آرشیف

د اسټرالیا د پوسټ خونې مسوولینو اعلان کړی، چې د امریکا د ولسمشر ډونالډ ټرمپ د نویو ګمرکي تعرفو او تګلارو له امله به تر بلې خبرتیا ډېری توکي امریکا او پورته ریکو ته نه لېږدوي.

د طالبانو تر کنټرول لاندې د المپيک، بدني روزنې او ورزش عمومي ریاست په یوې خبرپاڼه کې ویلي، چې د دغه ریاست مسوولینو له یوه کمکي افغان فوټبالر سیزر هاروني سره کتلي او د ملاتړ ډاډ یې ورکړی دی.

په هرات ولایت کې ځايي سرچینې وایي، چې وړمه شپه یو کس د دغه ښار د باغ‌نظرګاه په سیمه کې خپله مور، مېرمن او لور په چړې وژلې او وروسته تښتېدلی دی. په قربانیانو کې یوه ۱۱ کلنه ماشومه هم شامله ده.

امریکا ۶۰۰زره چینايي زده‌کړیالانو ته په خپلو پوهنتونونو او کالجونو کې د زده‌کړو اجازه ورکړې. د امریکا ولسمشر ډونالډ ټرمپ ویلي، چې دغه پرېکړه د واشنګټن او بیجېنګ ترمنځ د روانو سوداګریزو خبرو یوه برخه ده.

د امریکا ولسمشر ډونالډ ټرمپ د دوشنبې په ورځ د سوېلي کوریا له مشر سره په لیدنه کې ویلي، چې په غزه کې جګړه باید ژر تر ژره پای ته ورسېږي. نوموړي تمه ښودلې، چې په غزه کې جګړه به تر راتلونکو دوه یا درېیو اونیو په بشپړ ډول پای ته ورسېږي.

د المپيک، بدني روزنې او د ورزش عمومي رياست اړوند د لامبو وهنې ملي فدراسيون له لوري د ۱۲۰ لامبو وهونکو ترمنځ د لامبو وهنې ټاکنيزې سيالۍ وشوې.

د برېتانیا د ښي اړخي «رفرم یو‌کي» ګوند مشر نایجل فراج وايي، که واک ته ورسېږي غواړي چې له افغانستان او اریتریا سره د کډوالو د بېرته ستنولو تړونونه وکړي او همداراز به د کډوالو د اېستلو لپاره ورځنۍ الوتنې تنظیم کړي.

د طالبانو له پېښو سره د مبارزې د چمتووالي ادارې سرپرست نورالدین ترابي له «اکتید» موسسې سره د څه باندې یو میلیون ډالرو په ارزښت د ګډو همکاریو د یوې هوکړې د لاسلیک پر مهال له موسسو وغوښتل، چې خپل اداري لګښتونه راکم کړي ترڅو ورسره ډېر کسان د مرستو تر پوښښ لاندې راشي.

د ORCD GLOBAL موسسې مسوولین وايي، غواړي چې د افغانستان په ۳۴ ولایتونو کې د سېلابونو له امله د زیانمنو او له خطر سره د مخ سیمو په اړه یو مستند فلم جوړ کړي. دغه موسسې د دې فلم د جوړولو موخه افغانستان ته د زیاتو مرستو راجلبول بللي دي.

پاکستانۍ ورځپاڼه «ډیلي ټایمز» وایي، چې افغانستان د طالبانو تر څلور کلنې واکمنۍ لاندې د ترهګرۍ او نشه يي توکو په ګډه مافیایي لوبه کې ښکېل دی. دا ورځپاڼه زیاتوي، که نړۍ چوپ پاتې شي، دا هېواد به د نړۍوال امنیت د اوږدمهاله ګواښونو په مرکز بدل شي.

د برېتانیا د بهرنیو چارو وزیر ډېوېد لامي د غزې په سوېل کې پر ناصر روغتون د اسراییل برید چې پکې د پنځو خبریالانو په ګډون لږ تر لږه ۲۰ کسان ووژل شول، «وېرونکی» ګڼلی او ترکیې هم دغه برید «جنګي جنایت» او د «مطبوعاتو پر ازادۍ برید» بللی دی.

د افغانستان د ازادو مبارزاتو لوبغاړي باز محمد مبارز د لومړي ځل لپاره په موی ټای څانګه کې نن ماخوستن د سیالۍ ډګر ته ښکته شو او خپل ایران الاصل بحریني سیال ته یې ماتې ورکړه.

د امریکا ولسمشر ډونالډ ټرمپ یو نوي اجراییوي فرمان لاسلیک کړ، چې له مخې به یې د امریکا د بیرغ پر وړاندې هر ډول سپکاوی چې د جزایي یا مدني قوانینو د سرغړونې لامل شي، په جدي توګه به تر قانوني څارنې او تعقیب لاندې ونیول شي.

د افغانستان محلي سندغاړی موسی شاهین چې دوه ځلې د طالبانو له لوري بندي شوی، له افغانستان انټرنشنل سره په مرکه کې وايي، چې طالبانو د سندرو ویلو له امله بندي کړی و او دی د طالبانو زندانونه د ځمکې پر سره له دوزخ سره پرتله کوي.

برېتانوۍ ورځپاڼې «نیو ورلډ» په یوه راپور کې لیکلي، بشر نورزی چې د طالبانو له بانفوذه څېرو څخه دی، د امریکا له زندان څخه تر خوشې کېدو وروسته یې د افغانستان د طبیعي سرچینو کنټرول تر خپلې ولکې لاندې راوستی دی.

د جرمني د بهرنیو چارو وزارت د غزې په خان‌یونس کې پر ناصر روغتون د اسراییل وروستي برید په اړه د بې پرې څېړنو غوښتنه کړې ده. په دې برید کې لږ تر لږه پنځه خبریالان وژل شوي دي.

د ایران ولسمشر مسعود پزشکیان نن دوشنبه (د وږي ۳مه) له خپل روسي سیال سر په ټلیفوني خبرو کې وویل، ایران هېڅکله هم د اټومي وسلو د جوړولو په لټه کې نه وو، نه دی او نه به وي. پزشکیان د ایران له لوري د یورانیمو د غني کولو په برخه کې د روسیې له دریځه هم ستاینه وکړه.

د افغانستان لپاره د ملګرو ملتونو د بشري حقونو ځانګړي راپور ورکوونکي ریچارډ بېنېټ ویلي دي، چې د ګاونډیو هېوادونو له لوري د افغان کډوالو ډله‌ییز اېستل نه یوازې د بشري حقونو له اصولو سره په ټکر کې دي، بلکې د بې‌اساسه امنیتي پلمو پر بنسټ توجیه کېږي.

د ایران ولسمشر مسعود پزشکیان د دوشنبې په ورځ (د وږي ۳مه) په دغه هېواد کې د «دولت اوونۍ» په نوم مراسمو کې وویل، نه ښايي چې له ګاونډیو هېوادونو سره بد خُلقي او بد اخلاقي وشي او په ټينګار سره یې زیاته کړه، چې «زموږ ګاونډیان زموږ وروڼه دي» او په اصل کې یې د یوې خاورې وبلل.

د طالبانو د پنجشېر والي محمد اغا حکیم د مقاومت په نوم جبهې له ایرانه له دوو راستانه شویو قومندانانو سره د دوشنبې په ورځ (د وږي ۳مه) په کتنه کې ویلي، هېچا ته اجازه نه ورکوي چې تېر ته ور وګرځي او یا د تېرو کړنو له امله څوک وځوروي.

د امریکا ولسمشر ډونالډ ترمپ ویلي، چې غواړي په راتلونکي کې د شمالي کوریا له مشر «کیم جونګ اون» سره وګوري. هغه دا څرګندونې د دوشنبې په ورځ د سوېلي کوریا له نوي ولسمشر «لي جایه میونګ» سره د سپینې ماڼۍ د لیدنې پر مهال وکړې.