د طالبانو تر ادارې لاندې باختر خبري اژانس راپور ورکړی چې د لغمان د قرغیو ولسوالۍ اړوند په میاه خان کڅ سیمه کې نن یکشنبه د (لړم ۲۵مه) د یوې ټرافیکي پېښې له امله د یوې کورنۍ ۶غړي مړه او ۳نور ټپیان شول. وایي، د موټرچلوونکي د بې احتیاطۍ له امله چپه شوی او اور یې اخیستی و.
د طالبانو کورنیو چارو وزارت ویلي چې د نشه یي توکو پر ضد ځانګړې څانګې یې د کابل ښار د اومې ناحیې په مربوطاتو کې ۱۷ زره ۲۵۰ نشهيي ګولۍ کشف او ضبط کړي دي. خبرپاڼه زیاتوي، چې د دغه نشهیي توکو په تړاو یو کس هم نیول شوی دی.
سره له دې چې له یوې میاشتې راهیسې له پاکستان سره د ډیورنډ کرښې له لارې سوداګري تړل شوې، په کندهار کې طالب چارواکي وايي چې سږکال له دې ولایت نه نږدې ۲۲ زره ټنه انار بهر ته صادر شوي، چې د تېر کال پرتله ۳۲ سلنه زیاتوالی ښيي.
ننګرهار کې د تازه مېوو یو شمېر کاروباریانو افغانستان انټرنشنل – پښتو ته ویلي چې له پاکستان نه د اېستل کېدونکو افغان کډوالو په بار وړونکو موټرونو کې کېلې، امروت او مالټې هېواد ته قاچاق کېږي. وایي، د تورخم له لارې د پاکستانۍ مېوو نږدې ۱۰۰۰ کارټنه هره ورځ هېواد ته قاچاق کېږي.
په هلمند کې د طالبانو رسنیز دفتر وایي، په دغه ولایت کې د تېرې یوې اونۍ په اوږدو کې د قاچاقي توکو د غیرقانوني واردولو په تور ۸۱ کسان د ۴۰ عرادې موټرو سره نیول شوي او خپلو اړوندو ادارو ته یې سپارلي دي.
د چین ساحلي ساتندوی ځواک وایي چې د دوی کښتۍ د یکشنبې په ورځ د جاپان تر ادارې لاندې سنکاکو ټاپوګانو په سیمه ییزو اوبو ته ننوتلې دي. دا ګام له هغه وروسته اخیستل کېږي چې د جاپان لومړۍ وزیرې سانای تاکایچي ویلي وو، که چین پر تایوان برید وکړي، کېدای شي ټوکیو پوځي غبرګون وښيي.
د طالبانو د کار او ټولنیزو چارو وزارت ویاند سمېع الله ابراهیمي وایي، د هېواد په بېلابېلو ولایتونو کې له اعتیاد څخه رغېدلي ۲زره کسان په حرفوي زده کړو بوخت دي. وایي، په دې کسبونو کې د برېښنايي وسایلو ترمیم، د بوټانو ګنډل، د بکسونو جوړول او خیاطي شامله ده.
د تېر جمهوري نظام پر مهال په پاکستان کې افغان سفیر نجیبالله عليخېل وایي، افغانستان تاریخي او حساس پړاو کې د یوې مهمې پرېکړې پر سر ولاړ دی چې یا به د سیمې د ستراتیژیکو اقتصادي پروژو له فرصتونو اغېزمنه ګټه واخلي او یا به یو ځل بیا د نړۍوالو سیالیو په ډګر بدل شي.
بریتانيې وايي چې د معاصر وخت تر ټولو لوی بدلون به د پناه غوښتونکو د پالیسۍ په برخه کې پلی کړي، چې الهام یې له ډنمارک څخه اخیستی، هغه هېواد چې په اروپا کې تر ټولو سخت قوانین لري او د بشري حقونو ډلې پرې پراخ انتقاد کوي.
ادموند فیتن براون، چې پخوا په یمن کې د بریتانیا سفیر و، د فارس خلیج په اوبو کې د یوې تېلوړونکې بېړۍ د نیولو په غبرګون کې د سپاه پاسداران پر ضد د پوځي غبرګون غوښتنه وکړه.
د ایران دولت ویاندې فاطمه مهاجراني المیادین شبکې ته ویلي، ایران د منځګړو له لوري پیغامونه ترلاسه کړي؛ خو «څو چې د مقابل لورو چلند یو اړخیز او د برلاسۍ او واکمنۍ پر بنسټ وي، خبرې اترې به بې معنا وي.»
د کرملین مطبوعاتي دفتر د شنبې په ورځ وویل، چې د روسیې ولسمشر ولادیمیر پوتین او د اسراییل لومړي وزیر بنیامین نتنیاهو د ټیلیفون له لارې د منځني ختیځ د وضعیت په اړه خبرې کړې دي.
د افغان طالبانو او پاکستان تر منځ د اړیکو له ترینګلي کېدو وروسته د طالبانو د صنعت او سوداګرۍ وزارت په وینا، له پاکستان سره سوداګري کمه شوې، خوله ایران سره زياته شوې ده. د اړیکو له ترینګلیدو مخکې پاکستان د افغانستان د سوداګرۍ او ټرانزیت یو له مهمو لارو و.
د طالبانو د بندخونو چارو د سمون اداره وايي، له هغو هېوادونو سره د افغان بندیانو د رالېږد خبرې رواني دي، چې اوسمهال پکې د بند شپې او ورځې تېروي. د طالبانو د بندخونو چارو د سمون ادارې عمومي رییس مولوي محمد یوسف مستري وایي، ډېری افغان بندیان په ایران او پاکستان کې دي.
د پاکستان اېکسپرېس ټربیون د افغانستان د تېر نظام د بهرنیو چارو وزارت د سیاسي مرستیال ادریس زمان له قوله لیکلي، چې د سیمې راتلونکې په دې پورې تړلې ده چې د مرکزي او سوېلي اسیا هېوادونه د افغانستان له ننګونو سره څنګه چلند کوي.
د ملګرو ملتونو د نشهیي توکو او جرمونو ضد دفتر د «سرحدونو هاخوا د سازمانشویو جرمونو د مبارزې نړۍوالې ورځې» په مناسبت اعلان کړی، چې له جنایي شبکو سره مبارزه کولای شي په افغانستان او نړۍ کې د ټولنیز او اقتصادي پرمختګ او د خلکو د ژوند د کیفیت د لوړوالي لامل شي.
د ملګرو ملتونو د کډوالو عالي کمېشنرۍ اعلان کړی، چې د نړۍوالو مالي محدوديتونو له امله دوی نه شي کولای له ټولو افغان راستنېدونکو سره نغدي مرستې وکړي. د دې ادارې مرستې له دې وروسته يوازې هغو «زیانمنو راستنېدونکو» ته ورکول کېږي، چې د «پي او ار» کارټ لري.
د اوکراین ولسمشر ولادیمیر زېلېنسکي له هغه وروسته چې د هېواد د انرژۍ په سترو دولتي شرکتونو کې د فساد او اختلاس رسوایي افشا شوه، د دغو شرکتونو د مشرتابه په جوړښت کې د پراخو بدلونونو اعلان وکړ.
د پاکستان لومړي وزیر شهباز شریف د اردُن له پاچا دویم عبدالله سره په کتنه کې د پاکستان په ګاونډ کې د وروستیو تحولاتو، په ځانګړي ډول د افغانستان او هند په اړه هغه ته معلومات ورکړل. د پاکستان حکومت د دغو معلوماتو د ورکړې په اړه نور جزییات نهدي ورکړي.
په خوست کې د طالبانو ولایتي ویاند مستغفر ګربز ویلي، چې د دې ولایت د نرخونو د کنټرول او د احتکار د مخنیوي کمېسیون مسوولینو د هټیو د څار او ارزونې په لړ کې، د خوست ښار د تڼیو لین ته څېرمه ساحه کې ۱۳ هټۍ د خوراکي توکو د وزن د کموالي او د بیو د لوړوالي له امله وتړلې.
د اریانا افغان هوايي شرکت د طالبانو د اقتصادي مرستیال د پرېکړې پر بنسټ له یکشنبې څخه د ډیلي سکټور لپاره د کارګو له لارې تر ټولو ټيټې بیې عملي کوي. دوی ویلي، یو کیلو سوداګریر صادراتي توکي په یو امریکايي ډالره او یو کیلو وارداتي سوداګريز توکي په ۸۰ سنټه لېږدوي.