آرشیف

په هالند کې مېشتې افغان‌الاصله حقوقي او سیاسي فعالې څانګې صدیقي د هالند هغه پرېکړه ستایلې چې له مخې یې افغان ښځو ته د پناه او ملاتړ زمینه برابریږي.

د وزیرستان قومي مشرانو، سیاسي او ټولنیزو فعالانو او ځوانانو د ناامنۍ، هدفي وژنو، تښتونو او نورو امنیتي ستونزو پر ضد د یوې پراخې قومي امن جرګې د جوړېدو اعلان کړی او ویلي یې دي چې د سیمې خلک نور د دوامدارې ناامنۍ، جبري بې‌درکیو او امنیتي ستونزو د زغملو توان نه لري.

د افغانستان د پخواني جمهوري نظام د بهرنیو چارو وزیر، محمد حنیف اتمر، د پښتو ملي ورځې په مناسبت ویلي چې د دې ورځې نمانځنه باید د پښتو ژبې د پراختیا، ودې او علمي څېړنو لپاره د ملي ژمنتیا د نوي کولو په ارزښتمن فرصت بدله شي.

د بریتانیا د لېسټر پوهنتون څېړونکو موندلې چې د ککړې هوا تنفس کول د ماشومانو د سږو وده ورو کولی شي او اغېزې یې ان د ځوانۍ تر لومړیو کلونو پورې دوام مومي. په دې څېړنه کې له وخت مخکې زېږون، د مور شیدې، د والدینو له‌خوا د تنباکو کارول او د کور چاپېریالي شرایط لکه رطوبت هم ارزول شوي.

د تېر جمهوري نظام د ملي امنیت پخواني رييس رحمت‌الله نبیل د ملګرو ملتونو د امنیت شورا راپور ته په غبرګون کې چې په افغانستان کې طالبانو له ۲۱ ښځو او نجونو سره تاوتریخوالی او ان پرې جنسي تېری یې کړی ویلي، دا راپور د طالبانو دیني او انساني مشروعیت لا نور هم تر جدي پوښتنې لاندې راولي.

له کابل څخه افغانستان انټرنشنل- پښتو ته په یوې رالېږل شوې ویډیو کې ښکاري چې یوه نجلۍ د قرغې پر سړک دولتي تور پلېټ لرونکی موټر چلوي. د کابل یوه اوسېدونکي ویلي، چې طالبان نجونو ته د زده کړو د دوام اجازه نه‌ورکوي، خو د کورنۍ ښځینه غړې یې بیا دولتي موټر چلوي.

د هالنډ «اېن‌اېل ټایمز» رسنۍ راپور ورکړی، چې افغان ښځې او نجونې به له دې وروسته په ډېرو مواردو کې د استوګنې د اجازې د ترلاسه کولو وړ وبلل شي.

د پاکستان د بهرنیو چارو وزیر اسحاق ډار له ابراهيمي تړون سره د پاکستان د یو ځای کېدو اوازې رد کړې او ټینګار یې کړی، چې د فلسطین د خپلواک دولت تر پېژندلو پورې به په دې اړه د اسلام‌اباد په دریځ کې هېڅ ډول «نرمښت» رانه‌شي.

د افغانستان د فوټبال ملي لوبډله د «الماس جوبیلي» په نوم په څلور اړخیزو نړیوالو سیالیو کې د ګډون لپاره مالدیف ته روانه شوه. دغه سیالۍ به د افغانستان، مالدیف، پاکستان او بنګله‌دېش د ۲۳ کلنو لوبډلې په ګډون د غبرګولي له ۱۱مې تر ۲۰مې پورې د مالدیف په پلازمېنه ماله کې ترسره شي.

د افغانستان د پخوانیو امنیتي ځواکونو یو شمېر افسران وايي، چې برېتانیا ته د لېږد لپاره له کلونو انتظار وروسته د افغانانو د ځای‌پرځای کېدو او مرستې پروګرام (ARAP) کې د دوی غوښتنلیکونه رد شوي او اوس په افغانستان کې له سرګردانۍ، ناهیلۍ او امنیتي ګواښونو سره ژوند کوي.

د پاکستان د بهرنيو چارو وزارت ویلي، اسلام‌اباد له واشنګټن سره د افغانستان له خاورې پاکستان کې د ترهګرۍ په تړاو اندېښنې شريکې کړي او د امنيتي ننګونو او د ترهګرۍ پرضد پر همکاریو یې ټينګار کړی دی. طالبانو بیا په وار وار په ډاګه کړې، چې افغانستان به د هېڅ هېواد پر ضد ونه‌کارول شي.

سرچینو افغانستان انټرنشنل ته ویلي، چې د خیبر پښتونخوا د کوهاټ ولسوالۍ اړوند د دره ادم‌خېل په تور څپر سیمه کې د امنیتي ځواکونو او وسله‌والو ترمنځ په نښته کې ۵ وسله‌وال او دوه پاکستاني عسکر وژل شوي دي. امنیتي سرچینو زیاته کړې، چې په دې نښته کې څلور نور پاکستاني عسکر ټپیان شوي دي.

د طالبانو له پېښو سره د مبارزې ادارې رییس ملا نورالدین ترابي ویلي، له راستنو شویو افغانانو سره مرسته اسلامي او انساني مسوولیت دی او ټولې ادارې باید په ګډه د هغوی لاسنیوی وکړي. هغه د جمعې په ورځ کندهار کې له نساجۍ سیمې تر عینو مېنې پورې د مېشتو راستنېدونکو وضعیت له نږدې ارزولی دی.

د طالبانو د کډوالو او راستنېدونکو چارو وزیر مولوي عبدالکبیر له یو شمېر دولتي چارواکو او مسوولینو سره په کتنو کې د خلکو او حکومتي بنسټونو تر منځ پر همکاریو او یووالي له ټينګار سربېره کډوالو او راستنېدونکو ته د خدماتو رسول د ټولو دولتي ادارو ګډ مسوولیت وباله.

د پاکستان تحریک انصاف ګوند ادعا کړې، چې د خيبرپښتونخوا لپاره د دغه ګوند مشر او ورسره نور پارلماني غړي د ګلګت بلتستان د انتظامیې له لوري نیول شوي دي. خو د ګلګت بلتستان حکومت دغه ادعا رد کړې او ويلي يې دي، چې هېڅوک نيول شوي نه‌دي.

د لندن د ترهګرۍ ضد پولیسو د جمعې په ورځ (د غبرګولي۸مه) اعلان وکړ، چې یو یونانی وګړی د ایران د اسلامي جمهوریت له استخباراتي ادارې سره په همکارۍ تورن شوی دی. د پولیسو په وینا، دا قضیه په برېتانیا کې د فعال ایران انټرنشنل د یوه خبریال له په نښه کولو سره تړاو لري.

د ایران د بهرنیو چارو وزارت ویاند اسماعیل بقایي ویلي، چې تهران په اوسني پړاو کې د جګړې پر پای ته رسولو تمرکز لري او د اټومي پروګرام د جزییاتو په اړه هېڅ ډول خبرې اترې نه‌کوي. بقایي زیاته کړې: «تر اوسه له امریکا سره هېڅ تفاهم یا هوکړه وروستۍ شوې نه‌ده».

د پاکستان حکومت د هر لیتر پټرول او ډیزل په بیو کې ۲۲ روپۍ کمښت اعلان کړی دی. د تازه بيو له‌مخې، په دغه هېواد کې يو لیتر پټرول په ۳۸۱ روپۍ او ۷۸ پيسې او یو لیتر ډيزل په ۳۸۰ روپۍ او ۷۸ پيسې شو.

د وال‌سټریټ ژورنال د راپور له مخې، متحده عربي امارات د جګړې په لومړیو ورځو او ان د اوربند تر اعلان یوه ورځ وروسته هم پر ایران لسګونه هوايي بریدونه کړي دي. د باخبره سرچینو په وینا، د دغو بریدونو کچه تر هغه څه ډېره پراخه وه، چې مخکې یې راپورونه خپاره شوي وو.

د پښتونخوا ملي عوامي ګوند او د پاکستان د اپوزیسیون مشر محمود خان اڅکزي چمن کې په یوې ولسي غونډه کې ویلي، په پاکستان کې مېشتو څلورو واړو ایالتونو ته د واک او سرچینو د مساوي حقونو له ورکولو پرته دغه هېواد هېڅکله پرمختګ نه‌شي کولای.

ملګرو ملتونو د جمعې په ورځ (د غبرګولي ۸مه) اسراییل او روسیه د هغو هېوادونو په تور نوملړ کې شامل کړل، چې د جګړو پر مهال د جنسي تاوتریخوالي د ترسره کولو په اړه پرې باوري شک موجود دی. د دې پرېکړې په غبرګون کې اسراییل ویلي، چې د ملګرو ملتونو له سرمنشي سره خپلې اړیکې ځنډوي.