول‌اردو او د ۲۱۷م العماري قول‌اردو د قوماندانانو او د هلمند، بدخشان او ارزګان د والیانو په کچه بدلونونه راوستي دي. د دغو بدلونونو له مخې، محمد اسماعیل د بدخشان والي، امان‌الدین منصور د هلمند والي او عبدالرحمان کندوزي د ارزګان والي ټاکل شوي دي.

د افغانستان د اسلامي وحدت ګوند مشر د جنرال عبدالرازق اڅکزي د ترور د اووم تلین په مناسبت وویل، چې هغه د هېواد د ملي یووالي په سمبول بدل شوی او نوم به یې د خلکو په ذهنونو کې تلپاتې وي. جنرال عبدالرازق د طالبانو مخالف قوماندان و، چې په کندهار کې د طالبانو په ډزو کې ووژل شو.

د تېر جمهوري نظام د ملي دفاع وزارت پخوانی سرپرست شاه محمود میاخېل وايي، د اوس وخت لپاره د یوې واقعي لویې جرګې رابلل اړین دي چې هم د پاکستان پر وړاندې ملي انسجام رامنځته او هم د افغانستان د راتلونکې نظام د مشروعیت لپاره د ملي اجماع له لارې زمینه مساعده شي.

د اسراییل د لومړي وزیر بنیامین نتنیاهو دفتر اعلان کړی، چې د مصر او غزې تر منځ د رفح لار به تر بلې خبرتیا پورې بنده پاتې شي. اسراییل د دې پرېکړې لامل د حماس له لوري د اوربند د تړون نه‌پلي کېدل بللي دي.

د طالبانو د مالیې وزارت اعلان وکړ، چې طالبانو د تقاعد د ورکړې درېیم پړاو پیل کړی او په درېیم پړاو کې به د سرحدونو او قبایلو چارو، کلیو بیارغونې او پراختیا، حج او اوقافو وزارتونو او د دفاع وزارت د جنرالانو د تقاعد شویو کسانو معاشونه ورکړي.

د مخکیني جمهوري نظام پرمهال د بهرنیو چارو پخواني وزیر محمد حنیف اتمر د جنرال عبدالرازق اڅګزي د اووم تلین پرمهال وویل، چې د طالبانو د ظلم پر وړاندې مبارزه د ټولو افغانانو مسولیت او دنده ده.

د ملي مقاومت جبهې مشر احمد مسعود د کندهار د پخواني امنیه قوماندان جنرال عبدالرازق اڅګزي د اووم تلین نمانځغونډه کې د افغانستان د اوسني کړکېچ د حل لپاره پر یووالي ټینګار وکړ. نومړي زیاته کړه چې د افغانستان بحران په بهرنۍ نسخه نه حل کېږي او د یاد کړکېچ حل د افغانانو په لاس کې دی.

د طالبانو د ننګرهار ولایت د امر بالمعروف او نهی عن المنکر ریاست ویلي، چې په نازیانو ولسوالۍ کې یوه کم‌عمره نجلۍ، چې د کورنۍ غړو یې غوښتل هغه د ډېرو پیسو په بدل کې د هغې له خوښې پرته یوه کس ته واده کړي، د طالبانو محتسبینو له‌خوا یې مخه ونیول شوه.

د پاکستان او طالبانو تر منځ د وروستیو نښتو له امله ټولې سوداګریزې لارې په بشپړه توګه تړل شوې دي او سوداګریزې چارې درېدلي دي. د پاکستاني چارواکو په وینا د د تورخم، خرلاچي، غلام خان او چمن په ګډون ټولې سوداګریزې لارې تړل شوي چې له دې سره یې سوداګرو ته میلیونونه ډالر تاوان اړولی.

د طالبانو دفاع وزارت د ستراتيژيکو نشراتو او اطلاعاتو رییس عنایت‌الله "خوارزمي" په ختیځ زون کې د ډیورنډ کرښې له یو شمېر نقطو څخه لیدنې کړې. د طالبانو ملي دفاع وزارت له خوا په خپره شوې ویډیو کې د طالبانو ځواکونه وايي چې دوی د پاکستان د بریدونو پر وړاندې پوره چمتوالی لري.

د کندهار په سپین بولدک ولسوالۍ کې ځايي طالبانو ویلي، چې د سپین بولدک دروازه نن د شنبې په ورځ د موقت وخت لپاره د افغان کډوالو د راستنېدو پرمخ خلاصه وه، خو د کډوالو پرته نور پر هر ډول تګ راتګ بندیز لګول شوی.

د طالبانو د کورنیو چارو وزیر سراج الدین حقاني ته نږدې کس او د هغه مرستیال محمد نبي عمري د طالبانو او پاکستان ترمنځ د وروستیو نښتو په اړه وايي، چې پاکستان یرغل ګر دی او باید د عقل څخه کار واخلي. نوموړی زیاتوي، چې پاکستان د تحریک طالبان پاکستان شرعي او منطقي غوښتنې نه مني.

د طالبانو د کرنې، اوبو لګولو او مالدارۍ وزارت د احصایې او کرنیزو معلوماتو ریاست د شمېرو پر بنسټ، سږ کال په هېواد کې د انځرو حاصلات د تېر کال په پرتله ۳۵ سلنه زیات شوي دي. د دغو شمېرو له مخې، سږ کال له ټول هېواد څخه ۱۵۱ زره او ۷۵۴ میټریک ټنه انځر ترلاسه شوي دي.

د طالبانو د کډوالو او بېرته راستنېدونکو چارو وزارت ویلي، چې د عراق او پاکستان له زندانونو څخه ۱۷۰ تنه افغان کډوال خوشې شوي دي. د خوشې شویو کډوالو له ډلې څخه ۱۴۸ تنه د تېرو دوو میاشتو راهیسې په پاکستان کې بندیان وو او ۲۲ تنه نور د تېرو ۷ میاشتو راهیسې په عراق کې بندیان وو.

د هرات ولایت په صنعتي ښارګوټي کې د درملو یوه خصوصي تولیدي کارخونه ۷۸ ډوله درمل تولېدوي، چې د هېواد ۳۰ ولایتونو ته یې صادروي. دغې کارخونې ۹ میاشتې وړاندې د ۸ میلیونه امریکایي ډالرو په پانګونې سره فعالیت پیل کړی او دا مهال د اړتیا وړ درمل تولیدوي.

د روسیې د بهرنیو چارو وزارت اعلان کړی چې دغه هېواد غواړي له چین سره د امنیتي همکارۍ کچه د آسیا – اقیانوسیه په سیمه کې نوره هم لوړه کړي.

د افغانستان د خبریالانو مرکز نن شنبه د (تلې ۲۶مه) ویلي، چې د طالبانو له‌خوا د شمشاد راډيو او ټلوېزیون تړل غندي او له طالبانو غواړي، چې پر دې پرېکړه له سره غور وکړي.

په نورستان ولایت کې د طالبانو د کانونو او پټرولیم ریاست ځايي مسوولینو ویلي، چې د ازادې بولۍ له لارې یې د ۲۲ میلیونه او ۷ سوه زرو افغانیو په ارزښت د بیروج ډبرې پلورلې دي.

د سپین بولدک ولسوالۍ لپاره د طالبانو کمیسار فیض الحق سعید وايي چې پرون جمعه ۱۲بجې د لنډې مودې لپاره د سپین بولدک دروازه د افغانانو پرمخ خلاصه شوې وه. د هغه په خبره، سلګونه کسان په دې موده کې بېرته خپل هېواد ته ور ستانه شوي.

د طالبانو ویاند ذبیح الله مجاهد په کابل کې یوې فعالې خصوصي رسنۍ سره په خبرو کې ویلي چې افغانستان د «هیڅ لورې د لاس اله نه ده ګرځېدلې» او له هند سره د دوي اړیکې د پاکستان پر ضد نه دي.