د طالبانو تر واک لاندې د ازموینو ملي ادارې مرستیال رحیمالله حقاني نن په کابل کې د کانکور ازموینې د درېیم پړاو د پرانیستې په مراسمو کې ویلي چې د ۱۴۰۵ کال په کانکور ازموینه کې شاوخوا ۱۲۰ زره کسانو ګډون کړی دی.
د ناټو د بالتیک د فضاڅارنې ماموریت په اډانه کې فرانسوۍ جنګي الوتکې د تېرې یوې اونۍ په اوږدو کې د روسۍ الوتکو د څارنې په موخه ۱۱ ځله الوتې دي. د فرانسې د وسلهوالو ځواکونو ویاند دغه شمېر د معمول په پرتله د «پاروونکو اقداماتو» لوړه کچه بللې ده.
د طالبانو تر واک لاندې د ترانسپورټ او هوايي چلند وزارت د هوا پوهنې ادارې د هېواد په ۱۲ ولایتونو کې د سخت باران، تالندې برېښنا، چټکو بادونو، خاورو او ناڅاپي سېلابونو د راوتلو اټکل کړی دی. یاده اداره زیاتوي چې دا وړاندوینه د جمعې ورځې، د غبرګولي ۱۵مې لپاره د اعتبار وړ ده.
ریچارډ بېنېټ وايي، د هغه دفتر په زندانونو کې د طالب چارواکو لهخوا د جنسي تاوتریخوالي او تېري ګڼې پېښې تایید کړې دي. بېنېټ افغانستان انټرنشنل ته ویلي، چې په مرکو کې په ډاګه شوې چې قربانیان یوازې ښځې او نجونې نه، بلکې نارینه او کم عمره هلکان هم دي.
د پاکستان د بهرنیو چارو وزارت په ترکیه کې له طالبانو سره د احتمالي مذاکراتو په اړه ناخبري ښودلې، خو ټینګار کوي، چې اسلاماباد د افغانستان په ګډون له ټولو ګاونډیو هېوادونو سره پر مذاکراتو او ډیپلوماسۍ باور لري.
د بشري حقونو د فعالانو اژانس (هرانا) ویلي، چې افغانه مېرمن حمیرا شریفي د ۱۴۰۴ کال د مرغومي میاشتې د اعتراضونو پر مهال نیول شوې وه او اوس په پنځه کاله بند محکومه شوې ده.
د خیبر پښتونخوا د پولیسو مشر ذوالفقار حمید وایي، په سویلي ولسوالیو کې وسله والې ډلې د پولیسو کورنیو ته ګواښونه کوي، خو حکومت د دوی د امنیت لپاره جدي ګامونه پورته کوي. هغه وویل چې د پښتونخوا پولیس د هېواد په کچه تر ټولو سخته جګړه پر مخ وړي او تر نورو ولایتونو یې ډېر تلفات ورکړي.
د پاکستان د بهرنیو چارو وزارت هغه راپورونه رد کړل چې ګواکې د دغه هېواد د بهرنیو چارو وزیر اسحاق ډار په واشنګټن کې د امریکا د بهرنیو چارو وزیر مارکو روبیو سره د لیدنې پر مهال د ایران د اټومي پروګرام په اړه معلومات شریک کړي دي.
د امریکا د کډوالۍ چارو مامورینو په هسپانیا کې پخوانی افغان سفیر رحیم پیرزاده په واشنګټن کې له دې امله په توقیف کې ساتلی، چې په ۲۰۲۱ کال کې یې د طالبانو له واک ته رسېدو وروسته له دې ډلې سره په همغږۍ د سفارت چارې پرمخ وړې دي.
د طالبانو مشر مولوي هبت الله اخوندزاده د شمال لویدیځ او شمال ختیځ زون د ۹ ولایتونو له والیانو او چارواکو سره په لیدنه کې ویلي، کومه بښنه یې چې خپلو مخالفانو ته کړې، اوس هم دوی له هغوی سره حساب نه کوي. نوموړي خپلو والیانو ته سپارښتنه کړې، چې دده فرمانونه خلکو ته ورسوي.
د طالبانو د صنعت او سوداګرۍ وزیر نورالدین عزیزي د منځنۍ او سوېلي اسیا ترمنځ د اتصال په تړاو د ترمذ خبرو اترو په دویمه ناسته کې انلاین ګډون کړی او ویلي یې دي، چې افغانستان د منځنۍ او سوېلي اسیا ترمنځ د یو ارتباطي پُل په توګه د ځانګړي رول لوبولو وړتیا لري.
د زده کړو د ملاتړ نړۍوال بنسټ له پوهنتون نه د هغو ۷۴ افغان نجونو د فراغت مراسم ونمانځل چې د قطر د یوه بنسټ په ملاتړ سکالر شېپونه ورکړل شوي وو. دا هغه نجونې دي چې د طالبانو له واکمنېدو وروسته یې د زده کړو بهیر له خنډ سره مخ شوی و.
د کندهار ولایت د سپین بولدک له لارې ۱۹۹ افغان بندیان چې تازه د پاکستان له زندانونو خوشې شوي وو، نن طالبانو ته وسپارل شول. په کندهار کې د طالبانو د کډوالو او راستنېدونکو چارو ادارې ویلي، چې په دې ډله کې ښځې او ماشومان هم شامل دي.
د بغلان په دوشي ولسوالۍ کې د تازه کرل شویو چنارونو تر سیوري لاندې د کلي مشر غلام علي پویا ویاړي چې د جګړو له کلونو وروسته اوس خلک د ونو ارزښت بیا پېژني. هغه وویل، چې «مرغانو ته قفسونه مه جوړوئ»، ونې وکرئ، هغوی پخپله راځي.
د روسیې د صدراعظم مرستیال الکسي اوورچوک ویلي چې د افغانستان له لارې د اورګاډي پټلۍ د جوړولو پروژه، سره له دې چې سیمه له بېثباتۍ سره مخ ده، لا هم په فعاله توګه تر بحث لاندې ده.
د خیبر پښتونخوا سر وزیر سهیل اپریدي خبرداری ورکړی، که د پاکستان تحریک انصاف ګوند له بنسټګر عمران خان سره پر ملاقات بندیز دوام وکړي؛ نو د ګوند وکیلان او استازي به (د جون په ۱۰مه) د پاکستان د قامي اسمبلۍ مخې ته پرلت ووهي.
په کندهار کې د سږکال صادراتو لپاره تر سل ټنه زیات وچ انځر چمتو شوي دي. سوداګر وایي، د پاکستان له لارې د سوداګرۍ پر وړاندې رامنځته شویو خنډونو او د ایران پر مسیر د شته ستونزو له امله دغه محصول لاهم په ګدامونو کې بند پاتې دی.
د بشري حقونو یو بنسټ «الدمیر» وايي، د ۲۰۲۳کال په اکتوبر میاشت کې د اسراییل د جګړې له پیل راهیسې په غزه کې تر ۹۵۰۰ زیات فلسطینیان تري تم شوي دي. د یاد بنسټ په وینا؛ په دې ډله کې ۴زره او ۷۰۰ ښځې او ماشومان هم شامل دي.
سرچینو افغانستان انټرنشنل ته ویلي، چې په کویت کې د افغانستان سفارت د طالبانو یوه ډیپلومات ته سپارل شوی. د سرچینو په وینا؛ د طالبانو د بهرنیو چارو وزارت خپل یو ډیپلوماټ مولوی محمدشفیق خطیب کویت ته د نوي سفیر په توګه معرفي کړی.
په هرات کې د لبنیاتو ټولنې مسوولین وایي، چې اوسمهال په دغه ولایت کې شاوخوا ۲۵۰ د لبنیاتو پلورلو هټۍ او ۱۰ تولیدي کارخونې فعالې دي. د یادې ټولنې مشر عبدالرحیم عثماني وايي، په هرات کې هره ورځ له ۱۳۰ تر ۱۴۰ ټنه شېدې تولیدیږي.
د خیبر پښتونخوا د مردان ښار د شیخ ملتون ټاون په سیمه کې ناپېژاندو کسانو د یوې کورنۍ درې غړي په خپل کور کې وژلي دي. ځایي پولیسو ویلي، چې په وژل شویو کسانو کې یوه مېرمنه هم شامله ده.