د طالبانو د شخصیتونو سره د تماس کمېسیون ریس شهابالدین دلاور، په کابل کې یوې غونډې ته د وینا پر مهال ادعا کړې چې د طالبانو اوسنی نظام ټولګډونی دی او هېڅ بدیل نه لري. دلاور ویلي، هغه ادعاوې چې ګواکې د طالبانو حکومت یوازې د ملايانو په لاس کې دی، ناسمې دي.
د پاکستان بهرنیو چارو وزیر اسحاق ډار او د ایران بهرنیو چارو وزیر عباس عراقچي د سولې او ثبات پر اهمیت ټینګار کړی او د دوه اړخیزو موضوعاتو په اړه یې د نږدې همغږۍ د دوام ژمنه کړې ده. دا په داسې حال کې ده چې د راپورونو له مخې، امریکا د ایران پر ځینو هدفونو تازه هوايي بریدونه کړي.
د پاکستان د جمعیت علمای اسلام ویاند اسلم غوري ویلي، په داسې حال کې چې په نړیوال بازار کې د سون توکو بیې د جګړې له پیل مخکې کچې ته راټیټې شوي، خو د پاکستان حکومت د بیو د کمولو پر ځای د یوې اوونۍ لپاره د اوسنیو بیو د ساتلو پرېکړه کړې، چې د ده په وینا «ظالمانه» کړنه ده.
د طالبانو د امر بالمعروف وزارت وایي، چې محتسبینو یې په ننګرهار، لغمان، میدان وردګ او بلخ ولایتونو کې ۱۲ښځې له کورني تاوتریخوالي ژغورلي.
د بلوچ یووالي کمېټې مشره او د بشري حقونو فعاله ماهرنګ بلوچ، چې د عمر بند سزا ور باندې لګېدلې، ویلي چې د زندان پر مهال کتابونو ورسره مرسته کړې څو د انفرادي بند سختې شېبې وزغمي او د خپلې مبارزې پر هدف لا روښانه پوهه ترلاسه کړي.
د طالبانو تر واک د دولتي شرکتونو لوی ریاست وايي، چې د شمال د ډبرو سکرو دولتي شرکت اړوند د شباشک له کانونو څخه هره ورځ له ۲۰۰څخه تر ۳۰۰ټنو پورې لوړ کیفیت لرونکي د ډبرو سکاره را ایستل کیږي.
د اوکرایني چارواکو په وینا، د روسیې د ډرون بریدونو په ترڅ کې د دغه هېواد په دنیپروپېتروفسک او سومي سیمو کې درې ملکي وګړي وژل شوي او څو نور ټپیان شوي دي، چې په ټپیانو کې دوه ماشومان هم شامل دي.
د بلوچستان مرکزي ښار کوټې د کچلاغ بايي پاس عثمانیه رسټورانټ ته نږدې د «کابل جان» مشهور رستورانت خاوند محمد هاشم نورزی د ناپېژاندو وسلهوالو په ډزو وژل شوی دی.
د طالبانو تر چتر لاندې د احصایې او معلوماتو عمومي ادارې ویلي، چې د ۱۴۰۵ لمریز کال د لومړۍ ربعې (وری، غویی او غبرګولي میاشتو) په موده کې د هېواد له هوايي ډګرونو او سرحدي دروازو څخه د بهرنیو وګړو د تګ راتګ ټول ۸ زره او ۵۶۰ تګ راتګ ثبت شوی دی.
د هواپېژندنې چارواکي وایي، د اروپا په لوېدیځ کې د لسګونو کسانو د مړینې لامل شوې سختې ګرمۍ څپه اوس ختیځ لور ته خپرېږي او تمه ده چې په جرمني او پولنډ کې د تودوخې کچه نږدې ۴۰ درجې سانتيګراد ته ورسېږي، په داسې حال کې چې په ځینو سیمو کې تر ۴۱ درجو پورته تودوخه هم ثبت شوې ده.
د پاکستان د خیبر پښتونخوا په بنو ولسوالۍ کې پولیسو ویلي، د جمعې په ورځ یې د چین ـ پاکستان اقتصادي دهلېز پر حلقوي سړک د یوه امبولانس له دننه د څلورو کسانو مړي موندلي، چې د مرمۍ نښې پرې لیدل کېږي.
د طالبانو تر چتر لاندې د احصایې او معلوماتو ملي ادارې ویلي، چې په زابل ولایت کې یې د کلیو، کورنیو او له پنځو کلونو کم عمره ماشومانو د سرشمېرنې بهیر پیل کړی دی.
د افغانستان کرکټ بورډ اعلان کړی چې د ازبکستان د کرکټ ملي لوبډله به د یوې دوستانه شل اوریزې سیالۍ لپاره د جولای په ۱۰مه نېټه د خوست په رحمت ولي مسرور کرکټ لوبغالي کې د افغان ایلېون پر وړاندې ولوبېږي.
د پاکستان بلوچستان ایالت د موسیٰ خېل ولسوالۍ کې د پرلهپسې زلزلو له امله ۲۰ کسان ټپیان شوي او تر ۹۰ ډېر کورونه زیانمن شوي دي.
د طالبانو کورنیو چارو وزارت ویلي، چې د هرات ښار د اوومې امنیتي حوزې امنیتي ځواکونو د کشفي عملیاتو پر مهال درې تنه د شپږو موټرسایکلونو د غلا په تړاو نیولي دي.
د طالبانو تر واک لاندې د المپیک ریاست وایي، په تېره یوه اوونۍ کې یې د قطر له سفیر سره د ورزشي همکاریو د پراختیا په اړه خبرې کړې، د افغانستان د فوتسال ملي لوبډلې لپاره یې نوی روزنیز ټیم ګومارلی او د بېلابېلو کورنیو او نړیوالو ورزشي فعالیتونو چارې یې پر مخ وړې دي.
د « یور نیوز » په یوه راپور کې ویل شوي، اروپايي ټولنه د هغو افغان کډوالو د بېرته ستنولو لپاره چې د امنیتي ګواښ یا جدي جرمونو په تور پېژندل شوي، له طالبانو سره اړیکې پراخوي، خو دغه تعامل ښايي د طالبانو د مشروعیت، بشري حقونو او سیاسي غبرګونونو له امله لوړه بیه ولري.
د طالبانو د پېښو سره د مبارزې اداره وایي چې د ۱۴۰۵ لمریز کال په لومړۍ ربعه کې یې په ۱۸ ولایتونو کې ۴۱ وقایوي پروژې پلي کړي او تر ۲۰۵ زره زیات کسانو ته یې د طبیعي پېښو د مخنیوي او چمتووالي په اړه عامه پوهاوی ورکړی دی.
د ګډ امنیتي تړون سازمان (سي ايس پي او) ویلي، چې د تاجکستان او افغانستان پر ګډه پوله امنیتي وضعیت لا هم پېچلی دی او د افغانستان په شمالي سرحدي سیمو کې د وسلهوالو ډلو حضور د دې سازمان لپاره د مرکزي اسیا تر ټولو ستره امنیتي اندېښنه ده.
د ښځو د حقونو ملاتړې ادارې «فېمېنېسټ مېجورېټي فاونډېشن» په وینا، اروپايي ټولنه نه شي کولای د بشري حقونو د دفاع ادعا وکړي، په داسې حال کې چې له طالبانو سره د افغان ښځو د حقونو له شرط پرته رسمي تعامل ته دوام ورکوي.
« دي نیکسټ سنچري بنسټ »په یوه نوي راپور کې ویل شوي، نږدې پنځه کاله د طالبانو له بیا واکمنېدو وروسته افغانستان لا هم د نړۍ له تر ټولو سختو بشري ناورینونو سره مخ دی، خو د نړیوالو پام د غزې، اوکراین او نورو شخړو پر لور اوښتی او د میلیونونو افغانانو کړاوونه تر ډېره هېر شوي دي.