آرشیف

د ملګرو ملتونو د راپور له مخې؛ د سوډان د دارفور سیمې په کوتوم ښار کې د واده پر مراسمو د ډرون برید شوی، چې له امله یې د ښځو او ماشومانو په ګډون لږترلږه ۳۰ ملکي وګړي وژل شوي دي.

کندهار کې درې میاشتې وړاندې طالبانو د کندهار- هرات پر لویه لار په میوند ولسوالۍ کې ټولپلازه جوړه کړه، چې له کوچنيو موټرونو له ۵۰ تر ۱۰۰ او له باوروړنکو موټرو د ټاير په سر ۱۰۰ افغانۍ اخلي. موټر چلوونکي شکایت کوي، چې دغه عواید دولتي خزانې ته نه‌ځي، حساب نه‌شته او خدمات هم صفر دي.

د بې‌ځایه شویو نړۍوال سازمان وایي، هر هغه کس چې د بیا مېشتېدو لپاره له ارزونې او تایید څخه تېر شوی وي؛ که هغه له افریقا، اروپا او یا هم د افغان کډوالو د «پي۱‌، پي۲، پي۳» پروګرامونو برخه وي، باید د اړوندو هېوادونو له لوري ومنل شي.

د خیبر پښتونخوا ځایي چارواکو ویلي، چې د وروستیو سختو ورښتونو له امله د دغه ایالت په کورمه کې د چت پرېوتو په دوو جلا پېښو کې څلور ماشومان مړه شوي دي. د راپورونو له مخې؛ لومړۍ پېښه د کورمې په دوراني سیمه کې رامنځته شوې، چې په‌کې د یوې کورنۍ درې ماشومان مړه شوي دي.

له «پولیو پاک افغانستان» سازمان وايي، چې د دوشنبې په ورځ (د وري ۲۴مه) به له دایکنډي او بامیان پرته د افغانستان په بېلابېلو ولایتونو کې د ګوزڼ ضد واکسینو کمپاین پیل شي. د یاد سازمان په وینا؛ په دایکنډي او بامیان کې د ګوزڼ ضد واکسینو کمپاین د سړې هوا له امله ځنډول شوی.

د طالبانو د هواپوهنې ادارې خبر ورکړی، چې نن (د وري ۲۱مه) په ۲۶ ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل شوی دی.

د رواداري په نوم د بشري حقونو یو بنسټ راپور ورکړی، چې په ۲۰۲۵کال کې په افغانستان کې د ځمکنیو ماینونو او ناچاوده توکو د چاودنو له امله ۷۹ کسان وژل شوي او ۸۵ نور ټپیان شوي دي. دغه بنسټ زیاتوي، چې په وژل شویو او ټپیانو کې ښځې او ماشومان هم شامل دي.

د پاکستان تحریک انصاف ګوند د روانې میاشتې په پای کې په خیبر پښتونخوا کې یوه پراخه ولسي غونډه جوړوي. تر دې وړاندې د یاد ګوند بنسټګر عمران خان په لارښوونه (د وري په ۲۰مه) په راولپنډۍ کې کېدونکې ولسي غونډه په اسلام‌اباد کې د ایران او امریکا ترمنځ د سولې خبرو له امله وځنډېده.

د هرات د فارمي چرګانو ټولنه وايي، له پاکستان سره د سوداګریزو لارو له تړل کېدو وروسته په دغه ولایت کې د چرګانو د روزنې او پالنې کچه د پخوا پرتله د پام وړ لوړه شوې ده. د یادې ټولنې په وینا؛ هره ورځ نږدې ۴۰زره هګۍ د چرګانو د تولید لپاره کارول کېږي.

یو کوچنی افغان ورزشکار عثمان ملک‌زاده د کېک‌بوکسېنګ په بېلابېلو سیالیو کې له کلونو ځلېدو وروسته وتوانېده، چې د امریکا د کېک‌بوکسېنګ لوبډلې ته لار ومومي. دغه تنکي ځوان د امریکا د بېلابېلو ایالتونو ترمنځ په ۲۱ ملي سیالیو کې د بریا ترلاسه کولو سره دغه لاسته راوړنه خپله کړه.

د طالبانو د ازموینو اداره وايي، د معالجوي طب او ستوماتولوژۍ پوهنځیو فارغانو د فعالیت جواز (ایګزېټ) ازموینه، نن جمعه د وري په ۲۱مه اخیستل کېږي. په تېرو کلونو کې له دې بهیر څخه نجونې محرومې وې او دغې ادارې هم په همدې تړاو اعلامیه کې د نجونو فارغانو د برخلیک په اړه څه نه‌دي ویلي

د ازبکستان چارواکي وايي، هغه ۱۹۱ کيلوګرامه چرس، چې له افغانستان څخه په يو باروړونکي موټر کې راوړل شوي وو، د ترمذ په سرحدي تېرېدونکي دروازه کې کشف او نیول شوي دي. د دې هېواد پوليسو تر اوسه پورې په دې تړاو يو شکمن کس هم نيولی دی.

د طالبانو د کډوالو او راستنېدونکو چارو وزارت وايي، د پاکستان له بندخونو ۸۴ افغان کډوال ازاد او بېرته خپل هېواد ته ستانه کړای شوي دي. د دغه وزارت په وینا، یاد کسان په پاکستان کې د اوسېدو لپاره د قانوني اسنادو د نه‌لرلو له امله بندیان شوي وو.

د متحده عربي امارات د بشري مرستو ادارې ویلي چې ۹۶ ټنه درمل او حیاتي طبي تجهیزات یې د یوې بشري الوتنې له لارې افغانستان ته لېږدولي دي.

د بدخشان د بزکشۍ فدراسیون د اعلان له مخې، د دې ولایت د خاش په ولسوالۍ کې د څلور ورځنیو بزکشۍ سیالۍ، چې پکې سل چاپ‌اندازانو برخه اخیستې وه، پای ته ورسېدې. په دې سیالیو کې د ارګو، بهارک، جرم او خاش ولسوالیو چاپ‌اندازانو ګډون کړی وو.

پخواني ولسمشر حامد کرزي د پاکستان په رزمي سیالیو کې فرشتې خاني ته د اتلولۍ د ګټلو له امله هغې ته مبارکي ویلې ده. فرشتې خاني د پاکستان په سند کې په خپل وزن کې د ټولو لوبغاړو په ماتولو سره د سرو زرو مډال وګاټه او ورسره یې اتلولي هم په خپل نوم کړه.

اتحاد هوايي شرکت اعلان کړی، چې د کابل او ابوظبي ترمنځ خپلې الوتنې به د ۲۰۲۶ کال د مې میاشتې له لومړۍ نېټې څخه ورځنۍ کړي.

د روسیې ولسمشر ولادیمیر پوتین د پنجشنبې په ورځ اعلان وکړ چې د ارتودوکس عیسویانو د ایسټر اختر په مناسبت به له اوکراین سره دوه ورځنی اوربند نافذ شي، او مسکو تمه لري چې کېیف هم ورته اقدام ترسره کړي. دا خبره کریملین په یوې رسمي اعلامیه کې کړې ده.

د کډوالو ستونزو ته د رسېدنې د طالبانو د کمېسیون دارالانشاء وايي، پاکستان او ایران یوازې نن له بېلابېلو لارو ۹۰۲ افغان کورنۍ چې شمېر ۴۹۲۱ کېږي، په جبري ډول افغانستان ته اړولي دي. د دغه کمېسیون په وینا، په همدې ورځ ۷۱۴ کورنۍ خپلو سیمو ته لېږدول او له ۵۷۲ کورنیو سره مرستې هم شوې دي.

د هرات ولایت لپاره د طالبانو والي نوراحمد اسلام‌جار وايي، په تېر نظام کې بهرنیان د خپلو ګټو لپاره افغانستان ته راغلي وو. د هغه په وینا، یادو بهرنیانو افغانان د خپل فقر په حال کې پرېښودل او لاړل.

د افغانستان په بېلابېلو سیمو کې د سختو ورښتونو او ناڅاپي سېلابونو له امله، د ملګرو ملتونو د بشري مرستو د همغږۍ دفتر اعلان کړی چې ۷۳٬۳۰۰کسان (شاوخوا ۱۰٬۶۳۴ کورنۍ) اغېزمن شوي دي. د لومړنیو راپورونو له مخې، لږ تر لږه ۹۳ کسان مړه او ۱۸۱ټپیان او څلور تنه لا هم لادرکه دي.