رویټرز اژانس راپور ورکړی، د امريکا د عدليې وزارت لوړپوړي چارواکي هڅه کوي چې د ولسمشر ډونالډ ټرمپ د ملي امنيت پخواني سلاکار جان بولټن پر ضد ژر تر ژره د قضایي تورونو اړوند قضیه مخ ته یوسي. نوموړی اوس د ټرمپ له سیاسي مخالفانو ګڼل کېږي.
د پاکستان، ایران، چین او روسیې د بهرنیو چارو وزیرانو د پنجشنبې په ورځ د ملګرو ملتونو د عمومي غونډې په څنډه کې د افغانستان په اړه څلور اړخیزه غونډه وکړه. دغه هېوادونو په یاده ناسته کې په افغانستان کې د ترهګرو ډلو د حضور په اړه اندېښنه ښودلې ده.
د پنجاب ایالت په میانوالي سیمه کې د افغان کډوالو وروستی پنډغالی هم وتړل شو. پاکستاني چارواکي وايي، چې په ميانوالي سیمه کې د کوټ چندنا پنډغالي تر تړل کېدو وروسته نور په دغه ایالت کې د افغان کډوالو پنډغالي نهدي پاتې.
د امریکا د فدرالي څېړنو ادارې (اېف بي ای) پخواني مشر جېمز کومي په اړه د پنجشنبې په ورځ د دوو جنایي تورونو اړوند قضیه پیل شوه. هغه د ټرمپ ښکاره مخالف بلل کېږي او دغه ګام هغه وخت پورته شو، چې د امريکا ولسمشر د خپلو سياسي مخالفانو پر وړاندې د قانوني فشارونو لړۍ نوره هم چټکه کړه.
د پنجشنبې په ورځ د پنجاب د پوهنې وزير رانا سکندر حيات ویلي، د سېلابونو له امله په دغه ایالت کې تر ۳زره ډېر ښوونځي ويجاړ شوي چې د زرګونه زدهکوونکو تعليم يې سخت اغېزمن کړی دی.
د طالبانو د ډلې غړو په خواله رسنیو کې د ملګرو ملتونو په عمومي غونډه کې د سوریې ولسمشر احمد الشرع حضور ته بېلابېل غبرګونونه ښودلي دي. د طالبانو د کورنیو چارو وزیر ته نږدې کس محمد جلال له زندانه تر ولسمشرۍ پورې د احمد الشرع لاره «فوقالعاده» بریالۍ بللې ده.
د جرمني دفاع وزير بورېس پستوریوس د پنجشنبې په ورځ خبرداری ورکړی، چې د روسيې د فضایي فعالیتونو له امله ګواښونه ورځ تر بلې زیاتېږي. هغه ویلي، چې دوه روسي سپوږمکۍ د جرمني د ځواکونو له لوري د کارېدونکو Intelsat سپوږمکيو څارنه کوي.
د طالبانو د کانونو او پټرولیم وزارت او د افغانستان لپاره د ناروې کمېټې ترمنځ د همکارۍ هوکړه لاسلیک شوه. په دغه هوکړه لیک کې د ځمکپوهنې د ګواښونو د څېړنې، د معلوماتو راټولولو، د پروژو د پلي کولو او د یاد وزارت د کارپوهانو د وړتیاوو وده شامله ده.
د پاکستان لومړي وزیر شهباز شریف او د دغه هېواد د پوځ لوی درستیز فیلډ مارشال عاصم منیر د امریکا له ولسمشر ډونالډ ټرمپ سره په سپینه ماڼۍ کې لیدلي دي. د رسنیو د راپورونو له مخې؛ دغه لیدنه د اوول افېس په خونه کې شوې، چې شاوخوا یو ساعت او شل دقیقې یې دوام کړی.
ملګرو ملتونو د یکشنبې په ورځ په یوه راپور کې وویل، چې د افغانستان په ختیځ کې د نوري فایبر شرکت انټرنېټ بندېدو له امله له زلزله ځپلو سره د مرستو بهیر ګډوډ شوی دی. د مرستندویه بنسټونو او د ژغورنې ډلو ترمنځ اړیکې ستونزمنې شوې او د مرستو رسولو بهیر سوکه شوی دی.
د کاناډا پوسټ کارکوونکو ټولنې په وینا؛ د پنجشنبې په ورځ یې کارکوونکو په ټول هېواد کې وروسته له هغې اعتراضونه پیل کړل، چې حکومت له دغه ادارې د مالي پیاوړتیا او د عملیاتو په عصري کولو کې د پراخو بدلونونو غوښتنه وکړه.
د سوریې د دولتي خبري اژانس د راپور له مخې؛ د ګرځندوی وزير مازن الصالحي د پنجشنبې په ورځ وويل، چې د ګرځندوی د ملاتړ لپاره یې د ۱.۵مېليارده ډالرو په ارزښت د پانګونې تړونونه لاسليک کړي دي.
د امریکا ولسمشر ډونالډ ټرمپ د بګرام په اړه د کوم ځانګړي وخت له ښودلو پرته اعلان وکړ، چې هغه به د بګرام په اړه خبرې وکړي. هغه، د خپلې لومړۍ دورې د حکومت پر مهال د امریکا د پوځ له خوا د بګرام اډې د بیا رغولو یادونه وکړه او ویې ویل چې د پوځ تجهیزات په افغانستان کې پرېښودل شوي دي.
د افغانستان پخواني ولسمشر ډاکټر محمد اشرف غني په یوه تازه پاډکاسټ کې ویلي، چې په افغانانو کې د یووالي ظرفیت شته او که ولس یو موټی شي ستر دولتونه رامنځ ته کولی شي. نوموړي د میرویس نیکه او احمدشاه بابا پر حکومتداریو، سیاسي ځرکتیاوو او د ملت په راټولونې هم بحث کړی.
د مېرمنو لپاره د ملګرو ملتونو د ځانګړې ادارې اجرایوي مشرې سیما باهوس اعلان کړی چې د افغانستان د ښځو ملاتړ لپاره یې له اروپایي ټولنې سره یو نوی تړون لاسلیک کړی دی.
د افغانستان په اړه د اسلامي همکاریو سازمان د بهرنیو چارو وزیرانو د تماس ډلې لومړۍ غونډه په نیویارک کې ترسره کړه. دغه سازمان ویلي، تماس ډله د افغانستان په اړه د پریکړو د پلي کولو او د دغه هیواد بشري، سیاسي او اقتصادي ننګونو لرې کولو لپاره د همکارۍ د پیاوړتیا په موخه جوړه شوې ده.
اسراییلي چارواکو په تېرو میاشتو کې څو ځله د علي خامنهيي د وژلو ګواښونه کړي؛ خو د ایران مشر علي خامنهيي د ایران او عراق د جګړې د پیل اونۍ په مناسبت له نامعلوم ځای څخه په یوه پيغام کې تر مرګه پر مبارزې ټینګار کړی او «وژل کېدل» یې د جهاد ډالۍ بللې.
د بشري حقونو څار بنسټ وایي چې نن د اسټرالیا، کاناډا، جرمني او هالنډ د هغې پرېکړې یو کال پوره کېږي چې له مخې یې په افغانستان کې د طالبانو تر واکمنۍ لاندې د ښځو او نجونو د حقونو د نقض موضوع د «ښځو پر وړاندې د هر ډول تبعیض د له منځه وړلو کنوانسیون»له لارې څارل کېږي.
په کندهار کې د پاکستان پخوانی جنرال کونسل عمر خان شېرزی وایي دغه هېواد دوه ځلې طالبان واک ته ورسول، خو اوس واکمن طالبان د پاکستان سره نمک حرامې کوي. نوموړی زياتوي، اوسني طالبان د هند، روسیې او اسراییل څخه په پاکستان کې د ناامنۍ جوړولو لپاره پیسې اخلي.
د واشنګټن پوسټ د راپور له مخې، د امریکا د جګړې وزیر پیت هګسټ سلګونه لوړپوړي جنرالان او د سمندري ځواکافسران د راتلونکې اوونۍ لپاره یوې «ځانګړې او محرمې» ناستې ته بللي دي. دغه ناسته به د ویرجینیا ایالت په «کوانتیکو»سمندري اډه کې ترسره شي.
د بریټانیا کورنیو چارو وزارت اعلان کړی چې د یوه افغان کډوال په اړه یې بېړنۍ څېړنې پیل کړي دي. دغه کس، چې په بریټانیا کې یې پناه غوښتنه منل شوې وه، بېرته افغانستان ته تللی او هلته یې د رخصتیو انځورونه او ویډیوګانې په ټولنیزو شبکو کې خپرې کړې دي.