د طالبانو تر واک لاندې د کډوالو د ستونزو د اواري کمېسیون پر پاکستان نیوکه کړې، چې د تورخم له لارې افغانستان ته ستنېدونکي کډوال د بېځایه پلمو له امله په ورځو ورځو ځنډوي. طالبانو ویلي، چې د افغان کډوالو د منلو او ځای پرځای کولو لپاره بشپړ امکانات لري.
د افغانستان پخواني ولسمشر حامد کرزی د فرانسې د نورماندي سیمې د ۲۰۲۶ کال د ازادۍ جایزې د ګټلو له امله د افغان نجونو د زدهکړو د حقونو فعال مطیع الله ویسا ته مبارکي ورکړې ده.
د طالبانو د کورنیو چارو وزارت اعلان کړی چې ددغه وزارت د مشرتابه شورا د پرېکړې له مخې پانګوال، سوداګر او نور اشخاص په نظامي یونیفورم کې له ځان سره ساتونکي نه شي ګرځولی. وزارت سپارښتنه کړې، چې دغه ساتونکي دې په ملکي جامو کې ګرځي.
له تاجکستان نه د ۲۵۰ افغان کډوالو له جبرې ستنولو وروسته په دغه هېواد کې مېشت یو شمېر افغان کډوال وايي، چې د تاجکستاني پولیسو د فشارونو له امله یې ورځنی ژوند له سختونو ننګونو سره مخ دی او له کورونو بهر نه شي وتلی.
د پاکستان یوې منځګړې سرچینې رویټرز ته ویلي، امریکا او ایران د جګړې پای ته رسولو لپاره د یوه لنډ، یومخیز هوکړه لیک په اړه وروستي پړاو ته نږدې شوي دي. سرچینې ویلي: «موږ ډېر نږدې شوي یو، دا به ډېر ژر پای ته ورسېږي».
په سویلي ولایتونو کې د طالبانو والیانو، امنیه قوماندانانو او د استخباراتو رییسانو په کندهار کې د یادې ډلې د والي ملا شیرین په مشرۍ امنیتي ناسته کړې ده. ملا شیرین په دې ناسته کې په سویلي ولایتونو کې د سیمهییزو مسولانو ترمنځ پر همغږۍ ټینګار کړی.
قرغیزستان د کاسا زر پروژې په چوکاټ کې د خپلو اړوندو تاسیساتو جوړول په لویه کچه بشپړ کړي دي او اوس د افغانستان د برېښنا لېږد د برخې د بشپړېدو انتظار کوي، څو د برېښنا د لېږد عمومي سیستم فعال شي.
د طالبانو د بهرنیو چارو وزارت د یوې اعلامیې په خپرولو سره د چین د هنان ولایت په لیانګ ښار کې د اورلوبې په یوه فابریکه کې د شوې چاودنې له امله د ۲۶ مړو شویو کسانو له کورنیو سره خواخوږي ښودلې ده.
د ازبکستان د ریل پټلۍ ادارې ویلي، چې د منځنۍ اسیا له لارې یې له چین څخه افغانستان ته د توکو د لېږد یو نوی څو اړخیز دهلېز پرانیستی دی. تردې وړاندې د دغه دهلیز ډیری توکي د سمندر له لارې د ایران بندر عباس ته لېږدول کېدل او په لاریو کې افغانستان ته لېږدول کېدل.
په ننګرهار کې د طالبانو امنیې قوماندانۍ خبر ورکړی، چې د دغه ولایت د روداتو ولسوالۍ اړوند په قطرغۍ سیمه کې د یوې ناچاوده مرمۍ د چاودنې له امله یو ماشوم وژل شوی او یوه بله ماشومه ټپي شوې ده.
د طالبانو د کانونو او پټرولیم وزیر د چین له سفیر او د لوګر د عینک مسو د استخراج د دوو قراردادي شرکتونو له رییسانو سره په ناسته کې د شوي تړون پر جدي پلي کېدا ټینګار کړی دی.
د برېتانیاد اصلاحاتو ډلې له اعلان وروسته په لنکاشایر سیمه کې د افغان کډوالو او نورو پناه غوښتونکو د بیا مېشتېدو پروګرامونو په اړه سیاسي شخړه راپورته شوې ده. د لنکا شایر سیمه ییزې شورا ویلي، غواړي له هغو دوو حکومتي پروګرامونو ووځي چې کډوال په سیمه کې ځای پر ځای کوي.
د پاکستان په ملي اسمبلۍ کې د روغتیا برخې د ځانګړې کمیټې په تازه خپرو شویو معلوماتو کې راغلي، شاوخوا ۲۰زره هغه ناروغان چې پر ایډز ناروغۍ اخته وو او د رغېدو لپاره یې ځانګړې درملنه روانه وه؛ لادرکه شوي دي.
د پاکستان لومړي وزیر شهباز شریف پر اېکس پاڼه د یوه پیغام په خپرولو د امریکا د ولسمشر ډونالډ ټرمپ لهخوا د « ازادۍ پروژې» د ځنډلو له پرېکړې هرکلی کړی. هغه لیکلي، چې دغه ګام به په اوسني حساس وخت کې د سیمې د تاوتریخوالي په کمښت کې مهم رول ولوبوي.
طالبانو کندهار پوهنتون کې چې د هېواد له سترو پوهنتونونو ګڼل کېږي او د افغانستان د ۳۴ ولایتونو محصلین پهکې زدهکړې کوي، د راتلونکي کال لپاره د ګډونوالو د شمېر په وېش کې داسې بدلونونه راوستي چې له امله یې د دیني زدهکړو پوهنځیو ته ډېر ځای ورکړل شوی او د عصري علومو برخه محدوده شوې.
د طالبانو د ټولګټو چارو وزیر محمدعيسی ثاني د ایران له سفیر علي رضا بېکدلي سره د اقتصادي او سوداګریزو اړیکو او زېربنايي پروژو پر پراختیا خبرې کړې. د دغه وزارت په خبرپاڼه کې د ایران د سفیر په حواله راغلي، ایران د ابونصر فراهي سړک د دویم لاټ ۵۳ کیلومتره سړک د رغونې چارې پیل کړې.
د سېشنبې په ورځ د نړۍ د سینما او موسیقۍ یوشمېر ستورو د نیویارک په مېټروپولیټن هنري موزیم کې د مت ګالا په کلنیو مراسمو کې برخه واخېسته. په دغه مراسمو کې د هندۍ سوداګرې ایشا امباني له ۱۸۰۰ الماسو او سره زرو جوړو شويو دودیزو جامو د ټولو پام ځان ته واړاوه.
د فرانسې د بار وړونکو کښتیو «CMA CGM» شرکت اعلان کړی، چې د دوی یوه کښتۍ «سان انتونیو» له هرمز تنګي څخه د تېرېدو پرمهال په نښه شوې ده. د یاد شرکت په وینا؛ په دغه برید کې چې د سېشنبې په ورځ شوی، د یادې کښتۍ عمله ټپي شوې او خپله کښتۍ ته هم زیان اوښتی دی.
د طالبانو د ټولګټو چارو وزارت خبر ورکړی، چې تېره اونۍ د اوسپنې پټلۍ له لارې ۲۲۹زره ۵۳۶ مټریک ټنه انتقالات شوي دي. د دغه وزارت په وینا؛ یاد انتقالات د حیرتان، اقينې، تورغونډۍ او خواف-هرات بندرونو له لارې شوي دي.
د طالبانو د اطلاعاتو او کلتور وزارت خبر ورکړی، چې د تېر ۱۴۰۴کال په لړ کې یې په نهو ولایتونو کې ۲۳ تاریخي ابدې رغولې دي. د یاد وزارت په وینا؛ دغه تاریخي ابدې په کندهار، بامیان، غزني، کونر، لغمان، پکتیا، پکتیکا، هلمند او کابل ولایتونو کې رغول شوې دي.
د طالبانو د کور او ښار جوړولو وزارت خبر ورکړی، د دغه وزارت لهخوا د کونړ هغو زلزلهځپلو کورنیو ته چې د وروستۍ زلزلې له امله یې کورونه ویجاړ شوي وو؛ د ننګرهار ولایت د ښېوې ولسوالۍ اړوند په ګمبیري سیمه کې پر زر جریبه ځمکه په نوي جوړ شوي ښارګوټي کې استوګنیزې نمرې وېشل شوې دي.