په تاشکند کې د طالبانو سفیر عبدالغفار بحر د ازبکستان د بهرنيو چارو وزارت د کونسلي چارو له ريیس شیرزاد باتوروف سره پر دوه اړخیزو دیپلوماټیکو اړیکو، سوداګرۍ او په ازبکستان کې د میشتو افغان وګړو پر ستونزو خبرې کړې دي.
په ننګرهار کې د طالبانو د امنیه قوماندانۍ ویاند سیدطیب حماد خبر ورکړی، چې د ننګرهار په پچیراګام ولسوالۍ کې یې د یو لړ عملیاتو پرمهال د ۳۰مېلیونه افغانیو په ارزښت د ۳۰کیلو ګرامه بیروج ډبرو د قاچاق مخه نیولې ده.
د روسیې په سوېلي سیمو کې د اوکراین د بېپیلوټه الوتکو په جلا، جلا بریدونو کې لږترلږه ۱۱ کسان چې دوه ماشومان هم پهکې شامل دي، ټپیان شوي او په یوه بله پېښه کې د تېلو په یوه ستره تصفیهخونه کې اور لګېدلی.
د طالبانو ماليې وزارت خبرداری ورکړی، چې د روانې سلواغې میاشتې تر ۱۹مې نېټې وروسته له پاکستان نه هر ډول وارېدوونکي درمل نه محصولېږي. دغه وزارت (د سلواغې لومړۍ نېټه) د یوې خبرپاڼې په خپرولو سره ویلي، چې دغه پرېکړه د طالبانو د ریاستالوزرا اقتصادي معاونیت په سپارښتنه شوې ده.
د کندهار د عینو مېنې اوسېدونکي وایي، د طالبانو د امربالمعروف محتسبانو لهخوا پر عامو خلکو فشارونه زیات شوي او له محاکمې پرته د دوی نیونه او سپکاوی یوه عادي چاره ګرځېدلې. د دوی په وینا؛ ځینې نیول شوي کسان لومړی په کانټینرونو کې ساتل شوي او وروسته د حوزې محبس ته لېږدول شوي دي.
د اقتصادي همکارۍ سازمان (ایکو) سرمشریزې لسمه غونډه د چهارشنبې په ورځ (د سلواغې لومړۍ نېټه) د پاکستان په پلازمېنه اسلاماباد کې د طالبانو د ادارې استازي له ګډون پرته پيل شوه. د دغه دوه ورځنۍ غونډې موخه د طبیعي پېښو د ګواښونو د کمښت په برخه کې د سیمهییزې همکارۍ پیاوړتیا ښودل شوې.
د طالبانو د ریاستالوزرا اقتصادي مرستیال تر مشرۍ لاندې د پانګونې بینالوزارتي کمېټې په نوبتي غونډه کې د هغو نویو پانګهوالو او صنعتکارانو لپاره د مالي معافیتونو پر طرحه بحث شوی، چې غواړي په هغو سکتورونو کې پانګونه وکړي چې تر اوسه پهکې پانګونه نهده شوې.
د طالبانو د کورنيو چارو وزارت نن چهارشنبه (د سلواغې لومړۍ نېټه) خبر ورکړی، چې په لغمان ولايت کې د دوی د ځواکونو د يو لړ کشفي عملياتو په ترڅ کې اته کسان د غلا په تور نیول شوي دي.
په هرات کې د طالبانو د والي ویاند یوسف سعیدي ویلي، چې په تېرو ۹ میاشتو کې د اروپا او اسیا هېوادونو څخه ۳۸۳ ټنه توکي د هرات-خواف رېل پټلۍ له لارې افغانستان ته را لېږدول شوي دي. نوموړي ویلي، چې د یادې لارې د ترانسپورټ بهیر ورځ تر بلې د پراخېدو په حال کې دی.
د امریکا د ولسمشر ډونالډ ټرمپ الوتکه چې د داووس په لور روانه وه، د سېشنبې په ماښام له هوایي ډګره تر الوتنې وروسته له تخنیکي ستونزې سره مخ شوه. سپینې ماڼۍ ویلي، چې د ټرمپ الوتکه له یوې «کوچنۍ تخنیکي ستونزې» وروسته واشنګټن ته نږدې د انډریوز ګډې اډې کې په خوندي ډول ښکته شوه.
د هسپانیا په ادموز سیمه کې د یکشنبې په ورځ (د مرغومي ۲۸مه) د دوو چټک اورګاډو د ټکر له امله د مړو شمېر ۴۲ ته لوړ شو. هسپانوي چارواکي وایي، په یاده پېښه کې ۳۷ کسان ټپیان شوي هم دي.
په کندوز کې د طالبانو د کډوالو او بېرته راستنېدونکو چارو رياست خبر ورکړی، چې د دغه ولایت د چهاردرې ولسوالۍ د خواجه کفتر ښارګوټي په سيمه کې پر نږدې ۸۰۰ تازه راستنو شويو کډوالو کورنيو یې نمرې وېشلې دي.
په هلمند کې د طالبانو د فرعي ګمرکاتو ریاست خبر ورکړی، چې د تېرې یوې میاشتې په لړ کې د اړونده ادارو ګرځنده ډلو له لوري په مرکز لښکرګاه ښار او یوشمېر نورو سیمو کې د شاوخوا ۳۰ ټنه خوراکي او غیرخوراکي توکو د ناقانونه واردولو مخه نیول شوې ده.
د طالبانو تر واک لاندې د کډوالو ستونزو ته د رسېدنې کمېسیون د ستنېدونکو کډوالو په ورځني راپور کې ویلي، (د مرغومي ۳۰مه) له پاکستان او ایران نه ۳۸۰ کورنۍ چې ټولټال ۲۰۳۴ کسان کېږي؛ افغانستان ته ستنې شوې دي. طالبانو ویلي، چې په بېلابېلو برخو کې یې له دغه کورنیو سره مرستې کړې دي.
د پاکستان د هوايي ډګرونو ادارې (PAA) د چهارشنبې په ورځ (د سلواغې لومړۍ نېټه) خبر ورکړی، پر هندي الوتکو د هوايي حریم بندیز به د فبرورۍ تر ۲۴مې نېټې پورې وغځول شي. تر دې وړاندې یادې ادارې د جنورۍ تر ۲۳مې پورې پر هندي الوتکو د هوايي حریم بندیز اعلان کړی و.
د ملګرو ملتونو د پراختیايي پروګرام (UNDP) اقتصاد پوه محمد نسیم عطایي وایي، افغانستان د سیمې په کچه د انرژۍ د ناامنیو له جدي ستونزو سره مخ دی او د هېواد د برېښنا تولید او مصرف ترمنځ لوی توپیر د ژوند عادي اړتیاوو پوره کولو برخه کې شته ستونزې لا پراخوي.
د طالبانو د ټولګټو چارو وزارت ویاند محمد اشرف حقشناس ویلي، چې د درنې واورې، توپان او د لید کچې د کمښت له امله د سالنګ لویه لاره نن سهار ۵ بجې د مساپر وړونکو او بار وړونکو موټرو د تګ راتګ لپاره تړل شوې ده.
په ننګرهار کې د طالبانو امنیه قوماندانۍ خبر ورکړی، چې د خوږیاڼو ولسوالۍ په چمتلې سیمه کې یې د غلو ۸ کسیزه ډله له وسلو سره نیولې. طالبانو ویلي، ۵ تنه نور یې بیا د یاد ولایت په بټي کوټ ولسوالۍ کې نیولي چې ۵۰ تازه ثمر ته رسېدلي د شفتالو نیالګي یې پرې کړي وو.
د امریکا ولسمشر ډونالډ ټرمپ یو ځل بیا له افغانستان نه د امریکایي ځواکونو د وتلو له امله د جو بایډن پر ادارې نیوکه کړې. ټرمپ تېره ورځ په یوې خبري ناسته کې له افغانستان نه وتل او په کابل هوایي ډګر کې د ۱۳ امریکايي سرتېرو وژل «د امریکا په تاریخ کې تر ټولو کمزوری ټکی» وباله.
د امریکا ولسمشر ډونالډ ټرمپ د دغه هېواد اقتصادي وده بېسارې بللې او ویلي دي، چې پانګونې او ټیټې شوې بیې د امریکا اقتصاد ځواکمن کړی. هغه د داووس نړۍوال اقتصادي فورم ته خپل سفر د دغه هېواد د استازولۍ او د اقتصادي فرصتونو د لا پراختیا لپاره مهم وباله.
په کندهار کې د طالبانو والي ملاشیرین په مشرۍ د یادې ډلې د اوو زونونو والیانو د خپل مشر ملاهبت الله اخوندزاده د فرمانونو او حکمونو د تطبیق په اړه غونډه کړې. په دغه غونډه کې د نشهيي توکو د کښت، قاچاق، پېر او پلور پر مخنیوي او د امنیت پر ټینګښت هم بحث شوی.