د افغانستان لپاره د ملګرو ملتونو د بشري مرستو همغږي کوونکي انډریکا راټواټي له نړۍوالې ټولنې غوښتي، چې د کونړ د زلزلهځپلو خلکو د بېړنیو اړتیاوو په ځانګړي ډول د سرپناه د برابرولو لپاره عاجل اقدام وکړي.
د افغانستان لپاره د پاکستان ځانګړي استازي له خپل روسي سیال او په کابل کې د چین او ایران له سفیرانو سره په جلا جلا کتنو کې د سیمه ییز امنیت، د ترهګرۍ پر ضد د همکاریو د څرنګوالي او د افغانستان د بشري وضعیت په اړه خبرې وکړې. دغه کتنې په مسکو کې د «مسکو فارمټ» له غونډې مخکې شوې دي.
د کشمیر او ګلګت بلتستان لپاره د پاکستان فډرالي وزیر امیر مقام له نړۍوالې ټولنې وغوښتل، چې د افغان کډوالو د خوندي او باعزته بېرته ستنېدو لپاره له اسلاماباد سره مرسته وکړي.
د ازادۍ جبهې په نوم د طالبانو وسله والې مخالفې ډلې د ملګرو ملتونو د بشري حقونو شورا له هغه نوي پرېکړه لیک څخه هرکلی وکړ، چې لهمخې به یې په افغانستان کې د بشري حقونو اړوند سرغړونو او نړۍوالو جرمونو په تړاو د اسنادو راټولولو لپاره یو خپلواک څېړنیز میکانیزم جوړ شي.
د بشري حقونو د څار بنسټ د اسیا څانګې څېړونکې فرشته عباسي وایي، چې د ملګرو ملتونو د بشري حقونو شورا له خوا د افغانستان د بشري حقونو د سرغړونو د څېړلو لپاره د یوه خپلواک میکانېزم جوړول د عدالت پر لور یو تاریخي ګام دی.
په داسې حال کې چې له پاکستان او ایران سربېره ځينو اروپايي هېوادونو د افغان کډوالو اېستلو ته ملا تړلې، د طالبانو د رييس الوزراء اداري مرستیال د سیمې او نړۍ له هېوادونو وغوښتل، چې د کډوالو د حقونو د تأمین په برخه کې خپل مسوولیتونه ترسره کړي.
د جرمني په بن ښار کې د افغان کونسلګرۍ مخکېنی سرپرست حامد ننګیالي کبیري وايي: «د ظلم پر بنسټ جوړ شوي رژیم له خوا ټاکل شويو کسانو ته اجازه ورکړل شوه، چې په اروپايي خاوره کې د افغانستان د ډېپلوماتیک ماموریت کنټرول په لاس کې واخلي.»
د بښنې نړیوال سازمان د ملګرو ملتونو د بشري حقونو شورا له هغه پرېکړه لیک هرکلی کړی، چې له مخې به یې په افغانستان کې د بشري حقونو اړوند سرغړونو او نړیوالو جرمونو په تړاو د اسنادو راټولولو لپاره یو خپلواک څېړنیز میکانیزم جوړېږي.
د طالبانو د بهرنیو چارو وزارت ویاند وايي، چې د دې ډلې د بهرنیو چارو وزیر امیرخان متقي د روسیې په رسمي بلنه د افغانستان په اړه د مسکو فارمټ په اوومه ناسته کې د ګډون لپاره مسکو ته ولاړ. حافظ ضیا احمد وايي، متقي په لومړي ځل د مسکو فارمټ غونډه کې د رسمي غړي په توګه ګډون کوي.
د افغانستان د بشري حقونو فعالانو او سیاسي څېرو شهرزاد اکبر، فوزیه کوفي او منیژه باختري د ملګرو ملتونو د بشري حقونو د شورا له هغه پرېکړه لیک هرکلی کړی، چې په افغانستان کې د بشري حقونو د سرغړونو د څېړنې لپاره یو خپلواک نړیوال میکانیزم تضمینوي.
دپاکستان امنیتي سرچینو ایکسپریس ټریبیون ورځپاڼې ته ویلي چې جنرال محمد عاصم ملک د دغه هېواد د استخباراتي ادارې ای ایس ای د مشر په توګه خپلې دندې ته دوام ور کوي. عاصم ملک د ۲۰۲۴ کال په سپتمبر میاشت کې د ای ایس ای مشر ټاکل شوی و او سږ کال تقاعد کېده.
د پاکستان صدراعظم شهباز شریف د مالیزیا د صدراعظم انور ابراهیم د دې پرېکړې هرکلی کړی، چې له مخې به یې مالیزیا له پاکستان نه د ۲۰۰ میلیونه ډالرو په ارزښت حلاله غوښه واردوي. شریف دا څرګندونې په پوتراجایا کې له خپل مالیزیایي سیال سره له دوه اړخیزو خبرو وروسته وکړې.
د افغانستان لپاره د ملګرو ملتونو ځانګړي راپور ورکوونکي رېچارډ بېنېټ د ملګرو ملتونو له خوا په افغانستان کې د بشري حقونو د سرغړونو څیړنې میکانیزم جوړول «تاریخي پړاو» بللی او ویلي یې دي چې دا به د جدي جنایتونو د څېړنې ترڅنګ د راتلونکو عدلي قضیو د اسنادو په راټولولو کې مرسته وکړي.
د طالبانو د ټولګټو چارو وزارت وایي، د رېل پټلۍ معیین په ابوظبۍ کې د رېل پټلۍ په نړیوال کنفرانس کې ګډون کړی دی. یاد وزارت وايي، دا پروژه د منځنۍ اسیا هېوادونه له جنوبي اسیا سره نښلوي او د افغانستان د اقتصاد لپاره مهمه ده.
د ملي مقاومت جبهې یوې باوري سرچینې افغانستان انټرنشنل ته ویلي چې د دې جبهې تلفات تر اوسه ۵۳۷ کسانو ته رسېدلي دي. د سرچینې په وینا، ۱۴۹ تنه ټپیان شوي، ۱۲ معلول شوي او ۴۷۷ تنه یې بندیان شوي دي.
د افغانستان د مویي تای ملي لوبغاړي سید روح الله موسوي د مويي تای مسلکي سیالیو کې نه ماتېدونکي هسپانوي لوبغاړي ماریو راموس ویلا ته ماته ورکړه. دا لوبه د تلې پر ۱۳مه په سویډن کې ترسره شوه او لوبڅار له دریو پړاوونو وروسته موسوي د بریالي لوبغاي په توګه اعلان کړ.
د طالبانو کورنیو چارو وزارت په لوګر او هرات کې د غلو د نیول کېدو خبر ورکړی دی. د لوګر په محمداغه ولسوالۍ کې د غلو یوه ۹ کسیزه وسله واله ډله او په هرات ولایت کې یوه مېرمن د درې میلیونه افغانیو د غلا په تور، نیول شوي.
د اوکراین پوځ د دوشنبې په ورځ وویل چې د روسیې د پوځ لپاره د مختلفو مهماتو د تولید یوه اصلي فابریکه او په اشغال شوې کریمیا کې د تیلو یوه زېرمه یې په نښه کړي دي.
د طالبانو د بدخشان ولایت د اطلاعاتو او کلتور ریاست مسوولان وايي چې ددغه ولایت په خاش ولسوالۍ کې یوه لرغونې سمڅه موندل شوې، چې پنځه پیړۍ تاريخي مخینه لري. له دې سمڅې څخه د خټینو لوښیو او د ډبرینو ډېوه لوښیو ټوټې موندل شوې دي.
د بشري حقونو مدافعانو ټولنې (HRD+) د ملګرو ملتونو د بشر حقونو شورا د هغه پرېکړه لیک هرکلی کړی چې د افغانستان د بشري حقونو د سرغړونو د څېړنې لپاره یو خپلواک او دایمي نړیوال میکانیزم جوړوي. ټولنې ویلي چې دا کار به انتقالي عدالت پلی او د عامه باور بیا راژوندي کېدو ته لاره اواره کړي.
د ملګرو ملتونو د بشري حقونو شورا کې د افغانستان استازي د بشري حقونو د سرغړونو د څار میکانیزم د تصویب هرکلی وکړ او ویې ویل چې دا اقدام ښیي چې طالبان په نړیوال ډګر کې هیڅ ځای نه لري. نصیر اندېشه له دې ډلې سره د یو شمیر هیوادونو اړیکې معاملې او لنډمهاله وبللې.