آرشیف

د غزې روغتیا وزارت خبر ورکړی، چې د اوربند پرمهال د اسراییل په بریدونو کې ۳۱۲ کسان وژل شوي دي. د یاد وزارت په وینا؛ یوازې د پنجشنبې په ورځ لږترلږه ۳۳ فلسطینیان وژل شوي دي.

د مخکېني جمهور‌ي نظام پر مهال د بهرنیو چارو وزیر محمد حنیف اتمر وایي، په اوسنیو شرايطو کې چې هېواد د روغتیا تر څنګ د ثبات له بېلابېلو ګواښونو سره مخ دی؛ طالبان باید د خلکو او نجونو بنستیزه حقونه ورکړي. هغه زیاتوي، چې طالبان د اوسنیو واکمنانو په توګه باید دغه مسوولیت ترسره کړي.

تر یو ورځني ځنډ وروسته د بلوچستان ایالت په کویټې ښار کې د مخابراتي شرکتونو انټرنېټي خدمتونه بېرته فعال شول. په دغه ښار کې تېره ورځ د مخابراتي شرکتونو انټرنېټي خدمتونه پرې شوي وو.

د طالبانو تر واک لاندې د کډوالو ستونزو ته د رسېدنې عالي کمېسیون خبر ورکړی، د پنجشنبې په ورځ له ایران او پاکستان نه ۱۱۱۸ کورنۍ چې ټول‌ټال ۵۹۹۳ کډوال کېږي؛ افغانستان ته ستنې شوې دي.

د خراسان ډایري په نوم له اسلام اباد نه خپرېدونکې یوې رسنۍ ویلي، چې نن جمعه (د لړم ۳۰مه) سهار وختي د خېبر پښتونخوا په بنو ولسوالۍ کې د «ټي‌ټي‌پي» وسله‌والې اړوند یوې ډلې د‌ پاکستان امن ځواک پر دفتر برید کړی. راپور وایي، تر اوسه ۷کسان وژل شوي او یو کس ټپي دی.

د کابل پوهنتون د ژبو او ادبیاتو پوهنځي د پښتو څانګې ځینو استادانو افغانستان انټرنشنل – پښتو ته ویلي، چې د دوی یو استاد پوهنوال محمدا جان حقپال نن جمعه د (لړم ۳۰مه) سهار وختي په کابل کې د ورپېښې ناروغۍ له امله ومړ.

په هرات کې د طالبانو والي شیخ اسلام جار په دغه ولایت کې د ترکیې او ترکمنستان هېوادونو له سر قونسلانو سره په ناسته کې پر اقتصادي، ښوونیزو او فرهنګي همکاریو خبرې کړې دي. په خبرپاڼه کې راغلي، درې واړو لورو ژمنه وکړه چې په دغه برخو کې به همکارۍ پراخې کړي.

د لبنان پوځ د پنجشنبې په ورځ د دغه هېواد د نشه‌یي توکو تر ټولو لوی قاچاق کوونکی نوح زعيتر ونیوو. لبناني چارواکو ویلي، نوح زعيتر چې د امریکا او اروپا تر سختو بندیزونو لاندې دی؛ د لبنان په ختیځ کې د یو لړ عملیاتو پرمهال نیول شوی دی.

په ننګرهار کې د طالبانو والي ملامحمد نعیم اخوند پنج‌شنبه د (لړم ۲۹مه) په خپل کاري دفتر کې د دغه ولایت لپاره د ایران له قونسل مجید رضا پناه سره د سوداګریزو اړیکو پر پیاوړتیا خبرې کړې دي.

د ایران د سوداګرۍ او صنایعو خونې مرستیال خبر ورکړی، چې د یوې نوې طرحې پر بنسټ ایراني شرکتونه کولای شي د افغانستان او ایران په پوله کې د افغانستان د کانونو د پروسس لپاره ګډ مرکز جوړ کړي. ایراني رسنۍ وایي، دغه موضوع د طالبانو او ایران ترمنځ بحث شوې ده.

د خیبر پښتونخوا په کورمې، مومند او لکي مروت ولسوالیو کې د پاکستاني ځواکونو په جلا، جلا عملیاتو کې ۳۰وسله‌وال وژل شوي دي. د پاکستان پوځ د عامه اړیکو څانګې خبر ورکړی، چې دغه عملیات د استخباراتي معلوماتو پربنسټ شوي دي.

ایراني رسنیو خبر ورکړی، چې دغه هېواد د پنج‌شنبې په ورځ د (لړم ۲۹مه) د رېل پټلۍ له لارې افغانستان ته د سمنټو لومړنۍ جوپه واستوله. راپورونه وایي، ایران به هره اونۍ د مهالوېش پر بنسټ افغانستان ته ۱۰۰۰ټنه سمنټ صادر کړي.

د‌ پاکستان د‌ پنجاب ایالت په فیصل‌اباد ښار کې د کیمیاوي موادو په یوې فابریکه کې د اورلګېدنې له امله څلور کسان مړه او نهه نور ټپیان شوي دي. د ځایي چارواکو په وینا؛ د دغه اورلګېدنې له امله د فابریکې ترڅنګ د ځینو نږدې کورونو چتونه هم نړېدلي دي.

د ډېپلوماټ مجلې په یوې خپرې کړې مقاله کې راغلي، چې په وروستیو کلونو کې د داعش خراسان ترهګرې ډلې د فعالیتونو زیاتوالي له امله تاجکستان اندېښمن شوی او هڅه یې کړې، چې د خپلو امنیتي ننګونو له کبله طالبانو سره له بې‌باورۍ ډکې اړیکې بېرته ورغوي.

د جرمني د کورنیو چارو وزارت ویاندې الینا سینګر افغانستان انټرنشنل ته ویلي، د هغو افغان پناه غوښتونکو دوسیې تر ارزونې لاندې دي چې د دغه وزارت د مالي مرستو وړاندیز یې نه‌دی منلی. نوموړې وایي، هغه کسان چې د منل کېدو لازم شرایط او قانوني اسناد یې پوره نه وي؛ جرمني به یې ونه مني.

د اسلامي هېوادونو ترمنځ د پیوستون سیالیو پر دوام؛ د افغانستان د جوجېتسو ملي لوبډلې استازي د سیالۍ په لومړۍ ورځ مډالونو ته تر رسېدو وړاندې له سیالیو بهر شول.

د کمبرېج پوهنتون یوه نوې څېړنه ښيي، ۵۱ سلنه برېتانوي لیکوالان اندېښمن دي چې مصنوعي ځیرکتیا به یې ځای ونیسي. دغه څېړنه په برېتانیا کې له ۳۲۲ لیکوالانو سره د مرکو پر بنسټ شوې ده.

په فرانسه کې یوې محکمې ۸ نارینه له درېیو تر ۱۵ کلونو بند محکوم کړل. دغه کسان په ۱۴۰۲ کال کې د مانش په کانال کې د پناه غوښتونکو لیږدونکې بیړۍ د ډوبېدو له امله د ۷ افغان پناه غوښتونکو په مرګ کې د لاس لرلو په تور محاکمه شوي دي.

د اوکراین ولسمشر د پنجشنبې په ورځ (د لړم ۲۹مه) د امریکا د وسله‌والو ځواکونو له یوه لوړپوړي چارواکي سره تر لیدنې وروسته وویل، چې دی د اوکراین د جګړې د پایته رسولو لپاره د امریکا له طرحې سره د کار کولو لپاره چمتو دی او په راتلونکو ورځو کې به په دې اړه له ټرمپ سره هم وغږیږي.

د روسیې د پوځ مشر د پنجشنبې په ورځ (د لړم ۲۹مه) ولسمشر ولادیمیر پوتین ته وویل، چې روسي ځواکونو د اوکراین په شمال ختیځ کې د کوپیانسک ښار تر خپل کنټرول لاندې راوستی، خو د اوکراین پوځ دغه ادعا رد کړې او ویلي یې دي، چې دغه ښار لا هم د اوکراین د دفاعي ځواکونو په کنټرول کې دی.

سپینې ماڼۍ د پنجشنبې په ورځ (د لړم ۲۹مه) د ولسمشر ډونالډ ټرمپ له هغې وینا چې یوې ښځینه خبریالې ته د جفري اپسټین په اړه د پوښتنو پر مهال د خوګې (پیګۍ) خطاب وکړ، دفاع وکړه. سپینې ماڼۍ وویل، چې د ولسمشر خبرې د هغه رښتینولي او شفافیت ښيي.