طالبانو په بامیان پوهنتون کې د یو لړ مراسمو په ترڅ کې «له امیرالمومنین سره بیعت» د کتاب مخکتنه وکړه. د بامیان ولایت لپاره د طالبانو والي ګلحیدر شفق په دې مراسمو کې ملا هبتالله اخوندزاده یو «متقي رهبر» او د افغان ولس لپاره د هغه له اوامرو اطاعت ضروري وباله.
د امریکا ولسمشر ډونالډ ټرمپ له اسراییل ۱۲کانال سره په خبرو کې وویل، که له ایران سره هوکړې ته رسېدل ممکن نه وي، واشینګټن چمتو دی چې د تېرې غبرګولي میاشتې د «۱۲ ورځنۍ جګړې» په څېر د ایران پروړاندې پوځي اقدام وکړي.
د طالبانو له پېښو سره د مبارزې د چمتووالي ادارې د ژغورنې نړۍوالې کمېټې یا ایارسي او د اسلامي هوساینې نړۍوالې موسسې یا ایارډبلیو تر منځ د ۱ میلیون او ۳۴ زره امریکايي ډالرو په ارزښت دوه هوکړې لاسلیک کړې دي.
د عوامي نشنل ګوند مشر اېمل ولي خان وایي، د پاکستان پخوانی لومړی وزیر عمران خان خپله یو لوی ترهګر دی او پاکستاني طالبانو ته یې چندې ورکولې. هغه زیاتوي، چې ده لس کاله وړاندې د پاکستان دې پخواني لومړي وزیر ته د «طالبان خان» نوم ورکړی و.
ټرمپ له فاکسنیوز سره په مرکه کې دې ته په اشارې سره چې دا مهال «یو خورا لوی سمندري ځواک» د ایران په لور د حرکت په حال کې دی، وویل: «تېر ځل مو د هغوی اټومي وړتیا لهمنځه یووړه او دا ځل به هم وګورو چې ایا نور ګامونه پورته کوو که نه».
د ههنګاو په نوم د ایران د بشري حقونو یو سازمان وايي، ایران د درېیو افغانانو په ګډون ۱۴ کسان اعدام کړي دي. دغه سازمان وايي، یاد افغانان کریم نظري، سیفالدین مهربان او نامق کسروي نومېدل او د هرات او بغلان ولایتونو اوسېدونکي وو.
د امریکا د عدلیې وزارت لهخوا خپاره شوي اسناد ښيي، چې سلطان احمد بن سلیم د «ډيپي ورلډ» شرکت مشر چې د طالبانو له ادارې سره قراردادي اړیکې لري، له بدنام امریکايي جنسي مجرم جېفري اپسټین سره پراخې او شخصي اړیکې لرلې او د خپلو جنسي تجربو په اړه یې ورسره لیکلي پیغامونه تبادله کړي دي.
د بادغیس ولایت لپاره د طالبانو والي محمد حنیف حمزه په دغه ولایت کې د امربالمعروف او نهې عنالمنکر د قانون تطبیق په تړاو غونډه کې وویل، د هبتالله اخوندزاده فرمانونه د نظام «اصل او بنسټ» دي او په وینا یې په عملي کېدو کې یې باید ځنډ ونهشي.
رویټرز خبري اژانس راپور ورکړی، چې د غزې په ویجاړو شویو سیمو کې له دوه کلن ځنډ وروسته یو ځل بیا د فوټبال سیالۍ پیل شوې دي. په دغه لومړني ټورنمنټ کې د «جبالیا یوت» او «الصداقه» لوبډلو ترمنځ لوبه وشوه، چې په پایله کې دواړه لوبډلې په مساوي توګه له میدانه ووتلې.
د نړۍ د فوټبال ستوری لیونل مسي لا هم خپل راتلونکی له بارسلونا ښار سره تړلی بولي. هسپانوي رسنۍ وایي، دا ارجنټایني ستوری اراده لري چې د خپل لوبیز ژوند تر پای وروسته له خپلې مېرمنې او ۳ اولادونو سره یوځای کاتالونیا ته بېرته ستون شي؛ هغه ښار چې د کلونو لپاره د ده اصلي کور پاتې شوی.
د افغانستان په مرکزي زون کې د ملګرو ملتونو د پراختیايي پروګرام او د ښځو سازمان د بامیان لپاره د طالبانو له والي سره په کتنه کې ویلي، چې په نږدې راتلونکې کې به د متشبثو ښځو لپاره د ۴۰ غرفو په ګډون یو ګډ سوداګریز مارکېټ افتتاح او ګټې اخیستنې ته وسپاري.
د پاکستان د کرېکټ ملي لوبډلې د ۲۰۲۶ کال د شل اوریز نړۍوال جام په خپله دویمه لوبه کې د امریکا لوبډلې ته د ۳۲ منډو په توپیر ماتې ورکړه او د ۴ نمرو په ترلاسه کولو سره د لومړي ګروپ د جدول سر ته ورغله. په دغه ګروپ کې د هند، هالنډ او نامیبیا لوبډلې هم شاملې دي.
په افغانستان کې د سره صلیب نړۍواله کمېټه وایي، چې په تېر ۲۰۲۵ زېږدیز کال کې یې د هېواد بېلابېلو ولایتونو کې ۱.۲۶ میلیونه افغانانو ته روغتیایي خدمتونه وړاندې کړې دي. دې کمېټې زیاته کړې، چې دغه خدمتونه د دوی په ۴۷ روغتیایي مرکزونو کې وړاندې شوې دي.
د طالبانو اړوند د «شریعت» په نوم ورځپاڼې د «پر خپلو لوڼو او خویندو رحم وکړئ» په سرلیک سره په خپله نننۍ (سېشنبه د سلواغې ۲۱مه) سرمقاله کې اوسنۍ دوره د ښځو لپاره «وروستۍ زمانه» بللې او زیاته کړې یې ده، چې پر ښځو ظلم کېږي او حقوق یې هم نهمراعاتېږي.
رویټرز خبري اژانس ویلي، د سېشنبې په ماښام د البانیا په پلازمېنه تیرانا کې د حکومت ضد پراخ لاریونونه پیل شوي او لاریونوالو له پولیسو سره نښتې هم کړې دي. راپور کې راغلي، چې لاریونونه د دغه هېواد د لومړي وزیر د مالي فساد له کبله پیل شوي او د هغه د استعفا غوښتنه کېږي.
د امریکا ولسمشر ډونالډ ټرمپ د اسراییل له «چینل ۱۲» ټلوېزیوني شبکې سره په مرکه کې ویلي، چې د ایران له حکومت سره هر ډول تړون باید یوازې په اټومي پروګرام پورې محدود نه وي، بلکې د ایران د بالسټیک توغندیو موضوع هم باید پهکې شامله شي.
د پاکستان د سند ایالت ولایتي شورا ته د متحد قومي غورځنګ (MQM) غړي انیل کومار یو پرېکړهلیک وړاندې کړی و، چې پهکې په دې ایالت کې د الکولي مشروباتو د پېر او پلور د بشپړ بندیز غوښتنه کړې وه؛ خو دا پرېکړه اکثریت غړو رد کړه.
د پاکستان دفاع وزیر ویلي، لوېدیځ د افغانستان په مسله کې پاکستان د «تشناب کاغذ» په څېر وکاراوه او بیا یې پرېښوده. رحمتالله نبیل د خواجه اصف دغو خبرو ته غبرګون کې وايي، پاکستان له پيل څخه د منطقې د نيابتي لوبو او ايډيالوژۍ پروژه وه، نه يو هېواد چې رښتينی ملي روایت او ارزښت ولري.
یو افغان پناهغوښتونکی په برېتانیا کې پر یوې ۱۲کلنې نجلۍ د جنسي تېري په تور مجرم وپېژندل شو. ۲۳ کلن احمد ملاخېل تېر کال د جولای میاشت کې د برېتانیا په مرکزي ښار نونېټن کې د ۱۳ کلونو څخه د کم عمره ماشومې پر دوه ځله جنسي تېري د واروېک کراون محکمې له محاکمې وروسته مجرم وبلل شو.
د سپوږمکۍ انځورونه ښيي، چې امریکایي ځواکونو په منځني ختیځ کې د خپلې تر ټولو لویې پوځي اډې العدید کې له ایران سره د تاوتریخوالي د زیاتېدو له امله له تېرې جنورۍ میاشتې راهیسې خپل توغندي په ګرځنده لاریو کې ځای پر ځای کړي، څو په چټکۍ سره د هغو لېږدول شونې وي.
د افغانستان د پخواني جمهوري نظام پر مهال د حج او اوقافو وزارت مرستیال شېخالحدیث محمد عثمان طارق وایي، چې د طالبانو جزایي اصولنامه له قران او نبوي سنت سره په بشپړ ټکر کې ده. هغه همداراز زیاتوي، چې د حنفي فقهې له نظره له طالبانو سره جګړه روا ده.