په نورستان ولایت کې د طالبانو د کانونو او پټرولیم ریاست ځايي مسوولینو ویلي، چې د ازادې بولۍ له لارې یې د نږدې دوه مېلیونه افغانیو په ارزښت د بیروج ډبرې پلورلې دي. په نورستان ولایت کې د طالبانو د کانونو او پټرولیم رییس سیدالرحیم عمير ویلي، چې د دغه ډبرو وزن ۵ کیلو ګرامه وو.
د پاکستان په بلوچستان ایالت کې ځايي چارواکو ویلي، چې له دغه ایالت نه د روانې سپټمبر میاشتې له لومړۍ نیټې راهیسې تراوسه څه باندې ۳۰زره افغان کډوال افغانستان ته ستانه شوي دي.
د بښنې نړۍوال سازمان د ملګرو ملتونو د پرونۍ غونډې په اړه لیکلي، اوس یوه اصولي، پياوړي او بېړني اقدام ته اړتیا ده چې پر طالبانو فشار راوړل شي او داسې اقدام وشي، چې په هغه کې د ټولو افغانانو حقونه خوندي کړل شي.
د خیبر پښتونخوا ایالت د کورنیو او قبایلي چارو ادارې خبر ورکړی، چې پرون چهارشنبه (د وږي ۲۶مه) ۲۷۶۷ افغان کډوال له بېلابېلو لارو افغانستان ته ستانه شوي دي.
د طالبانو د ټرانسپورټ او هوايي چلند وزارت د هواپېژندنې ادارې نن پنجشنبه د ( وږي ۲۷مه) په اتو ولایتونو کې د شړکنده باران، تالندې برېښنا، تېزو سېلیو او سېلابونو راوتو اټکل کړی دی.
د چین دفاع وزیر دونګ جون د بیجېنګ امنیتي فورم ناستې پرمهال ویلي، چې د ځواکمن پوځ لرل د سولې ضمانت کوي؛ خو د مطلقې پوځي برلاسۍ هڅې نړۍ وېشي او ګډوډي رامنځته کوي.
په ملګرو ملتونو کې د افغانستان دایمي استازي نصیر احمد فایق له نړۍوالو هېوادونو غوښتي، چې د طالبانو کړنې عادي ونه ګڼي او د افغانستان د خلکو کړکېچن وضعیت په اړه بېپروا پاتې نهشي. هغه وویل، چې باید نړۍواله ټولنه افغانستان هېر نه کړي.
په ملګرو ملتونو کې د برېټانیا د دایمي استازي مرستیال جیمز کایروکي وايي، له افغانستان نه یې د هېواد ملاتړ د ترهګرۍ پر ضد مبارزې او د ښځو حقونو په برخو کې د معنا لرونکو او د پام وړ ګامونو پورته کولو پورې مشروط دی. هغه له طالبانو غوښتي، چې ښځینه کارکوونکو ته دې د کار اجازه ورکړي.
د تېر جمهوریت پرمهال د ولسمشر لومړي مرستیال امرالله صالح ډونالډ ټرمپ ته په خطاب ویلي، چې د طالبانو د ځواک اساسي لامل د امریکا مالي ملاتړ دی. هغه ویلي، چې امریکا له ۲۰۲۱کال راهیسې طالبانو ته نږدې ۱۷میلیارډه ډالر ورکړي؛ حال دا چې طالبانو د نشهيي توکو له لارې دومره پيسې نهدي ګټلې.
د مالدیف د پارلمان له لوري د رسنیو د څار په برخه کې د نوي قانون تصویبېدو په دغه هېواد کې سخت غبرګونونه راپارولي دي. په مالدیف کې سیاسي مخالفو ګوندونو او د خبریالانو ټولنو ویلي، چې د یاد قانون تصویبېدل د رسنیو خپلواکي ګواښي او باید لغوه شي.
د بشري حقونو څار بنسټ وايي، چې د امریکا مالي مرستو بندېدو په افغانستان، اوکراین، روسیې، سوډان، سوریې، اسراییل، فلسطین او نورو هېوادونو کې د ملګرو ملتونو بشردوستانه فعالیتونه او د بشري حقونو څېړنې ټکنۍ کړې دي. دغه بنسټ له نړۍوالو مشرانو غوښتي، چې بشري حقونو ته ژمن پاتې شي.
د ۲۰۲۵کال د اسیا جام په شل اوریزو سیالیو کې افغانستان خپله درېیمه لوبه نن له سریلانکا سره کوي. دغه لوبه به نن پنجشنبه د افغانستان په وخت د ماښام په ۷:۳۰ بجو په ابوظبي کې پیل شي.
برېتانیا ته د امریکا د ولسمشر ډونالډ ټرمپ له دویم رسمي سفر سره هممهاله په لندن کې زرګونه کسانو د هغه پرضد لاریون کړی دی. د راپورونو پربنسټ؛ د دغه لاریونوالو شمېر چې څه باندې ۵زره کسانو ته رسېده، د ټرمپ ضد شعارونه یې ورکول.
د امریکا په پنسلوانیا ایالت کې په یوه وسلهوال برید کې ۳ پولیس وژل شوي او ۲ نور ټپیان دي. پېښه هغه مهال رامنځته شوه، چې پولیس د یوې کورنۍ موضوع د څېړنې لپاره سیمې ته تللي وو؛ خو یو ناڅاپه د یوه وسلهوال له لوري پرې برید وشو.
د رسنیو او د بیان د ازادۍ ملاتړ سازمان «نی» د طالبانو لهخوا په یو شمېر ولایتونو کې د چټک انټرنېټ بندېدل وغندل. دغه سازمان وایي، د طالبانو لهخوا دا اقدام د خلکو له معلوماتو څخه د مخنیوي، د بشري ضد جنایتونو پټولو او د نجونو پر زده کړو د لا ډېرو محدودیتونو د لګولو لپاره شوی دی.
د ملګرو ملتونو د امنیت شورا په ناسته کې د قرغیزستان استازې ایدا قسیمالیوا د نړۍوالې سولې او امنیت د ساتنې تر څنګ په سیمهییزو همکاریو ځانګړی ټینګار وکړ او ویې ویل، چې دغه هېواد غواړي د افغانستان د ستونزو د کمولو په برخه کې عملي ونډه واخلي.
په ملګرو ملتونو کې د ایران استازي امیر سعید ایرواني د چهارشنبې په ورځ د افغانستان په اړه د امنیت شورا غونډې ته وویل، چې د افغانستان د کړکېچ حل یوازې د یوې ټولګډونه سیاسي پروسې له لارې ممکن دی، داسې پروسه چې د هېواد قومي او سیاسي تنوع منعکس کړي.
د ملګرو ملتونو د امنیت شورا په ناسته کې د هند استازي پارواتانني هرېش ویلي، چې د طالبانو پر وړاندې د فشار او مجازاتو سیاست تر اوسه خپلې موخې ته نه دی رسېدلی. نوموړي ټینګار کړی، چې باید د طالبانو د مثبتو ګامونو ستاینه وشي او له دې ډلې سره د ناسمو تګلارو په اصلاح کې مرسته وشي.
د افغانستان لپاره د اروپايي ټولنې د پلاوي سرپرسته وایي: «اروپايي ټولنه ژمنه ده چې د افغانستان د یوه پیاوړي او دوامدار خوراکي سکټور په جوړولو کې مرسته وکړي.» هغې وویل، چې په دې سره به افغان تولیدونکي ارزښتناکو بازارونو ته لاسرسی ومومي.
په ختیځ افغانستان کونړ کې وروستۍ زلزلې نه یوازې زرګونه کورونه نړولي، بلکې د خلکو د ژوند ټولې هیلې یې هم له خاورو سره خاورې کړې دي. اوس سلګونه کورنۍ د خیمو لاندې د سخت ژمي د راتلو په وېره کې دي.
د پاکستان د بهرنیو چارو وزیر اسحاق ډار وایي، د پاکستان لومړي وزیر شهباز شریف د سعودي عربستان د سفر پر مهال د دغه هېواد له ولیعهد او لومړي وزیر شهزاده محمد بن سلمان بن عبدالعزیز ال سعود سره لیدلي او دواړو لوریو «ګډ ستراتیژیک دفاعي تړون» لاسلیک کړی دی.