د اوکراین ولسمشر ولودیمیر زیلینسکي د جمعې په ورځ وویل چې اوکراین لاهم د اروپايي ټولنې څخه راتلونکې میاشت د ۹۰ ملیارده یورو پور لومړۍ برخه د پیل تمه لري. دا پور د اوکراین لپاره د روسیې په وړاندې د خپلې جګړې د دوام لپاره خورا مهم دی.
په افغانستان کې د اروپايي ټولنې استازولۍ د نوي لمریز کال او د نوي تعلیمي کال د پیلېدو په مناسبت خپاره کړي پیغام کې د افغان نجونو پر زده کړو ټینګار کړی دی.
د طالبانو د ټرانسپورټ او هوایي چلند ورازت وايي، چې په لومړي ځل د اتحاد په نامه یوه نړیوال هوايي شرکت افغانستان ته خپلې الوتنې پیل کړې. دوی زیاتوي، چې لومړنۍ الوتنه یې نن جمعه د کب پر۲۹مه تر سره شوه او دا شرکت به افغاتنستان ته هره اوونۍ ۴ پروازونه ولري.
د خبریالانو د ملاتړ سازمان(امسو) د یوې خبرپاڼې په خپرولو سره د طالبانو له زندان څخه د خبریال مهدي انصاري را خوشې کېدل مثبت ګام بللی، خو ټینګار کوي چې دا ګام د بیان د ازادۍ او د خبریالانو د حقونو د خوندیتوب لپاره کافي نه دی.
سرچینو افغانستان انټرنشنل - پښتو ته وویل، چې په ناړۍ ولسوالۍ کې د پاکستاني ځواکونو په ډزو کې د وژل شوې ډاکټرې «اونځرا زوالزۍ» او د هغې د زوی میهن، جسدونه یې له ۴۰ ساعتونو تېرېدو وروسته کورنۍ ته سپارل شوي. دوي زیاتوي، پاکستاني ځواکونو جسدونو ته پر نږدې کېدونکو کسانو هم ډزې کولې.
په کابل کې د روږدو کسانو د درملنې پر یوه مرکز باندې د پاکستان له هوايي برید وروسته، چې پکې سلګونه کسانو ته یې مرګژوبله واړوله، د «رخشانه» رسنۍ خبریال له دغه مرکز څخه لیدنه کړې او د قربانیانو، ټپیانو او د هغوی د خپلوانو په اړه یې راپور خپور کړی دی.
د ناروې د کډوالو شورا وايي، چې د پاکستان د بریدونو له وېرې په ننګرهار او کونړ ولایتونو کې ۱۱۵ زره کورنۍ له خپلو کورونو څخه بېځایه شوي دي. دوی په خپل راپور کې زیاتوي، چې دا بېځایه شوې کورنۍ زیاتره د ډیورنډ کرښې په اوږدو کې مېشتې وې.
د ترکیې په استانبول ښار کې د طالبانو قونسلګري وايي، چې ددې ډلې جنرال قونسل محمد اکبر عظیمي د ازبکستان جمهوریت له قونسل شیرزاد عبدالنظروف سره کتلي. دوی لیکلی:« د پاکستان د پوځي رژیم د جرمي کړنو او د دې رژیم لخوا د روغتیایی تاسیساتو په نښه کولو په اړه هر اړخیز معلومات وړاندې شول.»
د هند حکومت اعلان کړی چې د پاکستان د وروستي برید له ټپیانو سره د مرستې لپاره یې کابل ته ۲،۵ټنه بیړني درمل، طبي توکي او تجهیزات استولي دي.
د خیبر پښتونخوا د خيبر ولسوالۍ اړوند د باړې په شينکو سيمه کې د وسلهوالو او پاکستاني ځواکونو ترمنځ په نښته کې یو پاکستانی افسر وژل شوی او څلور نور سرتیري ټپیان شوي دي.
د بښنې نړۍوال سازمان ویلي، چې د ښځو په ګډون پنځه تنه بلوڅ فعالان په پاکستان کې له پټو محاکمو او ناوړه روغتیايي حالت سره مخ دي. دغه سازمان د بلوچستان له اعلی وزیر څخه په یوه لیک کې غوښتنه کړې، چې یاد فعلان دې ژر تر ژره خوشې شي.
افغانستان انټرنشنل ـ پښتو داسې سندونه ترلاسه کړي، چې ښیي طالبانو په جرمني کې د سفارت سرپرست عبدالباقي پوپل له دندې ګوښه کړی او د لنډمهال لپاره یې د سفارت محلي کارکوونکي په توګه ټاکلی. د سند له مخې د طالبانو ریاست الوزرا له پوپل څخه غوښتي و، چې د دندې له پای وړاندې تسلیمي ورکړي.
یوشمېر د طالبانو مخالفو مشرانو د یادې ډلې له رسمي اعلان یوه ورځ وروسته کوچنی اختر ونمانځه. د افغانستان د اسلامي جنبش ګوند مشر مارشال عبدالرشید دوستم او د افغانستان د وحدت اسلامي ګوند مشر محمدمحقق د جمعې په ورځ په انقره کې د اختر لمونځ ادا کړ.
په پنجشېر کې د طالبانو مرستیال والي ملاشاه ملنګ روح الله وايي، چې تر ۴زره قیراطه زیات زمرد د داوطلبۍ له لارې پر مليسوداګرو د ۶.۳ مېلیونه افغانیو په ارزښت پلورل شوي. نوموړي ویلي، چې دغه زمرد تازه د پنجشېر ولایت له کانونو کېندل شوي وو.
په غزني کې د طالبانو د صنعت او سوداګرۍ ریاست خبر ورکړی، چې روان کال له دغه ولایت څخه ۱۳زره مټریک ټُنه وچه مېوه بهر ته صادره شوې. یاد ریاست زیاته کړې، چې دغه مېوه هند، تاجکستان، ترکیې، امریکا او یو شمېر عربي هېوادونو ته صادره شوې ده.
د تېر جمهوري نظام پرمهال د چارو ادارې مشر فضل محمود فضلي وايي، د افغان ولس په منځ کې د یوه نسل نه بل ته د پاکستان د «استعماري سیاستونو» پر وړاندي د انتقال شوي افغاني روایت نه پاکستان وېره لري.
د طالبانو مخالفه وسلهواله ډله د ازادۍ جبهه وایي، په داسې حال کې چې د پاکستان لهخوا د پلازمېنې په ګډون د افغانستان پربېلابېلو برخو بریدونه کېږي؛ طالب مشران د دې پرځای چې د دغه پېښو د لاملونو او پایلو په اړه معلومات ورکړي، دوی د پټولو او د ناسمو تبلیغاتو کمپاین پیلولو ته مخه کړې.
څارونکي په دې باور دي، چې سیمهییز بدلونونه او د ایران جګړه ښایي طالبان او پاکستان دې ته وهڅوي چې تاوتریخوالی او شخړې کمې کړي. د دوی په وینا؛ دواړه هېوادونه د ایران د جګړې له پایلو په ځانګړې توګه د انرژۍ او خامو موادو په رسولو کې د خنډونو له امله سخت اغېزمن شوي دي.
د سعودي عربستان په ګډون په خلیجي او لوېدیځو هېوادونو کې کوچنی اختر نن جمعه (د کب ۲۹مه) نمانځل کېږي. د کوچني اختر د لمانځه لپاره تر ټولو لویې غونډې نن په مسجدالحرام او نبوي جومات کې ترسره شوې.
په کندهار کې د طالبانو د حج او اوقافو رییس او د هبتالله سلاکار مولوي عبدالبصير فایض د پاکستان نوم اخیستلو پرته ویلي، یوشمېر هېوادونه د «کافرانو په لارښوونه پر موږ بریدونه کوي».
د خیبر پښتونخوا سر وزیر سهیل اپریدي د پاکستان لومړي وزیر شهباز شریف ته یو لیک استولی. سهیل اپریدي په دغه لیک کې د پاکستان تحریک انصاف ګوند بنسټ اېښودونکي عمران خان او د هغه مېرمنې بشرا بيبي ته د اختر په ورځ له خپلې کورنۍ سره د ملاقات اجازې ورکولو غوښتنه کړې ده.