د امریکا ولسمشر ډونالډ ټرمپ ویلي، چې د نیویارک ښار منتخب ښاروال زهران ممداني له هغه سره د لیدنې غوښتنه کړې ده. د امریکا ولسمشر پر ټروت خواله رسنۍ کاږلي، چې له ښاغلي ممداني سره به د جمعې په ورځ د نومبر په ۲۱مه (د لړم په ۲۹مه) وګوري.
د پنجاب پولیسو خبر ورکړی، چې د راولپنډۍ په بېلابېلو سیمو کې د بېاسناده افغان کډوالو پر ضد د پلټنې عملیات دوام لري. د دوی لهخوا په خپرې شوې خبرپاڼه کې راغلي، چې د دغه عملیاتو په لړ کې ۳۸ بېاسناده افغان کډوال نیول شوي دي.
د چهارشنبې په ورځ ترکیې ته د ولادیمیر زېلېنسکي له سفر سره هممهاله د اوکراین پر لوېدیځ د روسیې په برید کې د درېیو ماشومانو په ګډون لږترلږه ۲۵ کسان وژل شوي دي. په دغه بریدونو کې ګڼې ودانۍ زیانمنې شوې دي.
د هند له لوري د طالبانو د سوداګرۍ وزیر نورالدین عزیزي د سفر له پیل سره هممهاله هندو ورځپاڼې ته د دغه هېواد ډېپلوماټیکو سرچینو ویلي، چې نوی ډیلی د افغانستان په کانونو او د اوبو برېښنا بندونو پروژو کې د پانګونې احتمالي ارزونه کوي.
د پاکستان پوځ د عامه اړیکو څانګې د چهارشنبې په ورځ خبر ورکړی، چې امنیتي ځواکونو یې په خیبر پښتونخوا کې په جلا، جلا عملیاتو کې څلور وسلهوال وژلي دي. د یادې ادارې په وینا؛ دغه عملیات د استخباراتي معلوماتو پر بنسټ د روانې نومبر میاشتې په ۱۷مه او ۱۸مه نېټه شوي دي.
په ننګرهار کې د طالبانو رسنیز دفتر خبر ورکړی، چې د دوی امنیې قوماندانۍ د تېرې اونۍ په ترڅ کې ۱۴ کسان له نشهيي توکو سره یو ځای نیولي دي. دوی وایي، «۷۵ګرامه شیشه، یو کیلو چرس، ۹زره زیکپ نشهلرونکې ګولۍ، ۲۷۲۲ټابلېټ کا ګولۍ او یوه اندازه شراب» په دغه نشهيي توکو کې شامل دي.
د اتریشي هنرمند ګوستاو کلیمټ یو اثر د سېشنبې په ورځ په نیویارک ښار کې په ۲۳۶ مېلیون ډالره وپلورل شو، چې دا د نړۍ دویم تر ټولو ګران بیه اثر شو. دغه نقاشي د ویانا د یوې شتمنې کورنۍ د لور الیزابت لیدر په نوم ده، چې د ۱۹۱۴ او ۱۹۱۶ کلونو پورې تړاو لري.
د امریکا ولسمشر ډونالډ ټرمپ تازه اعلان کړی، چې سعودي عربستان به «ډېر ژر» د امریکا لهخوا جوړې شوې F-35 جنګي الوتکې ترلاسه کړي. هغه ویلي، امریکا پر سعودي عربستان د ۳۰۰ ټانکونو او الوتکو په ګډون لومړۍ درجه پوځي تجهیزات پلوري.
د نړۍ د کاتولیکانو مذهبي مشر پاپ لیو د کډوالو پروړاندې د امریکا د تاوتریخوالي پر ډک چلند نیوکه وکړه او ویې ویل، چې له کډوالو سره باید د «انساني چلند» لارې چارې ولټول شي.
په جینوا کې د افغانستان دایمي استازي نصیر احمد اندېشه د کډوالو د نړۍوال تړون د پرمختګونو د څارنې ناستې د پیل په درشل کې ویلي، چې د بشري حقونو له خپلواکو سازمانونو او په ټرانزیټي هېوادونو کې له فعاله حقوقي ملاتړو بنسټونو سره یې خبرې پیل کړې دي.
د امریکا د عدلیې وزارت ویلي، چې د عبدالله حاجي زاده په نوم یو ۱۹ کلن افغان چې دا مهال په امریکا کې قانوني دایمي استوګن دی، په ۱۵ کاله بند محکوم شوی دی. د یاد وزارت په خبره، دغه کس په قصدي ډول د وسلې او مرمیو د ترلاسه کولو او د سیسې جوړولو هڅه کړې.
رویټرز د دوو باخبره سرچینو له قوله راپور ورکړی، چې امریکا له کییف څخه غوښتنه کړې څو د سولې هغه طرحه ومني، چې واشنګټن چمتو کړې او په کې د خاورې د ځینو برخو او د ځینو وسلو سپارل شامل دي. دغه سرچینو ویلي، چې د امریکا طرحه د اوکراین د وسلهوالو ځواکونو د شمېر کمول هم رانغاړي.
په کابل کې د ایران سفیر عليرضا بېکدلي ویلي، هېواد یې ژمن دی چې د چابهار بندر له لارې د افغانستان وچې مېوې نړۍوالو بازارونو ته ورسوي. تازه د چابهار بندر له لارې د افغانستان د وچې مېوې د صادراتو ټولنې او ایراني شرکت ترمنځ د ۹۰ میلیونه ډالرو په ارزښت یو تړون هم لاسلیک شو.
طالبانو په کاپیسا، پکتیا او پروان ولایتونو کې د دوو ښځو په ګډون پنځه کسان د «غلا، اخلاقي فساد او نامشروع اړیکو» په تور په عام محضر کې په دُرو وهلي دي. طالبانو دغو کسانو ته له یوه تر دوو کلونو پورې د تنفيذي بند سزا هم ورکړې ده.
د امریکا ولسمشر ډونالد ټرمپ د سعودي عربستان د ولیعهد محمد بن سلمان د غوښتنې په ځواب کې وویل، چې د سوډان د کورنۍ جګړې د پای ته رسولو په برخه کې به هڅه وکړي.
د امریکا ولسمشر ډونالډ ټرمپ وایي، باور لري چې د سعودي ولیعهد محمد بن سلمان به د غزې د بیارغونې د څارنې لپاره د سولې له کمېسیون سره یوځای شي.
د ملګرو ملتونو سرمنشي انتونیو ګوترېش پر اوکراین د روسیې وروستي توغندیز او ډرون بریدونه غندلي او د سمدستي او له شرط پرته اوربند پر اړتیا یې ټینګار کړی.
په کندهار کې د طالبانو د غصب د مخنیوي کمېسیون غړي وايي، یو شمېر غاصبین او زورواکي هڅه کوي، چې د دوی د کارونو پر وړاندې ستونزې جوړې کړي او فشار زیات کړي. د دغه کمېسیون غړي وايي، چې یوازې د هبتالله فرمان عملي کوي او د هېڅ فشار پروا نه لري.
د نورستان یو شمېر قومي مشرانو نن د چهارشنبې په ورځ (د لړم ۲۸مه) افغانستان انټرنشنل - پښتو ته په یوه لیک کې ویلي، چې په دغه ولایت کې د والي سربېره ۲۱ ولایتي چارواکي او رییسان له دوی سره په د دوی په ژبه نه پوهېږي او پخواني نورستاني چارواکي یې له دندو ګوښه کړي دي.
د پښتون ژغورنې غورځنګ مشر منظور احمد پښتین وایي، د بنو عدالت نن د ګیلهمن وزیر ورور عرفات او د هغه د تره زوی حاضرخان بنديان کړي دي.نوموړي زیاته کړې، د پاکستان عدالت او پولیس د دې پر ځای چې د ګیلهمن کورنۍ ته انصاف ورکړي، برعکس یې شکنجه کوي او ځوروي.
باوري سرچینو افغانستان انټرنشنل ته وویل، چې د طالبانو د عدلیې وزیر عبدالحکیم شرعي د کابل سناتوریم اوسېدونکي په جبري توګه له خپلو کورونو وتلو ته اړ کړي او کورونه یې خپل او خپلوانو ته سپارلي دي.