د ننګرهار لپاره د طالبانو امنیه قومندانۍ وايي، د دغه ولایت پر ۴ ولسوالیو د پاکستان په بریدونو کې ۱۸ ولسي وګړي وژل شوي او ۸ نور ټپيان دي. د دغې قومندانۍ مسوولین وايي، د پاکستان د بمباریو له امله ۵ جسدونه تري تم شوي او له دوو ورځو پلټنو وروسته لا هم پر موندلو یې نهدي بریالي شوي.
په فرانسه کې د امریکا سفیر چارلس کوشنر د دغه هېواد له حکومتي چارواکو سره له لیدنې منع شو. ډیپلوماټیکو سرچینو د دوشنبې په ورځ رویټرز خبري اژانس ته ویلي، دا پرېکړه وروسته له هغه وشوه چې نوموړی د فرانسې د بهرنیو چارو وزارت له لوري احضار کېدو ته حاضر نهشو.
د افغانستان د بشري حقونو کمېسیون پخوانی کمېشنر نادر نادري وايي، پاکستان پر افغانستان په بریدونو سره د «تیري جرم» کړی او د جرمونو نړۍواله محکمه یې باید وڅېړي. هغه ټينګار کړی، چې د طالبانو کړنې پاکستان ته د دې اجازه نهورکوي، چې پر بل هېواد تېری وکړي او ولسي وګړي ووژني.
د ملګرو ملتونو د بشري حقونو راپور ورکوونکی ریچارډ بېنېټ تر دوو ورځو وروسته د افغانستان په یو شمېر سیمو باندې د پاکستان د بریدونو په تړاو څرګندونې کړې دي. هغه وایي، دغو بریدونو کې د ماشومانو او ملکي وګړو پر وژل کېدو سخت خواشینی شوی دی.
د حافظ ګل بهادر په مشرۍ د اتحاد المجاهدین مرستیال مولوي صادق نور داوړ په یوه غږیز پیغام کې ویلي، پاکستان د خوارجو تر نامه لاندې طالبانو ته د «کافر» خطاب کوي. هغه د دیني عالمانو په استناد خوارج د دین له دایرې بهر ګڼلي او وايي، «پاکستان د خوارجو په نامه په کوزه کې سمندر ځای کړی».
د برېتانیا پولیسو د دوشنبې په ورځ (د کب ۴مه) په امریکا کې د دغه هېواد پخوانی سفیر پېټر مندلسون د بد نامه امریکايي جېفري اپسټین په دوسیه کې د ښکېلتیا له امله د پولیسو له لوري ونیول شو. تر دې مخکې د برېتانیا یو شهزاده هم له اپسټين سره د اړیکو په تړاو نیول شوی وو.
د اکسیوس د راپور لهمخې، د امريکا د پوځ د ګډو ځواکونو لوی درستيز ډن کين د دغه هېواد ولسمشر «ډونالډ ټرمپ» او لوړپوړو چارواکو ته خبرداری ورکړی، چې پر ايران پوځي بريد کولای شي جدي او درانه ګواښونه ولري. هغه ويلي، دا ډول ګام به امريکا په يوه اوږده جګړه کې ښکېله کړي.
د اوکراين ولسمشر ولاديمير زېلېنسکي اعلان وکړ، چې د روسيې ولسمشر ولاديمير پوتين درېيمه نړۍواله جګړه پيل کړې ده. زېلېنسکي د برېتانيا له بيبيسي سره په مرکه کې وويل، د پوتين کړنو په رښتيا سره نړۍ يوې پراخې جګړې ته ننويستې ده.
د افغانستان لپاره د پاکستان پخواني ځانګړي استازي اصف دُراني له افغانستان انټرنشنل سره په تازه مرکه کې ویلي، پر کابل واکمنو طالبانو بله لاره نه وه پرېښې، نو ځکه پرې هوايي برید وشو. هغه زیاتوي، چې دی په دغو بریدونو خوښ نه دی.
د پاکستان د پنجاب په قاید اعظم میډيکل کالج کې سرچینو افغانستان انټرنشنل- پښتو ته ویلي، ځايي پولیسو نن د یاد کالج افغان محصلان د ویزو د مودې ختمېدو له امله نیولي او د اېستنې له ګواښ سره مخ دي. دغه محصلان وايي، د ویزو د تمدید لپاره یې نوم لیکنه کړې خو لا هم تر پروسس لاندې دي.
ځايي سرچینې وايي، چې د بلوچستان ایالت د پنجګور ولسوالۍ په دستک سیمه کې نامعلومو وسله والو شپږ کسان وژلي او دوه موټر یې سوځولي دي. ځايي رسنیو د پولیسو له قوله راپور ورکړی، چې د پيښې نور جزئیات لا روښانه نه دي، خو سیمې ته پولیس رسېدلي دی.
په تهران کې د هند سفارت د یوې بېړنۍ خبرپاڼې په خپرولو سره له ټولو هندي وګړو وغوښتل چې ژر تر ژره ایران پرېږدي.
د پاکستان جمعیت علمای اسلام ګوند لوړپوړي مشر او پخواني سناتور حافظ حمدالله ویلي، چې که پر پاکستان بریدونه د هند او خوارجو له لوري کېږي، نو پر افغانستان ولې بمبار کېږي او پر هند نه کیږي. هغه د پاکستان د حکومت رسمي دریځونه او عملي اقدام په ټکر کې بللي.
په لکي مروت کې د مروت او بیټني قبیلو د غورځنګ مشر انعام الله خان وايي، چې پر کور او مېلمستون یې د ډرون څرخکو درې بریدونه شوي دي. نوموړي د پاکستان پر پوځ او استخباراتو نیوکې کړې، چې دا ډرون څرخکې څوک پورته کوي.
د افغانستان کرېکټ بورډ اعلان کړې، چې افغانستان به د راتلونکې مارچ میاشتې له ۱۳مې نېتې څخه په متحده عربي اماراتو کې د سریلانکا کرېکټ لوبډلې سره د سپین توپ(شل اوریزو او یو ورځنیو) سیالیو کوربه وي.
د سوریې دریو پوځي او امنیتي سرچینو ویلي چې امریکايي ځواکونو د دوشنبې په ورځ د سوریې په حسکه ولایت کې له خپلې سترې اډې قصرک څخه د وتلو بهیر پیل کړی دی. د عیني شاهدانو په وینا، لسګونه لارۍ چې ځینو یې زغرهوال ګاډي لېږدول، سهار له قصرک اډې څخه ووتلې.
په کابل کې د روسیې سوداګریز مرکز وایي، چې بېلاروس په ۲۰۲۵ کال کې افغانستان ته ټولټال ۳۸۱ زره ټنه تیلي محصولات صادر کړي، چې دا د تېر کال په پرتله ۲۳ ځله زیاتوالی ښیي. په ورته وخت کې له ایران څخه افغانستان ته د تیلو صادرات په پراخه کچه کم شوي دي.
نیویارک ټایمز خبر ورکړی، چې شاوخوا لس زره افغان کمانډویان چې د "صفري قطعو" غړي وو، اوس مهال په متحده ایالاتو کې له ناڅرګند راتلونکي سره مخ دي. په واشنګټن کې د امریکا د ملي ګارډ پر سرتېرو د یوه افغان له ډزرو وروسته د صفري قطعو د ځواکونو د پناه غوښتلو بهیر هم ځنډول شوی.
اسراییلي ټلویزوني شبکې «کان» راپور ورکړی، چې امریکا په لبنان کې د خپل سفارت لسګونه تنه کارکوونکي له دغه هېواده وایستل. لبناني رسنیو هم ویلي، چې واشنګټن خپل لسګونه کسان د رفیق حریري نړیوال هوايي ډګر له لارې تخلیه کړي دي.
د طالبانو ارشاد، حج او اوقافو وزارت وايي چې په روانه ژوره کې د کابل ښار د ۲۲ ناحیو په ګډون د هېواد په ۳۴ ولایتونو کې د تراویح لمونځونو لپاره ۳۴۰۰ تنه قاریان د ازموینې له لارې ګومارل شوي دي.
د طالبان ویاند ذبیح الله مجاهد وایي چې د پاکستان واقعي دیني عالمان پر افغانستان د دغه هېواد د «نظامي کړیو» د تېرې شپې د بریدونو مخالف دي. هغه زیاته کړې چې « د پاکستان یو شمېر درباري علما شته چې د پوځ داسې کړنو ته جواز ورکوي».