د اروپايي پارلمان غړې، هانا نیومن، د طالبانو د تخنیکي پلاوي د احتمالي سفر په اړه، چې ټاکل شوې د اروپایي ټولنې له غړو هېوادونو د افغان کډوالو د اخراج پر موضوع خبرې وکړي، توند غبرګون ښودلی او ویلي یې دي چې اروپایي چارواکي «په بروکسل کې د طالبانو لپاره سرې غالۍ هواروي».
نامتو روسي ختيځپوه او پخواني ډيپلومات اولېګ اکولينيچف ټينګار کړی، چې د طالبانو په اړه د روسيې اوسنۍ تګلاره بايد له سره وارزول شي. هغه خبرداری ورکړی چې يوازې د طالبانو پر ادارې تکيه کول د مسکو دريځ تنګ او زيانمن کوي.
د رویټرز خبري اژانس د راپور له مخې، د ایران د اسلامي جمهوریت یو لوړپوړي چارواکي ویلي چې د پاکستان هغه هڅې چې امریکا قانع کړي، څو سمندري کلابندي پای ته ورسوي او ایراني بېړۍ او د هغې عمله ازاده کړي، تر اوسه کومه پایله نه ده ورکړې.
سرچینو افغانستان انټرنشنل – پښتو ته ویلي چې په بلخ کې د طالبانو والي محمد یوسف وفا په دغه ولایت کې د دوی د علماوو شورا د رییس په مشرۍ یوه کمېټه ټاکلې، څو په مرکز او ولسوالیو کې د ولسي شخړو تر څنګ د جنایي پېښو اړوند مسایل حل کړي.
د طالبانو د کورنیو چارو وزارت خبر ورکړی، چې په هلمند، ارزګان، بادغیس او بلخ ولایتونو کې د جنایي جرمونو په تور ۲۸کسان نیولي دي. خبرپاڼه کې راغلي چې یوازې په هلمند کې لس کسان د غلاوو او یو بل کس د سټلایټ ټلېفون تر څنګ د تفنګچې ګرځولو په تور نیول شوی دی.
د اطلاعاتو او کلتور پخوانی وزیر عبدالباري جهاني وایي، په داسې حال کې چې افغانان د «لوی افغانستان» شعارونه ورکوي، پاکستان د «لوی پاکستان» د جوړولو عملي نقشې پر مخ وړي او د افغانستان روان وضعیت د جدي ملي ګواښ پر لور بیایي.
د ملګرو ملتونو د سرمنشي ویاند سټیفان دوجاریک د سهشنبې په ورځ د افغانستان بشري وضعیت په تړاو څرګندونې کړې دي. هغه ویلي، چې د بشري مرستو د همغږۍ دفتر (اوچا) خبر ورکړی، چې نورستان ولایت ته چې پخوا لارې بندې وې او لاسرسی ورته نه کېده، نن د مرستو یوه نوې چوپه رسېدلې ده.
د فرانسې ولسمشر ایمانویل مکرون ویلي، هېواد به یې د لبنان چارواکو سره د اسراییل سره د خبرو چمتووالي لپاره مرسته وکړي، که څه هم پاریس به مستقیم د مذاکراتو برخه نه وي. نوموړي دا څرګندونې د سه شنبې په ورځ د لبنان له لومړي وزیر نواف سلام سره په یوه ګډ خبري کنفرانس کې وکړې.
د اروپایي ټولنې د بهرني سیاست مشرې کایا کالاس ویلي، د دې ټولنې ډېپلوماټانو د هغو ایراني چارواکو پر ضد د نويو بندیزونو پر لګولو هوکړه کړې چې د هرمز تنګي کې د کښتيو د تګ راتګ ازادي ګډوډوي.
د ولسي جرګې پخواني غړي جعفر مهدوي د ډیورنډ کرښې په تړاو د روانو ناندریو په ترڅ کې ویلي چې افغانستان د ټولو خلکو ګډ کور دی. نوموړي د ملي حاکمیت د ساتلو او دفاع مسؤلیت د ټول ملت پر غاړه بولي. مهدوي زیاته کړې چې د دیورند موضوع د ټولو وګړو د ملي حاکمیت داعیه ده.
د قزاقستان چارواکي وایي، چې د دغه هېواد او افغانستان ترمنځ د اورګاډي له لارې د توکو لېږد د ۲۰۲۶ کال په لومړیو دریو میاشتو کې ۷۷سلنه زیات شوی او یو میلیون ټنو ته رسېدلی دی.
د پاکستان پخواني لومړي وزير او د مسلم ليګ ن ګوند مشر، نواز شريف په خېبرپښتونخوا کې د تحریک انصاف ګوند پر 15 کلنې واکمنۍ نيوکې کړي او ویلي یې دي چې په یاده موده کې دغه ګوند په پښتونخوا کې هيڅ کار نه دی کړی.
د طالبانو د کانونو او پټرولیم وزارت ویلي، چې د هرات ولایت د غوریانو ولسوالۍ د نمکسار سیمې د درېیم بلاک د استخراج قرارداد د ۱۰،۲ میلیونه امریکايي ډالرو په پانګونې سره لاسلیک شوی دی.
هلمند کې د طالبانو ځایي چارواکي وايي، چې د دغه ولایت په واشیر، ګرمسیر او باباجي ولسوالیو کې یې ۹۷ جریبه دولتي ځمکه له غصب څخه راګرځول شوې ده.
د طالبانو اړوند رسنیو راپور ورکړی چې د پکتیکا ولایت په برمل ولسوالۍ کې د پاکستاني پوځ د ډرون برید له امله یو ښوونیز بنسټ زیانمن شوی دی.
ځايي سرچینو افغانستان انټرنشنل ته وویل، چې د کاپیسا ولایت د تګاب ولسوالۍ د پاینده خېلو کلي په خیرالناس مدرسه کې ددغه ولایت لپاره د طالبانو پر والي احسان الله بریال بمي چاودنه شوې ده. د طالبانو والي دې مدرسې ته د یوې فاتحې لپاره تللی و.
په کابل کې د طالبانو چارواکي وایي چې له «اوا» ایراني شرکت سره د یوه تړون له مخې یوه بوینګ ۵۰۰-۷۳۷ ډوله چارتر الوتکه د یوه کال لپاره د اريانا افغان هوايي شرکت په واک کې ورکړل شوې ده.
د امریکا د پوځ مرکزي قوماندانۍ اعلان کړی، له هغه وخته چې د ایران پر جنوبي بندرونو او ساحلي سیمو یې سمندري محاصره پیل کړې، تر اوسه ۲۸ کښتیو د امریکايي ځواکونو په امر مسیر بدل کړی او بېرته د ایران بندرونو ته ستنې شوې دي.
د افغانستان د سوداګرۍ او پانګونې خونې مشر په کابل کې د هند او قزاقستان له سفیرانو سره جلا جلا لیدنې کړې او د سوداګرۍ پراختیا، اقتصادي همکاریو او د افغان سوداګرو د شته ستونزو د حل په اړه یې خبرې ورسره کړې دي.
د پاکستان پخواني لومړي وزیر انوارالحق کاکړ ویلي چې د نړیوالو لهخوا منل شوي نړیوال نظم په اړه سیاسي هوکړه د مخ پر وړاندې تګ یوازینۍ اغیزناکه لاره ده. هغه د ډیورنډ کرښې په تړاو د محمد محقق دریځ ستایلی او وايي، نوموړی «یو معقول غږ» دی.
د طالبانو تر واک لاندې د المپیک ملي کمېټې رییس احمدالله وثیق وایي، د کورش نړیوال فدراسیون د مشرتابه غړی امید جان رستموف د دودیزې غېږ نیونې سیالۍ لپاره کابل ته رسېدلی دی. د نوموړي په وینا، ۴۶ نور بهرني لوبغاړي هم کابل ته رسېدلي دي.